Vlag van Bonaire

Die vlag van Bonaire is op 11 Desember 1981 amptelik in gebruik geneem. Hierdie dag word ook “Dag van de Vlag” genoem. Dit beteken letterlik vlagdag en hierdie dag word gevier op ses voormalige eilande van die Koninkryk van die Nederlande wat aan die Nederlandse Antille behoort het. Dit is ’n vakansiedag waar daar baie amptelike seremonies is en die vlag vertoon word. Die vlag vertoon ’n geel driehoek in die skildhoek en ’n blou driehoek aan die wapperkant. Die twee driehoeke word geskei deur ’n breë wit diagonale baan waarin ’n rooi sespuntige ster binne ’n swart kompas is.

Vlag van Bonaire

Vlag van Bonaire
Gebruik	Burgerlike- en Staatsvlag
Verhouding	2:3
Goedgekeur	11 Desember 1981
Ontwerp	Die vlag vertoon 'n geel driehoek in die skildhoek en ’n blou driehoek aan die wapperkant. Die twee driehoeke word geskei deur ’n breë wit diagonale baan waarin ’n rooi sespuntige ster binne ’n swart kompas is.

Die Amerikaanse vlagdeskundige Whitney Smith het die riglyne tydens die ontwerp van die vlag gegee.

Simboliek

Die kompas stel die seelui en vissers van Bonaire voor. Die vier gelyksydige driehoeke wat die punte van die kompas uitmaak stel die gelykheid van alle mense uit die noorde, ooste, suide en weste voor. Die sespuntige rooi ster is opgebou uit twee gelyksydige driehoeke en verteenwoordig die oorspronkelijke ses dorpies op Bonaire (Playa, Kiniboko, Tera Korá, Antriol, Nort Saliña en Rincon). Die rooi kleur stel die bloed en oorlewingskrag van die Bonairese samelewing voor.

Die geel driehoek stel die son en die blommeprag van die eiland voor omdat die meeste inheemse Bonairese blomme geel van kleur is (soos die Kibrahacha, die Anglo en die kaktusblomme). Die wit stel vrede en internasionalisme voor. Die blou stel die see en die groot golwe voor. Die blou gedeelte is ook ’n herdenking aan die moedige Bonairese mense wat gesterf het tydens die Tweede Wêreldoorlog.

Eksterne skakels

• (en) Bonaire by Flags of the World.

Hierdie artikel is in sy geheel of gedeeltelik vanuit die Engelse Wikipedia vertaal.