Victoria van Swede
Victoria, kroonprinses van Swede, Hertogin van Västergötland (Victoria Ingrid Alice Désirée; gebore op 14 Julie 1977) is as die oudste kind van koning Carl XVI Gustaf die regmatige troonopvolger van Swede. As sy die troon bestyg, soos verwag word, sal sy Swede se vierde regerende koningin en die eerste sedert 1720 wees. Haar troonopvolging is verseker kragtens die wysiging van 1979 aan Swede se troonopvolgingswet. Dit is die eerste land in Europa wat koninklike absolute eersgeboortereg aangeneem het.
| Victoria | |
|---|---|
| Kroonprinses van Swede Hertogin van Västergötland | |
 Kroonprinses Victoria in 2018.
| |
| Huis | Bernadotte |
| Eggenoot | Daniel Westling |
| Kinders | Estelle Oscar |
| Vader | Koning Carl XVI Gustaf |
| Moeder | Silvia Sommerlath |
| Geboortenaam | Victoria Ingrid Alice Désirée |
| Gebore | 14 Julie 1977, Solna |
Verandering in status wysig
Victoria het op 1 Januarie 1980 die kroonprinses geword kragtens die 1979-wysiging aan die Troonopvolgingswet van 1810. Dit het koninklike absolute eersgeboortereg ingestel, wat beteken die oudste kind van 'n monarg sal hom of haar opvolg, ongeag die kind se geslag. Koning Carl XVI Gustaf het beswaar teen die wysiging aangeteken – nie omdat hy teen 'n vrou op die troon is nie, maar omdat sy seun se status as kroonprins sedert sy geboorte van hom weggeneem is.[1]
Toe Victoria die kroonprinses word, het sy ook die hertogin van Västergötland geword, een van Swede se historiese provinsies. Voor die wetswysiging was haar jonger broer, Carl Philip, die regmatige troonopvolger. Hy is nou die vierde aanspraakmaker, naas Victoria en haar twee kinders.
Openbare lewe wysig
Victoria se verklaring van meerderjarigheid het op 14 Julie 1995 in die koninklike paleis in Stockholm plaasgevind. Sy het op dié geleentheid haar eerste openbare toespraak gehou. Sy is sedertdien geregtig daarop om as staatshoof waar te neem wanneer die koning uit die land is.
.jpg)
As regmatige aanspraakmaker op die troon is Victoria 'n werkende lid van die Sweedse koningshuis, met haar eie agenda van amptelike verpligtinge. Sy het Swede al dikwels oorsee verteenwoordig. Haar eerste groot ampsbesoek alleen was in 2001 aan Japan, waar sy Sweedse toerisme, ontwerp, musiek, gastronomie en omgewingsvolhoubaarheid bevorder het. In dieselfde jaar het sy na die Amerikaanse Weskus gereis, waar sy deelgeneem het aan die viering van die honderdjarige bestaan van die Nobelprys.
In 2002-'04 het verskeie ander oorsese besoeke gevolg, onder meer aan Spanje, Uganda, Ethiopië, Saoedi-Arabië en Hongarye. Prinses Victoria het in Oktober 2004 haar eie koninklike huishouding gekry[2] om haar amptelike verpligtinge te help koördineer.
In Januarie 2005 het sy 'n lang besoek aan Australië gebring om Sweedse styl en sake te bevorder. Besoeke na Turkye, China, Brasilië en vele ander lande het gevolg.
Victoria is lid van die ereraad van die Internasionale Paralimpiese Komitee.[3] In 2012 het sy eers kraamverlof geneem die dag voor haar dogter, Estelle, se geboorte.[4] Haar seun, Oscar, is in 2016 gebore.[5] Sy en haar man, Daniel Westling, is op 19 Junie 2010 getroud.
Verwysings wysig
- ↑ Petersson, Claes (24 November 2003). "Kungen: Grundlagen är lustig" [The King: The Constitution is amusing]. Aftonbladet (in Sweeds). Besoek op 18 Junie 2010.
- ↑ "Her Royal Highness The Crown Princess's Household". Royal Court of Sweden. Geargiveer vanaf die oorspronklike op 17 Mei 2011. Besoek op 19 Junie 2010.
- ↑ "IPC Honorary Board". International Paralympic Committee. Geargiveer vanaf die oorspronklike op 28 Maart 2015. Besoek op 6 Oktober 2015.
- ↑ "Victoria does last official duty before birth". Sveriges Radio. Besoek op 12 Januarie 2015.
- ↑ Royal Court of Sweden (2 March 2016). "Kronprinsessan och Prins Daniel har fått en son" (in Sweeds). Persberig. Archived from the original on 4 Maart 2016. https://web.archive.org/web/20160304133024/http://www.kungahuset.se/kungafamiljen/aktuellahandelser/aktuellt/kronprinsessanvictoriaochprinsdanielharfattenson.5.274e83ca152f4410091f5d.html. Besoek op 3 March 2016.
Eksterne Skakels wysig
Wikimedia Commons het meer media in die kategorie Victoria van Swede.
Hierdie artikel is in sy geheel of gedeeltelik uit die Engelse Wikipedia vertaal.
