Jakes Gerwel

Professor Jakes Gerwel (1946 – 2012) was 'n Suid-Afrikaanse akademikus, politikus en sakeman. Hy het as die direkteur-generaal van die Presidensie tydens Nelson Mandela se bewind gedien. In 1999 bemiddel hy die uitlewering van die verdagtes van die Lockerbie-bomaanval na Skotland. Na Mandela se presidentskap was hy die voorsitter van die Nelson Mandela Stigting en die Mandela Rhodes Stigting gewees. Gerwel was ook die voorsitter van die beleidskomitee vir die Krieket Wêreldbeker wat in 2003 in Suid-Afrika aangebied is. Hy het 'n aantal akademiese en besigheidsposisies beklee tot sy dood op 28 November 2012, onder andere as die voorsitter van Media24.

Jakes Gerwel
Gebore	Gert Johannes Gerwel 18 Januarie 1946 Somerset-Oos
Sterf	28 November 2012 (op 66) Kuilsrivier
Nasionaliteit	Suid-Afrika
Beroep	Akademikus, politikus en sakeman
Titel	Professor
Politieke party	ANC
Eggenoot	Phoebe Abrahams
Kinders	Jessie en Heinrich

Biografie

Gert Johannes Gerwel is op 18 Januarie 1946 op Somerset-Oos in die Oos-Kaap gebore en matrikuleer by die Paterson Hoërskool in Port Elizabeth.

In 1967 behaal hy 'n BA-graad van die Universiteit van Wes-Kaapland (UWK). Hy gee vir 'n kort rukkie lesings by die Hewat Onderwyskollege in Kaapstad waarna hy in 1971 'n beurs ontvang om aan die Universiteit van Brussel te studeer. Ná sy terugkeer na Suid-Afrika het Gerwel eers by die Grassy Park High School klas gegee, waarna hy as dosent by die UWK aangestel is.

Gerwel is in 1987 as die rektor en vise-kanselier van die Wes-Kaapse universiteit (UWK) aangestel waar hy tot 1994 werksaam was. Hy was ook sedert 1999 'n kanselier van die Rhodes-universiteit gewees.

Hy is op 28 November 2012 op 66-jarige ouderdom in die Netcare-hospitaal in Kuilsrivier oorlede. Hy was in 'n kritieke toestand nadat hy vroeër die maand 'n drievoudige hartomleidingsoperasie ondergaan het. Hy word oorleef deur sy vrou, Phoebe Abrahams, sy seun en dogter, Jessie en Heinrich, en vier kleinkinders.