Action Directe
Die Action Directe is 'n linkse terreur-organisasie in Frankryk, wat in die tydperk tussen 1979 en 1987 vir meer as vyftig aanslae verantwoordelik is, waarby onder meer die generaal René Audran en die bestuurder van die Franse motorvervaardiger Renault, George Besse, vermoor is.
Die Action Directe ontstaan in die laat sewentigerjare as 'n anti-kapitalistiese Marxisties-Leninistiese groepering, wat in die naam van die Franse werkersklas optree en moontlik ook kontakte onderhou met die Duitse RAF (Rote-Armee-Fraktion, soms ook Baader-Meinhof-bende genoem) en die Italiaanse Brigate Rosse (Rooi Brigades).
Toe die Duitse RAF die grootste deel van sy lede verloor het, sluit sy tweede generasie met die Action Directe saam, wat vir Duitse terroriste die geleentheid bied om in Frankryk te skuil.
In teenstelling met die Duitse regering is die Franse owerhede aanvanklik eerder terughoudend teenoor die aanslae van die Action Directe. Frankryk word in dié tydperk deur 'n Sosialisties-Kommunistiese koalisie geregeer wat net soos 'n groot aantal intellektueles nie daarvan oortuig is dat die linkse terrorisme enige bedreiging vir die staat inhou nie, en die Franse owerhede bied selfs asiel vir Italiaanse terroriste, wat destyds as politieke vlugtelinge beskou is.
Tydens 'n amnestie in die herfs van die jaar 1981 word 'n aantal anargistiese en linkse gevangenes vrygelaat, waaronder ook Jean-Marc Rouillan, een van Action Directe se aanvoerders.
Die houding teenoor Action Directe verander in die jare 1983 en 1984, toe aanslae van die groep die eerste menselewens eis. Ná die koelbloedige moorde op generaal Audran in Januarie 1985 en die Renault-bestuurder Besse in November 1986 reik die owerhede lasbriewe vir die inhegtenisneming van die aanvoerders - onder meer Jean-Marc Rouillan en Nathalie Ménigon - uit. Enkele maande later, op 21 Februarie 1987, is die leiers van die Action Directe - Rouillan, Ménigon, Régis Schleicher, Joëlle Aubron en Georges Cipriani op 'n plaas naby Orléans deur die polisie betrap.