Augusta Treverorum
Augusta Treverorum ("Die stad van Augustus in die land van die Treverers") is in 16 v.C. deur die Romeinse keiser gestig. Die kolonie teen die Moeselrivier is die historiese voorloper van die huidige Duitse stad Trier en was een van slegs drie Romeinse stede wat die naam van die keiser mog dra (die ander is Augsburg in die huidige Duitse deelstaat Beiere en Augst in die noorde van die huidige Switserland).
| Augusta Treverorum* | |
|---|---|
| Unesco-wêrelderfenisterrein | |
| |
| 'n Model van die keiserlike stad Augusta Treverorum in die 4de eeu, soos gesien vanuit die Porta Nigra | |
  Augusta Treverorum |
|
| Koördinate: 49°45′34.9″N 06°38′38.5″O / 49.759694°N 6.644028°OKoördinate: 49°45′34.9″N 06°38′38.5″O / 49.759694°N 6.644028°O | |
| Lande |  Duitsland
|
| Tipe | Kultureel |
| Kriteria | i, iii, iv, vi |
| Verwysings | 367 |
| Streek† | Europa |
| Inskripsiegeskiedenis | |
| Inskripsie | 1986 (10de Sessie) |
| * Naam soos dit in die Wêrelderfenislys verskyn. † Streek soos deur Unesco geklassifiseer. | |
Geskiedenis wysig
Die nedersetting was aanvanklik die hoofstad van 'n groep stamme, die Treverers, wat van Keltiese, Germaanse of gemengde herkoms was. In die omgewing van die stad het 'n aantal heiligdomme ontstaan soos die tempel van Lenus Mars, 'n plaaslike godheid, wat later geromaniseer is.
Die naam Augusta Treverorum is ter ere van die destydse keiser tydens sy verblyf in Gallië in die tyd tussen 15 en 13 v.C. aan die stad gegee. Danksy die strategiese ligging het Augusta Treverorum in die vroeë keisertyd vinnig tot een van die grootste en welvarendste stede in die noorde van die Romeinse Ryk gegroei.
In Augusta Treverorum het 'n aantal belangrike geboue ontstaan, soos byvoorbeeld die Romeinse baddens (omtrent 80), die amfiteater (omtrent 100) en die beroemde stadspoort Porta Nigra. Ook die privaathuise van plaaslike burgers getuig van die rykdom in hierdie tydperk.
In die 1ste en 2de eeu het Augusta Treverorum as administratiewe sentrum van Gallia Belgica (setel van die Procurator) en die twee Germaanse provinsies van die Romeinse Ryk gedien. In die laat 3de eeu was die stad selfs die keiserlike residensie in die weste van die ryk. Augusta Treverorum is veral deur die keisers Constantius en Konstantyn die Grote bevorder, wat onder meer die keiserlike basiliek (Aula Patina), die keiserlike baddens en 'n aantal kerke as deel van die nuwe paleis-distrik laat oprig het. Sedert 273 het die stad as die setel van 'n aartsbiskop gedien. As keiserlike residensie het Augusta Treverorum talle geleerdes gelok wat hier as onderwysers of beamptes werksaam was.
Die stad is in 275 deur Franke en Alemanne aangeval en verwoes en onder die heerskappy van keiser Constantius Chlorus heropgebou. Augusta Treverorum het daarna onder die heerskappy van keiser Diocletianus saam met Rome, Alexandrië en Konstantinopel een van die vier nuwe Romeinse prefekture geword. Dit het vervolgens tot een van die belangrikste stede in die Romeinse Ryk gegroei. In die tydperk tussen 293 en 395 was die stad een van die setels van die Romeinse keiser.
Met die verskuiwing van die Praefectura Galliarum, die belangrikste administratiewe owerheid in die Wes-Romeinse Ryk, na die Suid-Galliese Arles in 402 is Augusta Treverorum geleidelik ontruim. Die strategiese ligging het tydens die volksverhuising geblyk om 'n groot nadeel te wees. Die stad is verskeie kere deur Germane geplunder. In 475 het die Franke Augusta Treverorum ingeneem.
Romeinse argitektuur wysig
Die belangrikste Romeinse geboue, soos die Porta Nigra, die katedraal, die keiserlike baddens, die Barbarabaddens, die amfiteater, die Romeinse brug en die Konstantynse basilika is deur Unesco as 'n wêrelderfenisgebiede gelys.
Eksterne skakels wysig
Wikimedia Commons het meer media in die kategorie Augusta Treverorum.- (de) Die Romeinse Trier
- (de) Augusta Treverorum: Roma Secunda – "Die Tweede Rome"
