Allan Gray Orbis-stigting

Die Allan Gray Orbis-stigting (Eng.: Allan Gray Orbis Foundation) is ’n Suid-Afrikaanse organisasie sonder winsoogmerk wat hom toespits op die ekonomiese en maatskaplike bevordering van Suid-Afrika deur die ontwikkeling van entrepreneurskap. Soortgelyke stigtings bestaan ook in Namibië, Botswana en Swaziland. Hierdie stigtings bied die Allan Gray-beurs- en genootgeleenthede, onder meer uitgebreide geldelike bystand aan jeug met entrepreneursbelofte in hul onderskeie lande.

Geskiedenis wysig

Die stigting is in 2005 gestig deur die filantroop en sakeman Allan Gray, wat entrepreneurskap beskou as ’n integrale deel van ekonomiese vooruitgang van ’n land. Dié beskouing spoor Gray se filantropiese bydraes al die afgelope 35 jaar aan. Die hoofdoelwit van die stigting is die ontwikkeling van entrepreneurs deur die Allan Gray-beurs en Allan Gray-genootskappe. Prof. Jakes Gerwel was tot sy dood in 2012 voorsitter van die stigting.[1]

Allan Gray Limited en Orbis Investment Management, albei deur Gray gestig, finansier die stigting se aktiwiteite. Minstens 7 persent van Allan Gray Limited se belasbare wins word aan die stigting geskenk. Voorts bied ’n bydrae van R1,15 miljard, wat Gray in sy persoonlike hoedanigheid in 2007 geskenk het, verdere finansiële sekuriteit aan die stigting in gevalle wanneer Allan Gray Limited se wins wisselvallig is.

Bedrywighede wysig

Gehalteonderwys vorm die grondslag van dit wat die stigting wil skep: verantwoordelike entrepreneurs wat ’n groot uitwerking op die samelewing kan hê. Dit word eerstens gedoen deur volle geldelike bystand te verleen aan uitgesoekte kandidate se sekondêre (deur beurse) en/of naskoolse studie (die genootskap). Terwyl die beurshouers en genote akademies ontwikkel, ontvang hulle ook entrepreneurs- en persoonlike ontwikkel as deel van die program. Die stigting wil beurshouers en kandidaatgenote se houding vorm sodat hulle soos entrepreneurs kan begin dink oor alle aspekte van hul lewe en nie net die sakewêreld nie. Hierdie entrepreneursingesteldheid wentel om vyf entrepreneurswaardes.

’n Kultuur van mentorskap word uit die staanspoor gevestig by alle begunstigdes van die stigting. Hulle word gementor deur sogenaamde programbeamptes asook eksterne mentors wat gewoonlik kundiges in hul bedryf is. Sodra kandidaatgenote aan hul universiteit afstudeer, word hulle aangemoedig om werkervaring op te doen. Van hierdie oomblik af staan hulle as Allan Gray-genote bekend.

Behalwe dat hulle nou bekendstaan as Allan Gray-genote, word afgestudeerdes ook lid van die Vereniging van Allan Gray-genote. Hierdie liggaam bemoei hom met hul entrepreneursontwikkeling en moedig ondernemings aan wat entrepreneursvaardighede verg. Voortgesette entrepreneursontwikkeling kan die vorm van nagraadse studie aanneem. Genote wat hul eie sakeonderneming wil begin, kan aansoek doen om finansiering by ’n trust wat spesiaal vir dié doel geskep is.

Vennote wysig

Die stigting sluit vennootskappe met etlike instellings om sy doelwitte te bereik. Die skoel en universiteite word gekies op grond van die uitstaande gehalte van hul onderrig en die vermoë om kandidaatgenote en genote van hoogstaande gehalte te lewer.

Skole vir plasing wysig

Allan Gray-skoliere word gestuur na een van die 17 skole in die Oos-Kaap, Gauteng, KwaZulu-Natal en die Wes-Kaap: Biskoppe, St. Cyprian’s, die Hoër Meisieskool Rustenburg, Hoër Seunskool Rondebosch, Hoër Meisieskool Collegiate, Hoërskool Grey, Michaelhouse, Maritzburg College, die Onafhanklike Hoërskool Epworth, Hoër Meisieskool Pietermaritzburg, Pretoria Boys’ High School, St Alban-kollege, King Edward VII School, St. Andrew-meisieskool en St. Mary-skool, Waverley.

Universiteite vir plasing wysig

Allan Gray se kandidaatgenote word in altesaam 10 universiteite in die Oos-Kaap, Vrystaat, Gauteng en die Wes-Kaap geplaas: die Universiteit van Kaapstad, Universiteit van Wes-Kaapland, Universiteit Stellenbosch, Tsiba, Universiteit van Johannesburg, Universiteit van Pretoria, Universiteit van die Witwatersrand, Nelson Mandela Metropolitaanse Universiteit, Rhodes-universiteit en die Universiteit van die Vrystaat.

Bronne wysig

Verwysings wysig

  1. (af) Besonderhede van Media24 se direksie Geargiveer 29 Oktober 2015 op Wayback Machine. URL besoek op 28 Oktober 2015.