Swartrivier (Kaapstad)
Die Swartrivier vloei in die suidelike voorstede van Kaapstad en mond uit in Tafelbaai.
| Swartrivier | |
|---|---|
| Stroomgebied | Wes-Kaap, Suid-Afrika |
| Oorsprong | Stellenberg-landgoed in Kenilworth en die Arderne-tuin in Claremont |
| Monding | Kaapstad, Suid-Afrika Tafelbaai |
| Oorsprong-hoogte | 17 m |
| Monding-hoogte | 0 m |
  Swartrivier |
|
| Koördinate: 33°55′59.99″S 18°28′0.01″O / 33.9333306°S 18.4666694°O | |
Die rivier het twee bronne, naamlik die Stellenberg-landgoed in Kenilworth en die Arderne-tuin in Claremont. Daarna loop dit agtereenvolgens deur die Brookside-veld van die Villagers-sportklub in Claremont, Keurboompark in Rondebosch en die terrein van die Rondebosch Hoër Seunskool. By die padwisselaars op die Kromboomsnelweg sluit die Kromboomrivier vanuit Kenilworth en Wynberg by die Swartrivier aan. In die Rondebosch-gholfbaan sluit die Elsieskraalrivier vanuit die noordooste ook by die Swartrivier aan en loop die vergrote rivier verder noord verby die die Valkenberg Hospitaal en die sterrewag. Net daarna sluit ook die Liesbeek vanuit die suidweste aan. Stroomafwaarts staan die rivier van hieraf bekend as die Soutrivier en stroom kort daarna Tafelbaai binne. Teenswoordig is die grootste deel van die rivier gekanaliseer.
Die Black River Parkway, die noordelike deel van die M5, ontleen sy naam aan die rivier. In die dae van die VOC was die rivier 'n tyd lank die landsgrens.
Bibliografie
wysig- Burman, Jose: Safe to the sea. Kaapstad: Human & Rousseau, 1962.