Bryan Habana

Bryan Habana
	Habana in ligte luim tydens 'n toer
Volle naam	Bryan Gary Habana
Bynaam	Mister Kardinaal, Habernero, Dash
Geboortedatum	12 Junie 1983 (41 jaar oud)
Geboorteplek	Benoni, Suid-Afrika
Lengte	1,80 m
Massa	94 kg
Skool	King Edward VII Skool
Universiteit	Randse Afrikaanse Universiteit
Beroep	Professionele Rugbyspeler
Rugbyloopbaan
Huidige status
Posisie	Linkervleuel
Huidige span	Toulon
Loopbaan as speler
Posisie(s)	Vleuel, senter
Springbokno.	766
Professionele / senior klubs
korrek soos op 30 September 2017.
Provinsiale- / Staatspanne
korrek soos op 30 September 2018.
Superrugby/Verenigde Rugbykampioenskap
korrek soos op 30 September 2018.
Nasionale span(ne)
korrek soos op 30 September 2018.
Nasionale Sewesspan

Bryan Gary Habana OIS (gebore 12 Junie 1983^[1] in Benoni) is 'n Springbokrugbyspeler wat tot in 2013 vleuel vir die Westelike Provinsie en Stormers gespeel het. Hy het vroeër ook vir die Blou Bulle in die Curriebeker en die Bulls in Super 14 gespeel asook buitesenter en skrumskakel in provinsiale rugby. Hy is reeds voor hy Superrugby begin speel het as Springbok gekies en het die eerste keer toe hy aan die bal geraak het 'n drie gedruk in 'n toets teen Engeland op Twickenham-stadion in 2004.

Habana se spoed is legendaries. Destydse toetse het bevestig dat hy die vinnigste vleuel in Suid-Afrikaanse rugby was, soos talle kere ook in wedstryde bewys is. Habana het ook aansienlike boliggaamsterkte vir 'n vleuel, en kan 160 kg opstoot op 'n bankdruk. Verder was hy 'n effektiewe verdediger waar hy spelers in die oopveld agterna gesit het.

Habana het internasionale erkenning gekry vir sy kampioenskapswendrie in die 2007 Super 14-eindstryd.^[3] Hy hou die rekord vir die meeste drieë gedruk deur 'n Springbok: 67. Op 24 April 2018 het Habana sy uittrede uit rugby met die einde van die Franse Top 14-klub Toulon se seisoen in 2018 aangekondig.^[4]

Loopbaan

Habana het sy rugbyloopbaan begin tydens sy hoërskoolopleiding by King Edward VII School, wat gevolg is deur die Randse Afrikaanse Universiteit en provinsiale rugby vir die Goue Leeus. Hy het vir die eerste keer internasionaal gespeel in die sewes-vorm van die spel toe hy vir die Springboksewesspan gekies is in die 2003–04 Wêreldsewesreeks. Hy het sy Curriebekerdebuut vir die Leeus gemaak in 2004. Hy is op grond van sy vertoning vir die Leeus gekies as die mees belowende speler in daardie jaar. In November het hy sy toetsdebuut gemaak teen Engeland op Twickenham op 21-jarige ouderdom. Hoewel die Springbokke die wedstryd 32–16 verloor het, het Habana wat as plaasvervanger op die veld gedraf het, 'n drie gedruk toe die bal die eerste keer na hom aangegee is. Die volgende week is Habana na die beginspan geskuif, waar hy twee drieë gedruk het om die 45–10 oorwinning oor Skotland by Murrayfield te help beklink. Die week daarna het hy weer in dieselfde posisie gespeel, op linkervleuel, in daardie jaar se finale toets teen Argentinië in Buenos Aires. Alhoewel hy nie 'n drie in die wedstryd gedruk het nie, was sy rekord nou drie drieë in drie toetse.

2005

In 2005 het Habana na die Blou Bulle en Bulls verskuif. Na die 2005 Super 12-seisoen is Habana, soos verwag is, in die 2005 Springbokspan ingesluit. Hy het linkervleuel gespeel in Suid-Afrika se openingswedstryd in 2005 teen Uruguay, wat die Springbokke maklik gewen het met 134 punte teen drie, danksy twee drieë deur Habana. Suid-Afrika was daarna gasheer vir Frankryk in 'n mini-toetsreeks van twee kragmetings. Die eerste wedstryd het gelykop geëindig, 30-elk, en die tweede een het die Springbokke 27–13 gewen. Habana het in albei wedstryde twee drieë gedruk. In die aanloop tot die 2005 Drienasies, het Habana in twee toetse teen Australië, die eerste, 'n nederlaag op die Telstra-stadion, en die tweede, 'n 33–20 oorwinning op Ellispark, gespeel. Habana het 'n drie gedruk in die tweede toets.

Habana het sy Drienasiesdebuut op 30 Julie teen die Wallabies gemaak op die Bulls se tuisveld, Loftus Versfeld in Pretoria. Suid-Afrika het die wedstryd 22–16 gewen. Die volgende wedstryd teen die All Blacks op Nuweland is ook deur Suid-Afrika gewen. In die tweede toets teen Australië in Perth het Habana twee drieë gedruk in die Springbokke se 22–19 oorwinning. Die All Blacks het die laaste wedstryd van die reeks ook gewen, 31–27 in Carisbrook. Hoewel Suid-Afrika nie die reeks gewen het nie, het Habana uitgeblink as 'n krag in die internasionale rugbyarena. Hy het die reeks voltooi met die prestasie dat hy saam met Doug Howlett en Joe Rokocoko die meeste drieë gedruk het. In die Curriebeker het die Blou Bulle die eindstryd gehaal wat tuis op Loftus Versfeld teen die Vrystaat Cheetahs gespeel is. Die Cheetahs het die eindstryd gewen. In November 2005 het Habana vir die Springbokke teen Argentinië, Wallis en Frankryk gespeel en twee drieë teen Wallis gedruk.

2007

Habana lê oop na die doellyn in die wedstryd teen Samoa tydens die Rugbywêreldbeker 2007

In April 2007 het Habana teen 'n jagluiperd gehardloop in 'n 100 meter-resies om bewustheid te wek oor die dringende gevaar waaronder die jagluipend verkeer om as bedreigde spesie geklassifiseer te word.^[5]

Habana se mees dramatiese aksie in die 2007 Super 14-seisoen was sy laaste-minuut-drie in die eindstryd wat dit vir Derick Hougaard moontlik gemaak het om 'n maklike doelskop waar te neem om die Bulls 'n dramatiese 20–19 oorwinning oor die Sharks te besorg.

Habana is gekies as vleuel vir die Springbokke se Rugbywêreldbeker 2007-span. In die Springbokke se eerste wedstryd teen Samoa het hy vier drieë aangeteken in die 59–7 oorwinning in Parys. Met 'n totaal van agt drieë na die halfeindstryd oorwinning oor Argentinië was Habana die voorste driedrukker van die Rugbywêreldbeker 2007.

2010–2013

Van 2010 tot 2013 speel Habana vir die Stormers in Superrugby en provinsiaal vir die Westelike Provinsie.

Rugbywêreldbeker 2011

Habana speel op linkervleuel in die Springbokke se Rugbywêreldbeker 2011-span in Nieu-Seeland. Die Springbokke wen hul eerste wedstryd teen Wallis 17–16 met drieë deur Steyn en Hougaard. Hulle oorrompel Fiji en Namibië; maar wen net-net 13–5 teen Samoa met Habana wat 'n drie gedruk het in die negende minuut. Suid-Afrika word ongelukkig daarna deur Australië met 11–9 in die kwarteind uitgeskakel.

2012

Habana speel internasionaal in twee toetse teen Engeland in Junie 2012 en ses toetse (tot op 6 Oktober 2012) in die Rugbykampioenskap teen Argentinië, Australië en Nieu-Seeland. Hy behaal 'n driekuns drieë teen Australië op Loftus Versfeld op 29 September 2012.

2013

Habana speel in al drie die Springbokke se wentoetse teen Italië, Skotland en Samoa in Junie 2013, die Rugbykampioenskaptoetse teen Argentinië, Australië en Nieu-Seeland, asook die jaareindtoetse teen Engeland, Wallis en Frankryk.

2014

Habana speel in al die Springbokke se toetse teen Wallis, Skotland en die Rugbykampioenskaptoetse teen Argentinië, Australië en Nieu-Seeland.

2015

Habana speel in al die Springbokke se toetse in die Rugbykampioenskap. Hy is ook linkervleuel in die Springbokke se Rugbywêreldbeker 2015-span in Engeland. Die Springbokke verloor hul eerste wedstryd teen Japan 32–34, maar wen die volgende Saterdag 46–6 teen Samoa met Habana wat 'n drie gedruk het in die 82ste minuut.

2015-2018

Gedurende die 2016-2017 seisoen het hy deelgeneem aan die sewe wedstryde wat sy klub in die Europese beker gespeel het, met twee drieë gedruk, in 'n tuisnederlaag teen Saracens en aan die oorwinning, steeds tuis, teen Sale . Die Toulonnais het in die kwarteindronde teen Clermont verloor. In die Top 14 het hy twaalf wedstryde gespeel, waaronder elf as voorgereg, met 30 punte. Hy skryf sy laaste wedstryd van die seisoen op 15 April 2017 aan met 'n oorwinning met 23-14 teen. Gedurende Julie het hy 'n knie gehad, en hy oefen saam met die groep spelers, maar speel nie 'n wedstryd nie, ondanks sy begeerte om weer te speel met sy landgenoot P Pietersen het in die buiteseisoen by die klub aangekom. Bryan Habana kondig op 24 April 2018 aan dat hy sy loopbaan aan die einde van die 2017-2018 seisoen beëindig.

Verwysings

↑ ^1,0 ^1,1 "bryanhabana.com: About" (in Engels). Geargiveer vanaf die oorspronklike op 10 Oktober 2007. Besoek op 6 Desember 2006.
↑ "Bryan Habana: SA Rugby Profile". SA Rugby (in Engels). Geargiveer vanaf die oorspronklike op 17 Januarie 2008. Besoek op 18 April 2007.
↑ Guinness, Rupert: "Bulls say better team lost." Geargiveer 7 Augustus 2007 op Wayback Machine Sydney Morning Herald/Rugby Heaven (Maandag, 21 Mei 2007).
↑ (en) "'One of the greatest': Springboks record tryscorer Bryan Habana retires from rugby". 25 April 2018. Besoek op 23 Mei 2018.
↑ Man Races World's Fastest Cat. CNN.com, 16 April 2007.

Eksterne skakels

Bryan Habana by SARugby.co.za
Bryan Habana by www.genslin.us/bokke
Habana se profiel op itsrugby.co.uk
We love rugby Meer detail oor Habana

[bryanhabana.com-1] 1,0 ^1,1 "bryanhabana.com: About" (in Engels). Geargiveer vanaf die oorspronklike op 10 Oktober 2007. Besoek op 6 Desember 2006.

[SARugbyprofile-2] "Bryan Habana: SA Rugby Profile". SA Rugby (in Engels). Geargiveer vanaf die oorspronklike op 17 Januarie 2008. Besoek op 18 April 2007.

[3] Guinness, Rupert: "Bulls say better team lost." Geargiveer 7 Augustus 2007 op Wayback Machine Sydney Morning Herald/Rugby Heaven (Maandag, 21 Mei 2007).

[4] (en) "'One of the greatest': Springboks record tryscorer Bryan Habana retires from rugby". 25 April 2018. Besoek op 23 Mei 2018.

[5] Man Races World's Fastest Cat. CNN.com, 16 April 2007.

[1]

[2]

[3]

[4]

[5]