Apriës

Apriës (Grieks: Ἁπρίης) is die naam waarby Herodotus en Diodorus Wahibre Haaibre genoem het; hy was van 589 tot 570 v.C. die vierde farao van die 26ste Dinastie van Antieke Egipte. Manetho het hom Waphres genoem en korrek aangeteken dat hy 19 jaar lank regeer het. Apriës word ook Gofra genoem in Jeremia 44:30.

Apriës
Wahibre Haaibre, Waphres, Gofra
’n Kopstuk van Apriës (Louvre).
Farao van die 26ste Dinastie
Periode	589–570 v.C.
Voorganger	Psamtik II
Opvolger	Amasis II
Vader	Psamtik II
Moeder	Tachoeit
Apriës in Egiptiese hiërogliewe
Serech of Horusnaam Nebty-naam Goue Horus-naam Praenomen of troonnaam Nomen of geboortenaam
Portaal    Antieke Egipte

Bewind

Apriës het die troon in Februarie 589 v.C. geërf van sy pa, Psamtik II, en het sy pa se geskiedenis van buitelandse inmenging in die sake van Palestina voortgesit. Hy het baie gebou en het aanbouings laat doen aan verskeie tempels.

Apriës se bewind was vol interne probleme. In 588 v.C. het hy ’n leër na Jerusalem gestuur om dit teen Babiloniese invalle deur Nebukadnesar II te beskerm. Sy leër is gou verslaan en Jerusalem is ná ’n beleg van 18 maande in óf 587 óf 586 v.C. deur die Babiloniërs verwoes. Ná nog ’n onsuksesvolle poging om in die politiek van Juda in te meng het soldate van die strategies belangrike Aswan-garnisoen gemuit.

Ook ’n poging om Libië teen Griekse invallers te beskerm het geboemerang toe sy soldate feitlik uitgewis is. Daarna het ’n burgeroorlog uitgebreek en die Egiptenare het hul steun toegesê aan ’n suksesvolle generaal, Amasis II. Amasis het homself in 570 v.C. tot farao verklaar en Apriës het na die buiteland gevlug. Toe hy die troon in 567 v.C. wou terugeis, is hy waarskynlik in ’n veldslag deur Amasis se soldate doodgemaak.

Eksterne skakels

• Wikimedia Commons het meer media in die kategorie Apriës.
• Hierdie artikel is vertaal uit die Engelse Wikipedia