The Lord of the Rings: The Return of the King (Rolprent)

The Lord of the Rings: The Return of the King is die derde aflewering in Peter Jackson se filmtrilogie The Lord of the Rings, gebaseer op J.R.R. Tolkien se gelyknamige blitsverkoper.

Die film het op 1 Desember 2003 in Wellington, Nieu-Seeland, begin en is op 17 Desember in rolprentteaters wêreldwyd vertoon. The Return of the King is die opvolg van The Fellowship of the Ring en The Two Towers. In vergelyking met Tolkien se boek, vertel die film dele van beide The Two Towers en The Return of the King.

Die film is benoem vir elf Oscars by die 2004 Oscars. Die rolprent het alle benoemings, insluitend beste rolprent gewen en die rekordgetal Oscars van 11 met Titanic en Ben Hur gedeel. 'n Jaar later, aan die einde van 2004, is 'n uitgebreide uitgawe van hierdie film vrygestel en 48 minute se nuwe en uitgebreide tonele is by hierdie film gevoeg.

RolverdelingWysig

StorieWysig

Die film begin waar die hobbit Sméagol visvang saam met sy neef Déagol, wat die Een Ring in die rivier ontdek. Sméagol se gedagtes word deur die Ring verstrik, en hy vermoor sy neef daarvoor. Hy word fisies en geestelik toenemend korrup en trek terug in die Misty Mountains en word as Gollum bekend.

Eeue later, tydens die Oorlog van die Ring, lei Gandalf vir Aragorn, Legolas, Gimli en koning Théoden van die Rohan na Isengard, waar hulle met Merry en Pippin herenig. Gandalf spoor Saruman se palantír op, 'n onvernietigbare kristalbal gebruik vir kommunikasie en om gebeure in ander dele van Arda te sien, hetsy die verlede of toekoms.

Die groep keer terug na Edoras om hul oorwinning by Helm's Deep te vier. Pippin kyk in die palantír en sien Sauron en 'n brandende boom. Gandalf lei af dat die vyand beplan om Gondor se hoofstad Minas Tirith aan te val; hy ry soontoe om Gondor se rentmeester Denethor te waarsku. Pippin, wat hom vergesel, sweer trou aan Denethor, wie se nou gestorwe erfgenaam, Boromir, sy lewe gered het. Op Gandalf se instruksie, word die stad se bakens aangesteek, wat om Rohan se hulp roep.

Frodo, wat die Ring dra, en Sam gaan voort met hul reis na Mordor, onbewus daarvan dat Gollum, nou hul gids, beplan om hulle te verraai en die Ring vir homself te neem. Die trio sien die heksekoning van Angmar, heer van die nege Nazgûl, wat met sy leër van Orke na Gondor vertrek. Gollum span saam om Sam vals te beskuldig dat hy die voedselvoorrade opeet en die Ring begeer.

Beïnvloed deur die groeiende krag van die Ring, word Frodo mislei en beveel Sam om huis toe te gaan. Gollum verneuk Frodo dan om die lêplek van die reusespinnekop Shelob aan te durf. Frodo ontsnap net-net en konfronteer Gollum, wat ná 'n stoeiery in 'n kloof val. Shelob verlam en bind Frodo vas, maar word gewond en verdryf deur 'n terugkerende Sam, wat treurend oor Frodo se oënskynlike dood, die Ring neem. Sam besef sy fout wanneer 'n groep Orke Frodo gevange neem, maar kry dit reg om Frodo te red terwyl die Orke onder mekaar veg. Nou binne Mordor gaan die hobbits voort na Mount Doom, hul bestemming.

Terwyl koning Théoden sy leër bymekaarmaak, vertel Elrond vir Aragorn dat Arwen besig is om te sterf, omdat hy geweier het om Middel-aarde te verlaat. Elrond gee aan Aragorn Andúril, gesmee uit die skerwe van koning Elendil se swaard Narsil, en dring by hom aan om hom te verbind om Gondor se troon, waarvan hy erfgenaam is, op te eis. Saam met Legolas en Gimli reis Aragorn oor die Pad van die Dooies, en belowe om die spoke daar van hul vloek te bevry sou hulle Gondor te hulp kom.

Intussen is Faramir, wat vroeër deur die heksekoning oorval en teruggedryf is na Minas Tirith, ernstig gewond in 'n selfmoordklag; Denethor glo dat sy seun dood is, en verval in waansin. Gandalf stel die verdedigers op, maar die groot Ork-leër breek die stad in. Denethor probeer om homself en Faramir op 'n brandstapel te verbrand, maar Pippin waarsku Gandalf en hulle red Faramir. Denethor, aan die brand gesteek en in angs, spring na sy dood.

Théoden kom aan en lei sy leër teen die Orke. Ten spyte van aanvanklike sukses teen Orke in die daaropvolgende geveg, word hulle vernietig deur die Oliphaunt-ryende Haradrim en die heksekoning verwond Théoden dodelik; sy niggie Éowyn maak egter die heksekoning dood met Merry se hulp. Théoden sterf in sy niggie se arms. Aragorn arriveer dan met sy Leer van die Dooies, wat Sauron se magte oorwin. Hulle eed is vervul, die dooies word van hulle vloek bevry.

Aragorn besluit om na Mordor te marsjeer om Sauron se aandag van Frodo, nou uiters swak, en Sam af te lei. Al Sauron se oorblywende magte marsjeer om Aragorn se afdeling tegemoet te kom, wat die hobbits toelaat om Mount Doom te bereik. Gollum, wat sy vroeëre val oorleef het, val hulle aan, maar Frodo slaag steeds daarin om die berg binne te gaan. Daar swig Frodo voor die mag van die Ring en sit dit op sy vinger, en Gollum slaag daarin om sy vinger af te byt en dit terug te eis. Hulle stoei met mekaar en val altwee van die rand af. Frodo kry dit reg om vas te klou, en word deur Sam opgetrek, maar Gollum val en sterf; die Ring, wat saam met Gillum geval het, verbrokkel in die lawa. Mount Doom bars uit soos Sauron sy ondergang ontmoet, terwyl Aragorn se leër as oorwinnaars uit die stryd tree terwyl sy vyande vlug.

Gandalf red die hobbits met die hulp van arende, en die oorlewende Fellowship word gelukkig herenig in Minas Tirith. Aragorn word as koning van Gondor gekroon en trou met Arwen. Die Hobbits keer terug huis toe by die graafskap, waar Sam met Rosie Cotton trou. 'n Paar jaar later vertrek Frodo uit Middel-aarde na die onsterflike lande saam met sy oom Bilbo, Gandalf en die Elwe. Hy laat aan Sam die Rooi Boek van Westmarch agter, wat hul avonture uiteensit. Sam keer terug na die graafskap, waar hy Rosie en hul kinders omhels.

BronneWysig

  • Brian Sibley: Der Herr der Ringe, Wie der Film gemacht wurde. Klett-Cotta-Verlag, Stuttgart 2002, ISBN 3-608-93502-9.
  • Jane Johnson: John R. R. Tolkien: Der Herr der Ringe, Die Rückkehr des Königs, Das offizielle Begleitbuch. Klett-Cotta-Verlag, Stuttgart 2003, ISBN 3-608-93506-1.
  • J. R. R. Tolkien: Der Herr der Ringe. Die Rückkehr des Königs. Fotos aus Mittelerde. Klett-Cotta-Verlag, Stuttgart 2003, ISBN 3-608-93324-7.
  • Stefan Servos: Space View-Fantasy: Der Herr der Ringe. Ein Blick hinter die Kulissen von „Die Rückkehr des Königs“. Heel, Königswinter 2003, ISBN 3-89880-233-7.
  • Mark Achilles: Fantasy Fiction – die Suche nach dem wahren Menschsein bei „Harry Potter“ und „Der Herr der Ringe“. In: Thomas Bohrmann, Werner Veith, Stephan Zöller (Hrsg.): Handbuch Theologie und Populärer Film. Band 1. Ferdinand Schöningh, Paderborn 2007, ISBN 978-3-506-72963-7, S. 95–113.

VerwysingsWysig

  1. "Craig Parker interview by SF-Radio". Craig Parker.net. Geargiveer vanaf die oorspronklike op 14 Augustus 2006. Besoek op 6 November 2006.