Waterkloof-vier
Die sogenaamde Waterkloof-vier bestaan uit vier blanke mans wat vir die moord op 'n ongeïdentifiseerde hawelose man in Pretoria skuldig bevind en gevonnis is. Hulle is ook skuldig bevind op 'n aanklag van aanranding met die opset om ernstig te beseer. Die vier lede is: Christoff Becker, Frikkie du Preez, Gert van Schalkwyk en Reinach Tiedt. Drie van hulle was destyds leerders aan die Hoërskool Waterkloof, terwyl Becker aan die nabygeleë Hoërskool Garsfontein verbonde was.[1]
Skuldigbevinding
wysigIn 2004 het die vier (destydse) skoolseuns skuld ontken op 'n aanklag van moord op 'n onbekende man wat met ernstige beserings in 'n park in Moreletapark gevind is. Hulle ontken ook skuld op 'n aanklag van aanranding met die opset om ernstig te beseer nadat 'n ander hawelose man daardie selfde aand op 2 Desember 2001 aangerand is. Twee van die seuns was vyftien en die ander twee sestien toe die voorval plaasgevind het.[2][3]
In 2005 word hulle op albei aanklagte skuldig bevind. In 2007 is hulle elk tot 12 jaar tronkstraf gevonnis. Hulle het teen hul skuldigbevinding geappelleer, maar dit is in 2008 deur die Appèlhof van die hand gewys.[4]
Parool
wysigTiedt en Van Schalkwyk is in Desember 2011 vir agtien maande vrygelaat, maar hulle is weer in die gevangenis opgeneem nadat die departement van korrektiewe dienste suksesvol teen hul vroeë vrylating geappelleer het.[5]
Op 11 Februarie 2014 is al vier onder streng paroolvoorwaardes vrygelaat. Hulle het vyf en 'n half jaar van hul vonnis uitgedien en het vir 'n spesiale vonnisvermindering van ses maande in aanmerking gekom. Derhalwe het hulle ingevolge wetgewing die helfte van hul vonnis uitgedien en is vir parool (totdat dit in 2019 verstryk) in aanmerking gebring. Tiedt en Van Schalkwyk is uit die Zonderwater-gevangenis naby Cullinan vrygelaat en Becker en Du Preez uit die Kgosi Mampuru-gevangenis (Pretoria-Sentraal).
Vyf dae later, op 16 Februarie 2014 is Becker en Du Preez weer in hegtenis geneem vir die beweerde gebruik van alkohol en 'n partytjie wat hulle in die tronk op video vasgelê het.[6] Hulle parool is vervolgens teruggetrek, wat na 'n verdere jaar se gevangenisskap weer oorweeg sou word.[7] Beide is vir 'n verdere tien maande aangehou en in Desember 2014 vrygelaat op parool.[8]
Verwysings
wysig- ↑ My ‘Vlerkie’ nie geknak, Huisgenoot, 9 Februarie 2017
- ↑ Waterkloof-vier val van aksiehelde tot moordenaars, Rapport, 19 Junie 2005
- ↑ Logiese analise van die uitspraak van Magistraat Len Kotze in die saak van die Staat vs. Die Waterkloof-4 (Saak 14/2058/04)[dooie skakel], besoek op 12 Februarie 2014
- ↑ Were 4 Afrikaner kids convicted with the wrong corpse?, besoek op 12 Februarie 2014
- ↑ Waterkloof-vier vandag vrygelaat[dooie skakel], Beeld, 11 Februarie 2014
- ↑ Two of the Waterkloof 4 re-arrested Geargiveer 17 Februarie 2014 op Wayback Machine, besoek op 16 Februarie 2014
- ↑ Waterkloof 2 terug tronk toe na Beeld flink stemming maak Geargiveer 27 Maart 2014 op Wayback Machine, PRAAG, 28 Februarie 2014
- ↑ https://www.iol.co.za/news/becker-sues-minister-for-r25m-1827885 Becker sues minister for R2.5m, 6 Maart 2015, besoek op 13 Maart 2020
