Bok van Blerk
Bok van Blerk (gebore Louis Andries Pepler op 30 Maart 1978) is 'n Afrikaanse musikant en akteur wat in 2006 bekendheid verwerf het met die liedjie "De la Rey" geskryf deur Sean Else en Johan Vorster.[1]
Bok van Blerk | |
|---|---|
| Geboortenaam | Louis Andreas Pepler |
| Gebore | 30 Maart 1978 Boschkop, Suid-Afrika |
| Beroep(e) | Sanger |
| Instrumente | Stem |
| Jare aktief | 2006 – nou |
| Etikette | Mozi-rekords |
| Webwerf | bokvanblerk.co.za |
Uitbeelding
wysigPepler het in Pretoria op Laerskool Menlopark skoolgegaan en aan die Hoërskool Die Wilgers gematrikuleer.[2]
Loopbaan
wysigNadat hy konstruksiebestuur studeer het, het hy 'n tyd lank in die buiteland gewerk.[1]
In Maart 2006 kom die album "Jy praat nog steeds my taal" deur Bok van Blerk en die Mossies uit. Dieselfde album word in Oktober 2006 weer uitgereik, hierdie keer onder die naam De La Rey, en met die kunstenaar nou slegs as Bok van Blerk aangegee. Volgens Pepler is die Mossies verwyder aangesien sy medesanger, Tanya van Graan, te besig was met modelwerk. Pepler word begelei deur Jaco Mans (asook somtyds Manie van Niekerk) op hoofkitaar, Francois Coetzee op bas-kitaar en Natan Smit as tromspeler.[1]
Op 6 Februarie 2007 het die Suid-Afrikaanse departement van kuns en kultuur 'n verklaring oor die liedjie De la Rey uitgereik. Die stap het gevolg op omstredenheid wat ontstaan het rondom die liedjie as gevolg van die gewildheid daarvan in regse kringe waar dit geïnterpreteer word as 'n oproep tot gewapende stryd. By van Bok van Blerk se konserte het van die toeskouers ook die ou Suid-Afrikaanse vlag en die Vierkleur rondgeswaai. In 'n Huisgenoot-artikel het die tydskrif minister Pallo Jordan gevra om kommentaar te lewer op die liedjie en die boodskap wat daarin gelees word. In die verklaring spreek die ministerie sy kommer uit dat die liedjie deur regse elemente gekaap kan word, maar hy wens die sanger nietemin voorspoed toe met die liedjie. Die minister verklaar ook dat hy nie 'n probleem het met protes of die mobilisering van opposisie nie, solank dit binne die raamwerk van die wet plaasvind.[3][2]
Pepler self sê dat hy nie hom nie vereenselwig met die ou landsvlag nie en dat hy nie daarmee geassosieer wil word nie. Hy beywer hom egter wel vir Afrikaans en het byvoorbeeld geweier om deel te neem aan die radiostasie 94.7 Highveld se musiekkonsert as gevolg van die radiostasie se beleid om geen Afrikaanse musiek te speel nie.[4] Hy maak dit ook duidelik dat hy nie met die Boeremag saamstem nie en dat hy nie glo dat geweld 'n oplossing vir Afrikaners se probleme is nie en wys daarop dat generaal De la Rey ten gunste van vrede was.[2] Koos Kombuis wys ook daarop dat Bok van Blerk se rugby-liedjie oor die bruin rugbyspeler, Bryan Habana, handel.[5]
Op 19 Februarie het Bok van Blerk die prys vir beste video gewen vir die De La Rey-video in die eerste MK-toekennings.[6]
Tydens die 2010 SAMA-toekennings is Bok van Blerk se album Afrikanerhart bekroon as die beste verkoper vir 2009.
Diskografie
wysig- De la Rey (Jy praat nog steeds my taal) (2006)
- Ons vir jou Suid-Afrika (2008)
- Afrikanerhart (2009)
- My kreet (2010)
- Sing Afrikaner Sing (2015)
- Van De La Rey Tot Nou (2016)
- Hoor ons! (2019)[7]
Filmografie
wysig- Platteland, 2011 as Dirk Pretorius
- As jy sing, 2013 as Sersant-Majoor Fourie
- Vrou Soek Boer, 2014 as Stander de Waal
- Leading Lady, 2014 as Kobus Willemse
- Somer Son, 2015 as Richie
- Modder en Bloed, 2016 as Kommandant Scheepers
- Sew the Winter to My Skin, 2018 as Simon
Verwysings
wysig- ↑ 1,0 1,1 1,2 ,Tanya de Vente (Vrouekeur) "Bok van Blerk, 'n bok vir sports Geargiveer 29 September 2007 op Wayback Machine, besoek op 23 Februarie 2007
- ↑ 2,0 2,1 2,2 Rapport, Hanlie Retief gesels met Bok van Blerk Geargiveer 19 Mei 2007 op Wayback Machine, besoek op 23 Februarie 2005
- ↑ DKK, Ministry of Arts & Culture on Bok Van Blerks’s Supposed Afrikaans “Struggle Song,” De La Rey and Its Coded Message to Fermenting Revolutionary Sentiments. Geargiveer 1 April 2007 op Wayback Machine, besoek op 23 Februarie 2007
- ↑ Die BurgerBok sê aikôna vir ou landsvlag én 94.7, besoek op 23 Februarie 2007
- ↑ Litnet Bok van Blerk en die bagasie van veertig jaar Geargiveer 18 April 2008 op Wayback Machine, besoek op 23 Februarie 2007
- ↑ MK89 DIE MK AWARDS – AL DIE WENNERS Geargiveer 28 Februarie 2007 op Wayback Machine. Besoek op 23 Februarie 2007
- ↑ Mariné Lourens (22 Augustus 2019). "Luister: Bok van Blerk – 'As ek Afrikaans sing, gaan mense my hoor'". Maroela Media. Geargiveer vanaf die oorspronklike op 12 Januarie 2020. Besoek op 22 Augustus 2019.
Sien ook
wysigEksterne skakels
wysig- Amptelike webwerf
- Bok van Blerk in die Internet-rolprentdatabasis
- De la Rey musiekvideo van MK89 op YouTube
- Video opname van Onderhoud met Bok van Blerk oor 'De la Rey' Geargiveer 1 Oktober 2007 op Wayback Machine op Beeld webwerf
- Litnet artikel oor Afrikaanse protesmusiek Geargiveer 17 Julie 2011 op Wayback Machine