Wellington, Nieu-Seeland

Hierdie artikel handel oor die hoofstad van Nieu-Seeland. Vir plekke elders met dieselfde naam, sien die dubbelsinnigheidsblad by Wellington.

Wellington (Engels: [ˈwɛlɪŋtən]; Māori: Te Whanganui-a-Tara, [tɛ ˈɸaŋanʉi a ˈtaɾa], of Pōneke, [ˈpɔːnɛkɛ], ) is die hoofstad van Nieu-Seeland en is die tweede grootste stedelike gebied in die eilandstaat asook die mees bevolkte nasionale hoofstad in Oseanië en die suidelikste ter wêreld. Die stad is geleë in die Wellington-streek aan die suidelike punt van die Noordeiland, naby die geografiese middelpunt van die land.

Wellington (Engels) Te Whanganui-a-Tara / Pōneke (Maori)
Besienswaardighede van Wellington
Byname: Windy Wellington, Wellywood
Leuse: Suprema a Situ ("Hoogste deur posisie")
Ligging
Kaart van Nieu-Seeland	Voorstede van Wellington
Vlag en wapen
Basiese gegewens
Stigting:	1839 (Europeërs)
Bevolking:	212 849 (Desember 2023)
Oppervlakte:	289,91 km²
Bevolkingsdigtheid:	734,2/km²
Gemiddelde inkomste:	NZ$51 008 miljard (Wellington-streek, 2024)
Per kapita:	NZ$92 776 (Wellington-streek, 2024)
Geografiese ligging:	41°17′S 174°46′O
Tydsone:	UTC +12 (NZST)
Somertyd:	UTC +13 (NZDT)
Amptelike webwerf:	wellington.govt.nz
Administratiewe verdeling
Land:	Nieu-Seeland
Eiland:	Noordeiland
Streek:	Wellington
Distrikte:	Wellington City Porirua Upper Hutt Lower Hutt
Burgemeester:	Tory Whanau (Groen)
Adjunkburgemeester:	Laurie Foon

Soos baie ander stede strek die gebied wat die stad in beslag neem verder as die grense van die plaaslike munisipaliteit. Groter Wellington of die Wellington-streek word gebruik om na die hele stedelike gebied te verwys, asook die landelike dele van die stad, die Kapiti-kus en verby die Rimutaka Range tot by Wairarapa.

Naam

Die stad Wellington is vernoem na Arthur Wellesley, die eerste Hertog van Wellington en die oorwinnaar in die Slag by Waterloo. Die hertog se titel is afkomstig van die dorp Wellington in die Engelse graafskap Somerset.

In die taal van die Maori's, die inheemse volk van Nieu-Seeland, het die stad drie name: Te Whanganui-a-Tara verwys na die hawe van Wellington en beteken "die groot hawe van Tara"; Pōneke is 'n transliterasie van "Port Nick" (kort vir "Port Nicholson") en Te Upoko-o-te-Ika-a-Māui (soms verkort na Te Upoko-o-te-Ika), wat beteken "die kop van die vis van Māui"). Die laaste naam is meer tradisioneel en verwys na die legende waarin die Noordeiland uitgevis is deur die halfgod Māui Tikitiki-a-Taranga.

Sport

Die Westpacstadion

Wellington beskik met Basin Reserve oor 'n belangrike toetskrieketstadion. Die Nieu-Seelandse nasionale krieketspan speel van sy tuiswedstryde in die stad. Basin Reserve het onder andere wedstryde tydens die Krieketwêreldbeker 1992 gehuisves, terwyl die Westpacstadion tydens die Krieketwêreldbeker 2015 gebruik is.

In rugby word Wellington tydens Superrugby deur die Hurricanes verteenwoordig wat sy tuiswedstryde op die Westpacstadion speel. Dié stadion is ook tydens die Rugbywêreldbeker 2011 gebruik, terwyl tydens die Rugbywêreldbeker 1987 wedstryde op Athletic Park aangebied is. In Wellington speel die All Blacks van hul tuiswedstryde op die Westpacstadion.

Eksterne skakels

• Wikimedia Commons het meer media in die kategorie Wellington.
• (en) (mi) Amptelike webwerf van Wellington se stadsraad

Ensiklopediese inligting

---

• (en) "Wellington". Encyclopædia Britannica. Besoek op 22 April 2025.
• (en) (mi) Chris Maclean (9 Julie 2007). "Wellington places". Te Ara: The Encyclopedia of New Zealand. Besoek op 22 April 2025.
• (en) (mi) Chris Maclean (9 Julie 2007). "Wellington region". Te Ara: The Encyclopedia of New Zealand. Besoek op 22 April 2025.

Toerisme

---

• (en) Toerisme-inligting oor Wellington op Wikivoyage
• (en) Amptelike toerismewebwerf