USS Enterprise (CV-6)

Yorktown-klas vliegdekskip

Die USS Enterprise (CV-6) was 'n Yorktown-klas vliegdekskip van die Amerikaanse Vloot wat tydens die Tweede Wêreldoorlog diens gedoen het. Dit was die sewende skip wat dié naam gekry het. Daar is na die skip verwys as "The Big E" en dit was die sesde vliegdekskip van die Amerikaanse Vloot. Die skip is in 1936 te water gelaat en is een van drie vliegdekskepe wat voor die Tweede Wêreldoorlog in diens gestel is en die oorlog oorleef het. Die ander twee is die USS Saratoga (CV-3) en USS Ranger (CV-4).

Lugfoto van die Enterprise. Puget Sound, 1945

Die Enterprise het aan meer aksie in die Stille Oseaan-oorlog deelgeneem as enige ander Amerikaanse skip. Dit sluit die aanval op Pearl Harbor in - 18 Douglas SBD Dauntless duikbomwerpers van die Enterprise Luggroep het gedurende die aanval oor die hawe gearriveer, sewe is afgeskiet met agt bemanningslede wat sterf en twee gewond. Dus is die Enterprise die enigste vliegdekskip met vliegtuie en mense gedurende die aanval en ook die eerste met ongevalle gedurende die Stille Oseaan-oorlog.[1]Die skip het ook deelgenaam aan die Slag van Midway, die Slag van Oostelike Solomons, die Slag van Santa Cruz-eilande, verskeie aanvalle en gevegte gedurende die Slag van Guadalcanal, die Slag van die Filippynse See en die Slag van Leytegolf.

Daar is twintig Battle Stars aan die skip toegeken, die meeste vir enige Amerikaanse oorlogskip uit die Tweede Wêreldoorlog; dit was ook die Amerikaanse skip wat in totaal die meeste toekennings gekry het. Die Enterprise was ook die eerste Amerikaanse skip wat 'n volwaardige vyandelike skip gesink het nadat oorlog in die Stille Oseaan verklaar is, toe hy die Japannese duikboot I-70 gekelder het op 10 Desember 1941.[2] Die Japannese owerhede het drie keer gedurende die oorlog aangekondig dat die Enterprise gekelder is; dit het haar die bynaam "The Grey Ghost" besorg. Teen einde van die oorlog het die Enterprise se kanonne en vliegtuie 921 vyandelike vliegtuie vernietig, 71 skepe gekelder en meer 192 ander skepe beskadig.[3]

Ten spyte van pogings van die publiek na die oorlog om die Enterprise as 'n museumskip te behou is hy uiteindelik opgebreek as skroot vanaf 1958 tot 1960.

Verwysings wysig

  1. "Enterprise Air Group, Report for Pearl Harbor Attack". Naval Historical Center. Geargiveer vanaf die oorspronklike op 25 September 2008. Besoek op 5 September 2008.
  2. "USS Enterprise (CV-6)". National Museum of the U.S. Navy, Photography Exhibits. Naval History and Heritage Command. Besoek op 9 November 2018.
  3. "Enterprise (CV-6) – The 'Big E'". Naval History and Heritage Command. Besoek op 15 November 2020.