Maak hoofkeuseskerm oop

Argentynse nasionale rugbyspan

Die Argentynse nasionale rugbyspan is ’n sportspan wat Argentinië in internasionale rugby verteenwoordig. Die span wat in hemelblou en wit truie speel, dra die bynaam los Pumas (Spaans vir: "die Poemas").

Argentinië
Argentynse Rugbyunie.svg
Unie Argentynse Rugbyunie
Bynaam(e) Los Pumas
Embleem Jaguar
Stadion José Amalfitani-stadion, Buenos Aires
Kapasiteit 49 540
President Marcelo Rodríguez
Afrigter(s) Vlag van Argentinië Mario Ledesma
Kaptein(s) Pablo Matera
Spankleure


Alt. kleure

Statistiek
Meeste toetse Agustín Creevy (89)[1][2][3][4]
Meeste toetspunte Nicolás Sánchez (748)[5][6][7][8]
Meeste drieë José María Núñez Piossek (29)[9]
Eerste internasionale wedstryd
Vlag van Argentinië Argentinië 3–28 Britse Leeus Vlag van Verenigde Koninkryk
(Buenos Aires, Argentinië; 12 Junie 1910)
Grootste oorwinning
Vlag van Paraguay Paraguay 0–152 Argentinië Vlag van Argentinië
(Mendoza, Argentinië; 1 Mei 2002)
Grootste nederlaag
Vlag van Nieu-Seeland Nieu-Seeland 93–8 Argentinië Vlag van Argentinië
(Wellington, Nieu-Seeland; 21 Junie 1997)
Wêreldbeker
Verskynings 9/9 (Eerste in 1987)
Beste uitslag Derde in 2007
Amptelike webwerf
www.lospumas.com.ar
Unie webwerf
www.uar.com.ar

Rugby word in Argentinië deur die Argentynse Rugbyunie (UAR, van Spaans: Unión Argentina de Rugby) geadministreer. Die Argentynse rugbyspan is tans (13 Desember 2019) tiende op Wêreldrugby se wêreldranglys gelys[10] en tans die top rugbyspan in die Amerikas. Argentinië is onoorwonne ten opsigte van al die ander nasionale rugbyspanne van dié vasteland; met uitsondering van Kanada, teen wie Argentinië drie wedstryde verloor het. Argentinië speel sedert 2012 jaarliks teen die All Blacks van Nieu-Seeland, die Springbokke van Suid-Afrika en die Wallabies van Australië in die Rugbykampioenskap (voorheen die Drienasiesreeks).

Argentinië se eerste internasionale rugbywedstryd was in 1910 teen ’n besoekende Britse Eilande-span. Dié land word vandag as een van die wêreld se voorste rugbynasies beskou en het sover aan elke rugbywêreldbekertoernooi wat sedert 1987 gehou is, deelgeneem, en hul beste prestasie met die derde plek tydens die Rugbywêreldbeker in 2007 behaal. ’n Verrassende oorwinning oor die gasheer Frankryk het Argentinië na die vierde plek op die wêreldranglys geneem.[10] Die span was onoorwonne in hul poelfase en kon vir die eerste keer tot die halfeindrondte vorder, nadat hulle Skotland 19–13 in die kwarteindstryd geklop het. Argentinië is egter deur die latere wêreldkampioen Suid-Afrika 37–13 in die halfeindstryd verslaan, maar Argentinië kon hul verrassing van die poelfase herhaal deur Frankryk ’n tweede keer te klop en het die derde plek behaal. Ná afloop van die toernooi het die span met die derde plek hul beste posisie op die wêreldranglys behaal.[10]

Hul vooruitgang in mededingendheid en prestasie gedurende die 2000’s, gepaard met hul ligging in die Suidelike Halfrond het van Argentinië die enigste Vlak 1-span sonder ’n gereelde toernooi gemaak; so het onder andere die voormalige Poemas se kaptein, Agustín Pichot,[11] al gepleit dat Argentinië by die Sesnasies-toernooi sal moet aansluit. Argentinië het tydens ’n sessie op 23 November 2011 in Buenos Aires amptelik by die Rugbykampioenskap aangesluit.[12] Tydens hul eerste toernooi in 2012 kon Argentinië daarin slaag om Suid-Afrika ’n gelykopuitslag van 16–16 in hul tweede wedstryd af te dwing.

In die 2014-Rugbykampioenskapreeks het Argentinië hul eerste oorwinning behaal, nadat hulle Australië met 21–17 geklop het.[13] 2015 was ’n baie suksesvolle jaar vir Argentynse rugby, nadat hulle tydens die 2015-Rugbykampioenskapreeks hul eerste oorwinning oor Suid-Afrika (37–25 in Durban) behaal het en tydens die Rugbywêreldbeker 2015 vir ’n tweede keer tot die halfeindrondte kon vorder. Tydens die 2016-Rugbykampioenskapreeks het die Poemas hul eerste wedstryd teen die Springbokke verloor en die tweede een met 26–24 op 27 Augustus 2016 in Salta gewen. Nadat hulle tydens die 2017-Rugbykampioenskapreeks nie ’n oorwinning kon aanteken nie, het die Poemas twee oorwinnings tydens die 2018-Rugbykampioenskapreeks behaal, deur beide Suid-Afrika en Australië in een kalenderjaar te klop. 2019 het die Poemas egter nie so goed gevaar nie, nadat hulle tydens die verkorte 2019-Rugbykampioenskapreeks nie ’n oorwinning kon aanteken nie en later tydens die Rugbywêreldbeker 2019 reeds in die poelfase uitgeskakel is.

Alhoewel rugby in Argentinië nie die gewildheid van sokker kan ewenaar nie, het die indrukwekkende resultate deur die Poemas sedert die Rugbywêreldbeker 1999 tot eksponensiële groei gelei in ’n tydperk waarin Argentinië onder moeilike ekonomiese omstandighede gebuk gegaan het. Argentinië het sedert sy verskyning op die internasionale toneel al vir verskeie verrassingsoorwinnings gesorg en is veral ’n gedugte teenstander wanneer die span tuis in Buenos Aires speel. Hul tuisstadion is die José Amalfitani-stadion. Argentinië is gereeld in staat om spanne van die Sesnasies-toernooi te klop. Die Poemas se huidige kaptein is Pablo Matera en die huidige hoofafrigter is Mario Ledesma.

GeskiedenisWysig

BeginjareWysig

 
R. Cooper, voormalige kaptein in 1928
 
Die eerste Argentynse nasionale rugbyspan voor hul wedstryd teen die Britse Leeus in 1910

Die eerste rugbywedstryd in Argentinië is in 1873 gespeel nadat die spel na Argentinië ingevoer is deur Britse immigrante. In 1899 het vier klubs in Argentinië se hoofstad Buenos Aires bymekaargekom om die Río de la Plata-Rugbyvoetbalunie te vorm.

In 1910 het ’n span wat deur die Universiteit van Oxford bestuur is — wat as ’n Engelse nasionale span beskou is, alhoewel dit drie Skotse spelers ingesluit het — Argentinië besoek: die Argentyne het die span die "Gekombineerde Britte", ook bekend as ’n "Groot-Brittanje XV", genoem. Argentinië se internasionale debuut was teen die span waarteen dit op 12 Julie met 3–28 in Buenos Aires verloor het.

In 1927 het die Britse en Ierse Leeus na Argentinië gereis op ’n toer waarin die Leeus al nege wedstryde gewen het; die toer was egter finansieël suksesvol vir Argentynse rugby. Die nege wedstryde het vier toetse ingesluit wat Argentinië met altesaam meer as 30 punte verloor het. Al die wedstryde het in Buenos Aires plaasgevind.

Vyf jaar het verloop voordat nog ’n internasionale span Argentinië kom besoek het, naamlik Suid-Afrika se Junior Bokke in 1932 wat ’n tweewedstrydreeks gespeel het. Argentinië het albei toetse verloor.

In 1936 het die Britse Eilande Argentinië weer besoek en al tien hulle wedstryde gewen en slegs nege punte op die hele toer afgestaan. Slegs een toets is op die toer gespeel wat Argentinië met 0–23 verloor het. Die volgende maand het die Argentynse span die land verlaat om hulle eerste toetse in ’n ander land te speel – teen Chili in Valparaiso. Argentinië het die eerste toets met 29–0 gewen. Die tweede toets is met ’n soortgelyke telling gewen. Twee jaar later het Argentinië as gasheer vir Chili opgetree wat gelei het tot ’n 30 punte oorwinning vir Argentinië.

Naoorlogse tydperkWysig

 
Die Argentynse span wat die eerste Suid-Amerikaanse kampioenskap in 1951 kon wen
 
Wedstryd tussen Argentinië en Frankryk se rugbyspanne in 1954, voorblad van El grafico

In die laat 1940’s het ’n gekombineerde Oxford & Cambridge-span Argentinië besoek. Die Argentynse span het beide wedstryde teen die Engelse span verloor. In 1949 het die belangrikste rugbynasie tot op daardie stadium die land besoek, Frankryk. Hoewel Argentinië weer beide toetse verloor het, was die tellings in albei gevalle baie naby aan mekaar.

Om die 1951-Pan-Amerikaanse Spele te herdenk, het Argentinië die eerste Suid-Amerikaanse toernooi in Buenos Aires met Chili, Uruguay en Brasilië as deelnemers gereël. Argentinië het die eerste toernooi oorheers en slegs Chili was ’n uitdaging. Die Argentyne het egter wel 13–3 met Chili afgereken en Uruguay 62–0 en Brasilië 72–0 pak slae gegee om hulle leierskap in Suid-Amerikaanse rugby te bewys.

In 1952 het Argentinië ’n reeks teen ’n nie-toets Ierse XV in Buenos Aires gespeel. Argentinië het die eerste wedstryd met ses punte verloor maar in die tweede wedstryd daarin geslaag om ’n 3–3 gelykopuitslag te bewerkstellig. Dit was die eerste keer dat Argentinië ’n nederlaag teen ’n beduidende Europese span kon verhoed en dit is soos ’n oorwinning gevier.

Weens die Ierse toer kon die UAR nie bekostig om die jaar daarna gasheer vir ’n besoekende Oxford & Cambridge-span te wees nie. In 1954 het Frankryk die land weer besoek. Soos in 1949 was Frankryk te sterk vir die Argentyne en het hulle 22–8 en 30–3 teen die Hane verloor.

In 1956 is Argentinië weer deur ’n Oxford & Cambridge-span besoek waarteen hulle 25–6 en 11–3 verloor het. Dit is gevolg deur ’n 4–0 oorwinning oor Peru en ’n 50–3 oorwinning oor Uruguay.

By die tweede Suid-Amerikaanse toernooi in 1958 het Argentinië 50–3 met Uruguay en 44–0 met Peru afgereken. Ten spyte van drinkery voor die wedstryd teen die gasheernasie Chili het Argentinië met die louere weggestap in ’n 14–0-oorwinning in Santiago de Chile.

In 1959 het die Junior Springbokke na Buenos Aires teruggekeer in ’n reeks waarin hulle beide wedstryde teen die nasionale span gewen het: 6–14 en 6–20.

Sestigs, sewentigs en tagtigsWysig

 
Die Argentynse span wat in 1965 na Rhodesië en Suid-Afrika getoer het
 
Die voorry van 1970: García Yáñez, Handley en Foster
 
Marcelo Pascual se drie teen die Junior Springbokke in 1965
 
Die voormalige speler Angel Guastella was die afrigter van Argentinië gedurende die 1965-toer
 
Die Poemas wat in 1979 Australië tuis in Buenos Aires kon klop

In 1960 het Frankryk Buenos Aires besoek vir ’n driewedstrydreeks teen Argentinië. Die gashere kon steeds nie daarin slaag om hulle eerste oorwinning oor die Franse te behaal nie met Frankryk wat al drie wedstryde gewen het: 37–3, 12-3 en 29–6.

Die jaar daarna het Argentinië weer hulle oorheersing in die kontinent tentoongestel deur die Suid-Amerikaanse toernooi wat in Montevideo gehou is te wen met oorwinnings teen Brasilië (60–0), Uruguay (36–3) en Chili (11–3).

In 1964 is ’n nuwe weergawe van die Suid-Amerikaanse toernooi in San Pablo gehou wat weereens deur Argentinië gewen is met oorwinnings teen Uruguay (25–6), Brasilië (30–5) en Chili (30–8).

In die laat 1960’s het die vier Britse Tuisunies begin om toere na Argentinië te onderneem. Nadat Wallis in beide toetse in Buenos Aires in 1967 gesukkel het, was dit duidelik dat dit moeilik sou wees om ’n toetsreeks in Argentinië te wen. Skotland het die volgende slagoffer geword toe die Poemas die eerste toets in 1968 gewen het. Die Skotte het egter daarin geslaag om die tweede toets twee weke later te wen.

Die eerste besoek wat die Argentynse nasionale span aan die anderkant van die Atlantiese Oseaan onderneem het was na Rhodesië en Suid-Afrika in 1965. Die span het daar die bynaam "Poemas" verkry toe ’n plaaslike joernalis, Rhodesië se Wackley Farmer, die jaguarembleem op die span se trui vir ’n poema misgis het in ’n artikel ná ’n nederlaag teen ’n span van Salisbury. Ná nederlae teen Salisbury en Noord-Transvaal het die span sy eerste oorwinning teen Wes-Transvaal behaal en ook daarin geslaag om Suidwes-Afrika Distrikte en die Suidelike Universiteite te klop. Die belangrikste resultaat was egter die span se eerste oorwinning (11–6) oor die Junior Springbokke. Die span is deur ’n reuseskare in Buenos Aires tuis verwelkom ná ’n toer waarin hulle altesaam elf oorwinnings behaal het, een gelykopuitslag en vier keer verloor het in die twee maande in Suider-Afrika.

’n Wedstryd is daarna gereël teen die Franse kampioene Section Paloise. Die wedstryd word egter onthou vir die oproer en wangedrag van beide spanne eerder as die Argentynse oorwinning. Hierna het Oxford & Cambridge opgedaag, ’n span wat die Poemas tot op daardie stadium nooit kon verslaan nie. Die eerste wedstryd het gelykop geëindig met ’n 19–19-telling en die tweede is deur die studente met 9–3 gewen. 1965 het geëindig met ’n 23–11-oorwinning oor Chili.

In 1966 het die Gazelles in Argentinië aangekom. Die Gazelles was ’n soort Junior Springbok-B-span. Die Suid-Afrikaanse besoekers het weggestap met twee oorwinnings: 9–3 en 20–15.

In September 1967 het Argentinië opgetree as gashere vir die Suid-Amerikaanse Kampioenskap in Buenos Aires waarin hulle oorwinnings teen Uruguay (38–6) en Chili (18–0) behaal het.

Wallis het in 1968 in Buenos Aires aangekom en vir die eerste keer het die Poemas ’n reeksoorwinning teen ’n ander nasie behaal deur die eerste wedstryd met 9–5 te wen en 9–9 gelykop te speel in die tweede wedstryd.

Die groot dekade van Argentynse rugby het tot ’n einde gekom met die aankoms van Skotland in 1969. In die eerste wedstryd het Argentinië ’n groot oorwinning van 20–3 behaal, maar in die tweede het die besoekers met 6–3 gewen.

In die vroeë 1980’s is die Suid-Amerikaanse Jaguars gevorm. Die span is oorheers deur Argentynse spelers wat agt wedstryde teen die Springbokke gespeel het insluitend ’n oorwinning in Bloemfontein in 1982.

Laat twintigste eeuWysig

 
Die Poemas kon ’n 21–21-gelykop teen die All Blacks op 2 November 1985 aanteken
 
Hugo Porta het 19 jaar vir die Poemas gespeel en 590 punte aangeteken

Vanaf die laat sewentigs tot die vroeë negentigs het Argentinië nooit twee wedstryde van ’n reeks wat in Buenos Aires gehou is verloor nie in ’n tydperk wat wedstryde teen Frankryk, Engeland, Australië en ’n 21–21-gelykopuitslag teen die All Blacks ingesluit het. Die gelykopuitslag teen die All Blacks word as waarskynlik die belangrikste resultaat ooit deur die Poemas gesien en is behaal deur briljante spel deur Hugo Porta wat al Argentinië se punte behaal het.

Teen die eerste Rugbywêreldbeker in 1987 in Australië en Nieu-Seeland gehou is was Argentinië vol selfvertroue dat hulle ten minste die kwarteindstryd sou haal. ’n Onverwagte nederlaag teen Wes-Samoa het die span egter daarvan verhoed om na die uitklopstadium deur te dring.

In die jare wat daarop gevolg het, het baie van Argentinië se beste spelers afgetree. Baie spelers het ook oorsee professionele rugby gaan speel – in Argentinië is rugby steeds grootliks ’n amateursport en op daardie stadium het die UAR se regulasies spelers wat enigsins professioneel gespeel het, verhoed om vir hulle land te speel. Hierdie faktore het Argentinië met ’n span sonder veel ondervinding gelaat wat gelei het tot teleurstellende vertonings in die Rugbywêreldbeker in 1991 en 1995. In laasgenoemde het Argentinië egter ’n kragtige voorspelerpak gehad wat deur die internasionale media geloof is. Argentinië se vaskopstut Patricio Noriega, en haker Federico Mendez het ná die toernooi onderskeidelik in Australië en Suid-Afrika gaan speel. Noriega het selfs daarin geslaag om vir die Wallabies te speel.

In 1999 het ’n span met meer ondervinding en ’n effens onderskatte Argentinië daarin geslaag om tot die kwarteindrondte van die Rugbywêreldbeker 1999 deur te dring ná ’n briljante oorwinning van 28–24 teen Ierland. Die span is deur Frankryk uitgeskakel in ’n 28–47-nederlaag.

Die nuwe millenniumWysig

 
Agustín Pichot het tussen 1995 en 2007 vir die Poemas in vier Rugbywêreldbekers gespeel
 
Die Poemas tydens hulle November 2006 oorwinning oor Engeland op Twickenham

In April 2000 is Marcelo Loffreda aangestel as afrigter van Argentinië.

Argentinië kon nie na die Rugbywêreldbeker 2003-kwarteindstryd deurdring nie weens ’n 15–16-nederlaag teen Ierland in ’n naelbytwedstryd. In die toernooi moes Argentinië vier wedstryde in twee weke speel terwyl Ierland dieselfde getal wedstryde oor vier weke kon speel. Daar is in sommige kringe gevoel dat Ierland, as ’n belangrike rugbynasie nie ’n soortgelyke skedule sou aanvaar nie en dat dit ’n rol gespeel het in die uitslag.

Sedertdien het die span goed gespeel met oorwinnings oor Wallis in Junie 2004 in Argentinië. Die Poemas het die heersende Sesnasieskampioen Frankryk 24–14 verslaan in November 2004 in Marseille, waar Frankryk nooit te vore verloor het nie. Later op dieselfde toer het hulle met 21–19 teen Ierland verloor ná ’n skepskop deur Ierland in die doodsnikke van die wedstryd. Ná hulle terugkeer na Argentinië het die Poemas egter met 39–7 verloor teen die besoekende Springbokke, ’n span teen wie hulle nog nooit kon wen nie.

In een van Argentinië se beste vertonings die afgelope aantal jare het die Poemas op 23 Mei 2005 in Cardiff teen die Britse en Ierse Leeus gespeel voor die span op ’n toer na Nieu-Seeland vertrek het. Die Poemas was gedwonge om ’n span te kies wat bestaan het uit tweede en derde keuse spelers (stut Mauricio Reggiardo, wat later speler van die wedstryd was, moes weer vir die Poemas uitdraf nadat hy reeds uit rugby getree het) aangesien 25 spelers weens klubverpligtinge nie beskikbaar was nie. Goeie spel deur die Poemas en lustelose spel deur die Leeus het byna ’n historiese oorwinning aan die Suid-Amerikaners besorg. Slegs ’n strafskop deur Jonny Wilkinson in beseringstyd het aan die Leeus ’n 25–25-gelykopuitslag besorg.

Toe die Springbokke in November van dieselfde jaar na Argentinië teruggekeer het, het hulle te staan gekom teen ’n baie sterker Poemaspan met meeste van die land se Europees-gebaseerde spelers teenwoordig. Die Poemas het teen halftyd 20–16 voorgeloop by die Vélez Sársfieldstadion. Hoewel hulle in die tweede helfte teruggesak het, is hulle nie verneder nie, met ’n uiteindelike telling van 34–23 ten gunste van Suid-Afrika. Die volgende week het die Poemas na Murrayfield gereis om teen Skotland te speel waar hulle in ’n taai wedstryd 23–19 geseëvier het. Dit was die vyfde agtereenvolgende oorwinning van die Poemas oor Skotland sedert 1990. Die Poemas het die week daarna nog ’n Sesnasies-slagoffer geëis toe hulle Italië met 39–22 in Genua geklop het.

In die middel-van-die-jaar toetse van 2006 het Argentinië ’n span van Wallis vir ’n toer van twee toetse verwelkom. Die Poemas het die reeks gewen, hulle eerste reeksoorwinning oor Wallis. Die Walliese se span het egter slegs twee van hulle eerstekeuse spelers ingesluit. Meeste van die Walliese spelers was A-span en o/21 spelers aangesien meer as 20 Walliese spelers onbeskikbaar of beseer was. Die eerste toets op 11 Junie is net-net met 27–25 deur die Argentyne gewen. Dit was histories belangrik aangesien dit die eerste Argentynse toets was wat in Patagonië gespeel is. Die besoekers is hartelik ontvang deur die gemeenskap in Puerto Madryn, een van die groter dorpe in ’n omgewing wat in die 1860’s deur Walliese setlaars bevolk is en waar Wallies nog gereeld gepraat word. In die tweede toets op Vélez Sársfield op 17 Junie het die Poemas 45–13 voorgeloop voor die Walliesers twee drieë kon druk om die tellingverskil na 45–27 te laat krimp. Wallis se swak dissipline en gebrek aan ondervinding was bydraende faktore in dié span se reeksnederlaag.[14] Die Poemas het vervolgens teen een van die wêreld se voorste spanne, die All Blacks, op Vélez Sársfield gespeel in ’n wedstryd wat hulle met 25–19 verloor het, maar waar die All Blacks hard moes werk om ’n kragtige aanslag op hul doellyn af te weer.

Rugbywêreldbeker 2007Wysig

 
Argentinië se Corleto op pad om ’n drie te druk in die openingswedstryd waar die span verras het met ’n oorwinning oor Frankryk
 
Argentinië teen Ierland tydens die Rugbywêreldbeker 2007 in Frankryk. Die Poemas het die wedstryd met 30–15 gewen.

Op 9 Julie 2006 het Argentinië Uruguay met 26–0 verslaan in ’n Rondte 3a wedstryd tydens die Rugbywêreldbeker 2007 se Amerikaanse kwalifisering. Ná hulle tweede oorwinning het Argentinië in dié stadium die eerste plek in die Amerikas ingeneem om in Poel D te speel saam met die gasheer Frankryk en hulle ou Wêreldbeker-teenstanders Ierland.

Die Poemas is deur die Belgiese Rugbyfederasie genooi om hulle plaaslike wedstryde daar te speel ingeval hulle vir ’n jaarlikse plaaslike kompetisie aanvaar sou word.[15] Kort daarna het hulle ook uitnodigings van Spanje, Switserland, Frankryk en Portugal ontvang.[16]

In tussentyd het die Londense Sunday Times in Februarie 2007 berig dat die IRR in onderhandelinge gewikkel was met SANZAR (die liggaam wat die Drienasiesreeks organiseer) om die Poemas so vroeg as 2008 tot die Suidelike Halfrond se toernooi toe te laat. Weens logistieke oorwegings, spesifiek weens die lang afstand tussen Argentinië en Europa asook die groot aantal rugbywedstryde in die Noordelike Halfrond, was die Sesnasies nie geneë om Argentinië toe te laat nie. Die IRR was oënskynlik oortuig dat die Drienasies die regte plek vir ’n Suidelike Halfrondspan was en is ook deur Suid-Afrika ondersteun in die mening. Australië sou glo ook nie gekant wees teen die aanpassing nie. Die grootste struikelblok was egter die UAR self met ’n aantal lede het wat erg geheg is aan amateurisme.[17]

Die Poemas het hulle finale voorbereiding vir die Rugbywêreldbeker 2007 afgeskop met ’n reeks van twee toetse teen ’n besoekende Ierse span, wat saam met hulle en Frankryk in Poel D sou speel. In die eerste toets op 26 Mei 2007 op Santa Fe het hulle ’n 22–20 oorwinning beklink met ’n skepskop deur Felipe Contepomi in die laaste minuut van die wedstryd. Beide spanne het baie eksperimentele rugby gespeel met Ierse sterre soos Brian O'Driscoll, Ronan O'Gara, Paul O'Connell en Gordon D'Arcy wat uit die toerspan gelaat is en die Poemas by wie baie sterre ontbreek het wat dié naweek in die finale rondte van die Top 14 seisoen in Frankryk moes speel.[18][19] Die tweede toets teen Ierland was ’n 16–0-oorwinning vir die Poemas te Vélez Sársfield op 2 Junie.[20] Op 9 Junie het die Poemas hulle middel-van-die-jaartoetse begin met ’n 24–6 oorwinning oor Italië in Mendoza. Hulle het hul opwarmingstoetse afgesluit met ’n 70–14 oorwinning oor buurland Chili by Club Atlético San Isidro in Buenos Aires op 4 Augustus; en ’n 27–20 nederlaag teen Wallis in die Millennium-stadion op 18 Augustus.

By die Wêreldbeker was die Poemas geloot om in die sogenaamde "doodspoel" te speel wat twee ander sterk spanne ingesluit het wat in die boonste ses op die IRR se Wêreldranglys verskyn het, Ierland en die gasheerland Frankryk. Verder was hulle eerste wedstryd die openingswedstryd teen die gasheer by die Stade de France, die derde keer na mekaar dat hulle in ’n Wêreldbeker-openingswedstryd speel. Teen alle verwagting in het hulle daarin geslaag om die wedstrydgunstelinge 17–12 te klop.[21] Die Poemas klop vervolgens Georgië 33–3 op Stade de Gerland, Lyon. Argentinië het ook Namibië 63–3 in Marseille geklop, die hoogste oorwinning tot dusver tydens ’n rugbywêreldbekertoernooi.[verwysing benodig] Hulle kon ook Ierland 30–15 klop en sodoende die poel as wenner afsluit.

In die kwarteindrondte kon Argentinië Skotland 19–13 op Stade de France klop. Die Poemas se loop na die Webb Ellis-beker is deur ’n duidelike verloor met 37–13 op Stade de France deur die Springbokke beëindig. Hulle kon egter die derde plek behaal deur Frankryk 34–10 te klop, soos tydens die openingswedstryd. Hul derde plek was Argentinië se beste prestasie tydens ’n rugbywêreldbekertoernooi tot dusver. Dit was die eerste keer wat ’n span van buite die Sesnasies en Drienasies die halfeindrondte van ’n Rugbywêreldbekertoernooi kon bereik, dit het vir hulle ’n hupstoot gegee om vir een van dié toernooie genooi te word.

Gedurende hul Rugbywêreldbekerpad het die gewoonlik sokker-gekke Argentyne hul rugbyspan só sterk ondersteun, dat El Superclásico, Buenos Aires se sokkerderby tussen Boca Juniors en River Plate herskeduleer is om nie met die Poemas se kwarteindstryd te bots nie.[22] As die enigste Spaanstalige land in die Rugbywêreldbeker 2007 het die Poemas ook ondersteuning uit Spanje, Uruguay, en ander Latyns-Amerikaanse lande geniet.[verwysing benodig]

Ná die Rugbywêreldbeker 2007Wysig

 
Opstote op Old Trafford, Manchester, voor ’n rugbywedstryd tussen Argentinië en Engeland in 2009

In November 2007, in die nasleep van Argentinië se prestasie tydens die Rugbywêreldbeker 2007, is die toekomstige status van die Poemas tydens ’n IRR-vergadering oor die toekomstige wêreldwye groei van die sport bespreek. Die besluite rakende Argentinië tydens die vergadering is soos volg:[23]

  • Die Poemas sal meer jaarlikse toetse speel, toenemend van die vorige ses per jaar na nege teen 2010. Die span sal vier toetse tydens die Junie-toetse, drie in November en twee tydens die Sesnasies-tydperk in Februarie en Maart beslis.
  • Tussen 2008 en 2010 sal Argentinië ’n plaaslike professionele infrastruktuur van stapel stuur, ten einde om die meeste Argentynse professionele spelers tuis te laat speel. Ietwat rondom 2012 sal die Poemas "ten volle in die Suidelike top-rugbyspelende struktuur geïntegreer wees" (dit wil sê die "Drienasiereeks").

Op 13 Maart 2008 is Santiago Phelan as afrigter van die Argentynse nasionale rugbyspan benoem en het Marcelo Loffreda opgevolg.[24] Op 7 Junie 2008 kon die Poemas Skotland 21–15 in Rosario, Argentinië, verslaan en sodoende hul derde plek in die IRR se wêreldranglys behou.[10]

In Junie 2009 het die Britse pers berig, dat Argentinië die Britse en Ierse Leeus gevra het om tydens hul 2013-toer na Australië wedstryde en toetse in Argentinië te gaan speel,[25] maar niks het van hierdie voorstel geword nie.

Argentinië kon nie daarin slag om onder Phelan ’n toetsoorwinning aan te teken nie, die Poemas kon net ’n gelykop teen Skotland in 2008 en teen Engeland in 2009 aanteken, voordat hulle 2–0 teen Skotland in 2010 verloor het.

Rugbywêreldbeker 2011Wysig

 
Die Poemas teen Engeland tydens die Rugbywêreldbeker 2011 in Nieu-Seeland
 
Felipe Contepomi, Argentynse kaptein tydens die Rugbywêreldbeker 2011

Die Poemas se voorbereidings vir die Rugbywêreldbeker 2011 het met ’n 1–1-gelykop in die reeks teen die Franse Barbarians, ’n 78–15-oorwinning oor ’n Suid-Amerikaanse XV-uitnodigingspan en ’n 21–15-oorwinning oor die Aviva Premiership-span Worcester Warriors afgeskop. In hul enigste internasionale toets is die Poemas deur Wallis met 28–13 in Cardiff geklop.

Die Rugbywêreldbeker 2011 het vir die Poemas met ’n 13–9-nederlaag teen Engeland begin, hoewel Argentinië vir sowat 60 minute die voortou gehad het. In die volgende wedstryd het hulle 43–8 met Roemenië afgereken. Die volgende wedstryd teen Skotland sou oor die verdere vordering van albei spanne beslis. ’n Laat drie deur die plaasvervanger-heelagter Lucas González Amorosino en die verdoeling het die Poemas die wedstryd met 13–12 laat wen. Argentinië kon sy laaste wedstryd teen Georgië met 25–9 wen en sodoende as naaswenner van die poel eindig.

Argentinië se laaste wedstryd van die toernooi was die kwarteindstryd teen die latere kampioen Nieu-Seeland. Tydens ’n verrassende nou eerste helfte was Argentinië ná 30 minute as gevolg van Julio Farias Cabello se verdoelde drie 7–6 voor. Deur die verloop van die wedstryd het die All Blacks egter die leisels oorgeneem en uiteindelik met 33–10 gewen.

Hoewel hul vertoning tydens die 2011-toernooi nie so glorieryk soos tydens die vorige 2007-toernooi was nie, is Argentinië se prestasie egter as suksesvol beskou, nadat hulle uit ’n sterk poel met spanne soos Engeland en Skotland vir die kwarteindrondte kon kwalifiseer, en vervolgens ’n dapper vertoning teen die gunsteling Nieu-Seeland gelewer het. Dit was die eerste keer wat Argentinië vir twee agtereenvolgende kwarteindondte kon kwalifiseer.

Die Rugbykampioenskap sedert 2012Wysig

 
Wedstryd tussen Italië en Argentinië in Rome, 2013

In 2012 kon Argentinië weer ’n toetsreeks teen Frankryk ewenaar.

2012 het ’n groot deurbraak vir die Argentyne gesien, nadat die Poemas by die Rugbykampioenskap aangesluit het (voorheen die Drienasies), bestaande uit Australië, Nieu-Seeland en Suid-Afrika. Dit was die eerste keer wat Argentinië aan ’n jaarlikse internasionale toernooi van Vlak 1-spanne deelgeneem het.

Argentinië het sy eerste wedstryd tydens die 2012-Rugbykampioenskapreeks teen die Springbokke in Kaapstad op 18 Augustus 2012 beslis, en met 27–6 verloor. Die Poemas kon vinnig herstel en een week later in Mendoza ’n 16–16-gelykop teen Suid-Afrika behaal, die eerste gelykop vir Argentinië teen Suid-Afrika. Argentinië het goed teen die Wallabies presteer, toe die Poemas die eerste wedstryd met 19–23 en die tweede wedstryd met 19–25 verloor, maar in albei toetse ’n bonuspunt kon behaal. Argentinië het ook ordentlik teen die All Blacks in Nieu-Seeland gespeel, nadat hulle die telling teen halftyd tot ’n 5–6 kon beperk, voordat hulle dié wedstryd met 5–21 verloor. Ondanks hul vierde plek op die tabel met net vier punte en geen oorwinnings in hul eerste seisoen, was dit vir die ander drie spanne moeilik om Argentinië tuis te klop.

In de November 2012-toetse kon Argentinië Wallis op die Millennium-stadion in Cardiff klop, maar het die volgende wedstryde teen Frankryk en Ierland verloor. In Junie 2013 het die Poemas beide wedstryde teen Engeland in Argentinië verloor, maar kon die Vlak 2-span Georgië verslaan.

Argentinië het ’n reeks 2–0 teen Engeland in 2013 verloor, insluitende ’n rekordtelling van 32–3 in die openingswedstryd, die hoogste nederlaag vir die Poemas nog op eie bodem. Argentinië kon herstel en toe 9–6 Skotland op Murrayfield in Edinburg en later Wallis 26–12 op die Millenium-stadion op Cardiff klop, laasgenoemde was destyds die Sesnasies-Grand Slam-kampioen.

In 2013 het Argentinië sy tweede toernooi met ’n 73–13-rekordnederlaag teen Suid-Afrika begin, dit was Suid-Afrika se hoogste oorwinning oor Argentinië nog.[26] In die tuiswedstryd in rondte 2, het Argentinië sy vermoë as ’n gedugte span gewys, maar net-net met 17–22 teen Suid-Afrika verloor. In rondte 3 het hulle teen Nieu-Seeland te staan gekom en is deur die All Blacks 28–13 verslaan. In rondte 4 het die Poemas teen Australië met 14–13 in Perth verloor. In die volgende tuiswedstryd het Argentinië met 54–17 teen Australië verloor, ’n rekordnederlaag teen die Wallabies tuis.[27] Dit was die tweede agtereenvolgende jaar waarin Argentinië laaste in die tabel geëindig het, nadat hulle dié keer al die wedstryde in die toernooi verloor het.

Op 21 Oktober 2013 het Phelan as afrigter van die Poemas bedank, een jaar voordat sy kontrak sou uitloop.[28] In die 45 wedstryde onder sy opsig van vyf jaar kon die Poemas 13 oorwinnings, 31 nederlae en een gelykop aanteken.

Daniel Hourcade is in Oktober 2013 as die Poemas se nuwe afrigter benoem. In November 2013 is die Poemas deur Engeland en Wallis onderskeidelik in Twickenham en Cardiff geklop, en wen later teen Italië in Rome. In die 2014-middel-van-die-jaar-toetse is Argentinië deur Ierland en Skotland geklop.

Op 5 Oktober 2014 kon die Poemas hul eerste oorwinning nog tydens die Rugbykampioenskapreeks aanteken, toe hulle Australië 21–17 op die Estadio Malvinas Argentinas in Mendoza kon klop, hul eerste oorwinning oor die Wallabies in 17 jaar. Ondanks die prestasie het Argentinië tydens die 2014-Rugbykampioenskapreeks vir die derde agtereenvolgende keer op die laaste plek geëindig.

In die 2014-einde-van-die-jaar-toetse is Argentinië deur Skotland verslaan, maar kon Italië en Frankryk klop.

Tydens die 2015-Rugbykampioenskapreeks kon die Poemas die Springbokke vir die eerste keer 37–25 klop. Tydens die 2016-Rugbykampioenskapreeks kon Argentinië die prestasie herhaal, toe hulle Suid-Afrika 26–24 tuis kon klop. In die 2017-Rugbykampioenskapreeks het die Poemas sonder oorwinnings op die laaste plek geëindig. Gedurende die 2018-Rugbykampioenskapreeks kon Argentinië twee oorwinnings oor Suid-Afrika (32–19 tuis) en Australië (23–19 weg) aanteken, maar eindig nogtans op die laaste plek. In die 2019-Rugbykampioenskapreeks is die Poemas deur al drie teenstanders geklop en eindig vervolgens laaste.

Rugbywêreldbeker 2015Wysig

 
Die Poemas speel die All Blacks op Wembley tydens die Rugbywêreldbeker 2015

Argentinië hou by sy groeiende mededingendheid tydens rugbywêreldbekertoernooie met ’n sterk vertoning tydens die Rugbywêreldbeker 2015, nadat hulle die halfeindroindte vir die tweede keer kon bereik. Argentinië het sy toernooi met ’n nou wedstryd teen die gunsteling Nieu-Seeland begin en die eerste helfte 13–12 afgesluit, maar ná twee afgestane drieë met 26–16 verloor. Die Poemas het met hul oortuigende vertoning voortgegaan en ná oorwinnings oor Georgië, Tonga en Namibië tot die kwarteindrondte gevorder. ’n Kenmerk van Argentynse rugby tydens die Rugbywêreldbeker 2015 was hul vryvloeiende, vermaaklike en aanvallende stil, waardeur hulle 22 drieë in die poelfase kon druk.

In die kwarteindstryd teen Ierland het Argentinië tydens die eerste tien minute twee drieë gedruk en later met 17–0 vooruit gestap. Ierland antwoord toe met twee drieë en nader in die vroeë tweede helfte met 20–17. Argentinië se Juan Imhoff en Joaquín Tuculetkon kon egter in die laat fase van die wedstryd twee drieë druk en Argentinië se 43–20-oorwinning verseker. Vervolgens het die Poemas tot hul tweede halfeindrondte gevorder en Australië ontmoet.

In die eerste tien minute van die halfeindstryd het die Wallabies twee drieë afgedwing en ’n 19–6-voorsprong ná 30 minute behaal. Argentinië het hul gebied en die bal in die tweede helfte oorheers, waardeur hulle strafdoele aan die skrums kon afdwing en sodoende Australië se voorsprong laat krimp. Die wedstryd was op ’n fyn balans en Australië was ná 70 minute op 22–15, maar die Australiese vleuel Drew Mitchell klop vier Argentynse verdedigers en gee die bal vir Adam Ashley-Cooper wat die wendrie druk. Vervolgens wen Australië die vinnige en vermaaklike kragmeting met 29–15. In die bronseindstryd word Argentinië deur die Springbokke geklop en eindig sodoende op die vierde plek.

Rugbywêreldbeker 2019Wysig

In die Rugbywêreldbeker 2019 is Argentinië in die sogenaamde "doodspoel" met Engeland en Frankryk geloot en het hul 2019-veldtog met ’n noue wedstryd teen die Franse hane begin, wat die Poemas met 23–21 verloor het. Argentinië kon Tonga maklik 28–12 klop. Die mededinger Frankryk het egter goed gevaar en sodoende was die derde poelwedstryd teen Engeland die wedstryd oor "alles of niks". Die Argentyn Tomas Lavanini se rooikaart het die wedstryd egter reeds in die 17de minuut beslis en Engeland kon Argentinië 39–10 klop. Vervolgens kon Argentinië vir die eerste keer sedert 2003 nie meer tot die uitklopfase vorder nie. Hul troosprys was die direkte kwalifisering vir die komende Rugbywêreldbeker 2023 in Frankryk.

Kleure, embleem en naamWysig

 
Die span wat teen die Britse Leeus gespeel het, het vir die eerste keer op 31 Julie 1927 in die hemelblou en wit trui uitgedraf
Die jaguar, inheems aan die noordoostelike Argentinië, het in 1941 die embleem van die span geword
Die Argentynse nasionale rugbyspan is na die poema genoem, inheems aan die grootste deel van Argentinië

Nadat ons uit die vliegtuig geklim en geloop het, het ’n joernalis (wat Carl Köhler was) my oor die yaguareté gevra. Omdat ek nie vlot Engels kon praat nie, het ek vir hom gesê die dier is ’n "poema".

Agustín Silvera, Argentynse speler.[29]

Argentinië het gedurende sy eerste nasionale wedstryde in 1910 blou en wit truie afwisselend gedra. In 1927 het Mr. Abelardo Gutiérrez van Gimnasia y Esgrima de Buenos Aires voorgestel dat Argentinië in ’n gestreepte hemelblou en wit trui teen die Britse Leeus moet speel. Die voorstel is aanvaar en Argentinië het vir die eerste keer in sy rugbygeskiedenis in die gestreepte trui gespeel.[30]

Die Poemas speel in ’n trui met die landsvlag se kleure (en sportkleure) hemelblou en wit, wit broeke en sokkies in hemelblou en wit. In 2011 onderteken die UAR ’n kontrak met Nike wat die eksklusiewe vervaardiger van al die nasionale senior- en juniorspanne se truie word, insluitende die Pampas XV.[31] Die eerste deur die Amerikaanse maatskappy vervaardigde trui het die tradisionele horisontaal-gestreepte trui weggedoen, en is net hemelblou met wit skouers, die Poemas het egter aangekondig dat hulle tydens die 2012-Rugbykampioenskapreeks weer hul tradisionele trui sal dra.[32]

In September 1941 het Abelardo Gutiérrez (wie 14 jaar gelede die hemelblou en wit trui vir die span voorgestel het) ’n wapen met ’n leeu as kenteken voorgestel. Die kleur van die kenteken was blou (soos by die Buenos Aires Krieketklub, waar die eerste rugbywedstryd in Argentinië gespeel is). Die leeu is later deur ’n aan Argentinië inheemse dier vervang en die jaguar is volgens hulle vir sy "behendigheid en moed" gekies.[30] Interessant genoeg is die rugbyspan wat Argentinië sedert 2016 in Superrugby verteenwoordig, die Jaguares, na die inheemse jaguar genoem.

Die Poemas-bynaam het ontstaan deur ’n fout van Carl Köhler, ’n joernalis van die destydse Die Transvaler in Suid-Afrika, wat die Argentynse span tydens hul eerste oorsese toer dopgehou het – na Suider-Afrika in 1965. Hy het probeer om ’n ewe pakkende bynaam, soortgelyk aan die All Blacks, Springbokke en Wallabies, te kry. Hy het vir Isak van Heerden, die destydse afrigter van die Natalse rugbyspan, wat deur die SARR opdrag gegee is om die toer te begelei, vir voorstelle gevra. Hulle het ’n prent van ’n soort leeu met kolle op die UAR-kenteken gesien. Köhler was bewus daarvan dat jaguars en poemas inheems is aan die Amerikas, en omdat hy onder druk was om sy artikel in te dien, het hy ’n raaiskoot gemaak en hulle die Poemas genoem, pleks van die eintlike jaguar. Die foutiewe bynaam het vasgebrand en is later deur die Argentyne self goedgekeur (hoewel die UAR-kenteken nog steeds ’n jaguar vertoon).[33]

TuisstadionsWysig

Sociedad Sportiva Argentina (bo) was Argentinië se eerste tuisstadion in 1910. José Amalfitani-stadion (onder), een van die huidige stadions van die Poemas in Buenos Aires

Nes ander vername rugbynasies soos Australië, Frankryk, Nieu-Seeland en Suid-Afrika beskik Argentinië oor geen amptelike tuisstadion vir sy nasionale span nie. Die Poemas span vir hul toetse eerder ’n verskeidenheid stadions dwarsdeur Argentinië in. Een van die mees gebruikte vir toetse is die José Amalfitani-stadion, tuiste van Club Atlético Vélez Sarsfield en geleë in Buenos Aires. Toe die Britse Leeus in 1910 na Argentinië getoer het, het die nasionale span teen hulle op Sociedad Sportiva Argentina in Palermo gespeel. Dié toets was ook die eerste Argentynse wedstryd.[34][35]

Toe die Britte in 1927 saam na Argentinië teruggekeer het, het die nasionale span begin om beide die GEBA en Buenos Aires Krieketveld as hul tuistes te gebruik. GEBA was gedurende die volgende dekades ’n gereelde tuiste, maar het ná die 1960’s net drie wedstryde gehuisves, nadat die Poemas begin het om groter stadions te gebruik; die Poemas se laaste wedstryd op GEBA was in 1993.[36] Die Buenos Aires Krieketveld is ook vir ’n groter aantal wedstryde ingespan, tot dit in 1948 deur ’n brand vernietig is.[37][38]

In 1997 is Argentinië se eerste suiwer rugbystadion deur BACRC in Los Polvorines, Groter Buenos Aires, ingewy. Altesaam is nege internasionale wedstryde daar beslis, totdat die stadion in 2005 verkoop is.[39]

Die Poemas het in die Ferro Carril Oeste-stadion gedurende die 1970’s en 1980’s onder andere teen Ierland, Nieu-Seeland, Frankryk en Australië gespeel.[40][41]

Gedurende die 2007-middeljaar-toetse het die Argentynse span in Vélez Sársfield, Brigadier Estanislao López in Santa Fe, Malvinas Argentinas in Mendoza, en Gigante de Arroyito in Rosario gespeel. In die verlede het die Poemas ook die River Plate-stadion ingespan, en in 2006 Wallis op Estadio Raúl Conti in Puerto Madryn gehuisves.

Ander stadions wat die Argentynse rugbyspan gehuisves het, sluit in Estadio del Bicentenario in San Juan (waar die span in 2017–18 toetse teen Engeland en Wallis beslis het),[42] Estanislao López in Santa Fe (2017), Centenario in Resistencia, Chaco (2014), Monumental José Fierro in Tucumán (in 2012 en 2014), Mario Kempes in Córdoba (in 2012) en Est. José M. Minella in Mar del Plata (in 2008).

Nes Italië is Argentinië die enigste van die tien Vlak 1-rugbyspanne wat tot dusver nog nie ’n wedstryd tydens ’n rugbywêreldbekertoernooi gehuisves het nie.

RekordsWysig

Algehele rekordWysig

 
Argentinië se plek op Wêreldrugby se ranglys vanaf 10 Oktober 2003 tot op hede

Argentinië het teen 13 Desember 2019 225 van hulle 443 toetswedstryde gewen, ’n wenrekord van 51,79%.[43] Toe die IRR se Wêreldranglys in Oktober 2003 ingevoer is, was Argentinië sewende op die lys. Hulle het in Junie 2004 na die agtste plek teruggesak voor hulle in November weer na sewende plek gestyg het. Hulle het in Februarie 2005 weer teruggesak na agtste plek voor hulle hul laagste posisie, negende, bereik het in Februarie 2006. Sedertdien het die span tot agtste plek in Julie 2006 geklim en tot sesde plek in November 2006. Hulle het die plek sedertdien behou met die uitsondering van ’n enkele week waar hulle tot sewende plek gedaal het en ’n week waarin hulle die vyfde plek bereik het.[10]

Argentinië kon tot dusver al die wedstryde teen ander Suid-Amerikaanse nasionale rugbyspanne wen, insluitende 41 teen Uruguay, 38 teen Chili, 17 teen Paraguay en 13 teen Brasilië. In teenstelling hiermee kon hulle Nieu-Seeland nog nooit klop nie; hul beste prestasie teen die All Blacks is ’n gelykop.

Argentinië se toetsrekord teen alle lande: (Korrek op 13 Desember 2019)[43]

Teen Gespeel Gewen Verloor Gelykop % Gewen
  Australië 32 6 25 1 20,31
  Brasilië 13 13 0 0 100
  Britse en Ierse Leeus 6 0 6 0 0
  Chili 36 36 0 0 100
  Engeland 23 4 18 1 17,39
  Engeland XV 1 0 0 1 0
  Fidji 4 3 1 0 75
  Frankryk 51 14 36 1 28,43
  Georgië 5 5 0 0 100
   Ierland 18 6 12 0 33,33
  Ierland XV 5 2 2 1 40
  Italië 22 16 5 1 72,72
  Japan 6 5 1 0 83,33
  Junior Bokke 5 1 4 0 20
  Kanada 8 6 2 0 75
  Namibië 3 3 0 0 100
  Nieu-Seeland 29 0 28 1 0
  Nieu-Seeland XV 4 0 4 0 0
  Oxford en Cambridge 8 2 5 1 25
  Paraguay 17 17 0 0 100
  Peru 1 1 0 0 100
  Roemenië 8 8 0 0 100
  Samoa 4 1 3 0 25
  Skotland 18 9 9 0 50
  Skotland XV 3 1 2 0 33,33
  Spanje 4 4 0 0 100
  Suid-Afrika 30 3 26 1 11,66
  Suid-Afrika Gazelles 6 2 4 0 33,33
  Tonga 1 1 0 0 100
  Uruguay 39 39 0 0 100
  Venezuela 1 1 0 0 100
  Verenigde State 8 8 0 0 100
  Wallis 18 5 13 0 27,78
  Wallis XV 3 1 1 1 33,33
 Wêreld XV 2 2 0 0 100
  Zimbabwe 1 0 1 0 0
Totaal 443 225 208 10 51,79

Die Rugbykampioenskap (sedert 2012)Wysig

Argentinië se enigste jaarlikse toernooi is die Rugbykampioenskap, waaraan hulle sedert 2012 deelneem en teen drie ander nasies van die Suidelike Halfrond speel: Australië, Nieu-Seeland en Suid-Afrika. Tydens dié toernooi kon die Poemas tot dusver net vyf wedstryde wen: 27–19 teen die Wallabies in 2014, 37–25 teen die Springbokke in 2015, 26–24 teen die Springbokke in 2016, 32–19 teen die Springbokke en 23–19 teen die Wallabies in 2018. Argentinië kon Suid-Afrika tydens die Rugbykampioenskap tot dusver drie keer klop en Australië twee keer. Nieu-Seeland is die enigste span waarteen Argentinië tot dusver nog nie ’n oorwinning kon aanteken nie.

Nasie Wedstryde Punte Bonus-
punte
Tabel-
punte
Kampioen-
skappe
gespeel gewen gelykop verloor     vir         teen         verskil    
  Nieu-Seeland 42 36 2 4 1423 751 +672 26 174 6
  Suid-Afrika 42 19 4 19 1048 974 +74 19 103 1
  Australië 42 19 3 20 952 1088 –136 9 91 1
  Argentinië 42 5 1 36 766 1376 –610 11 33 0

Bygewerk op 30 Augustus 2019
Bron: espnscrum.com (besoek op 30 Augustus 2019)


WêreldbekerrekordWysig

Jaar Uitslag
1987 Poelfase
1991 Poelfase
1995 Poelfase
1999 Kwarteindrondte
2003 Poelfase
2007 Derde plek
2011 Kwarteindrondte
2015 Vierde plek
2019 Poelfase
2023 N.v.t.

VerwysingsWysig

  1. (en) "Most matches". ESPNscrum. Besoek op 13 Desember 2019.
  2. (es) "Felipe Contepomi será el Puma récord en Rosario". CanchaLlena.com. 1 Oktober 2013. [dooie skakel]
  3. (es) "La despedida de un símbolo". Clarín. 6 Oktober 2013. Besoek op 13 Desember 2019.
  4. (en) ""Contepomi to set record, Pumas chase historic win" at UltimateRugby.com". Geargiveer vanaf die oorspronklike op 7 April 2014. [dooie skakel]
  5. (en) "Most points". ESPNscrum. Besoek op 13 Desember 2019.
  6. (es) "Contepomi ya sabe lo que significa ser Puma récord". Clarín. 29 September 2013. Besoek op 13 Desember 2019.
  7. (es) "Contepomi superó a Porta y es el goleador récord". Clarín. 10 Junie 2012. Besoek op 13 Desember 2019.
  8. (es) "Contepomi, goleador histórico Puma". ESPN. 9 Junie 2012. Besoek op 13 Desember 2019.
  9. (en) "Most tries". ESPNscrum. Besoek op 13 Desember 2019.
  10. 10,0 10,1 10,2 10,3 10,4 (en) "World Rugby Rankings". Wêreldrugby. Besoek op 13 Desember 2019.
  11. (en) "Six Nations would be magnificent seven with us, pleads Pichot". Western Mail. 19 Junie 2006. [dooie skakel]
  12. (en) Deges, Frankie. "Argentina is now part of Rugby Championship". Buenos Aires Herald. Besoek op 13 Desember 2011. [dooie skakel]
  13. (en) "Wallabies defeated 21–17 by Argentina". The Australian. 4 Oktober 2014. Besoek op 6 Oktober 2014. [dooie skakel]
  14. (en) "Argentina 45–27 Wales". BBC. 17 Junie 2006. Besoek op 13 Desember 2019.
  15. (es) "Oferta para ser local en Bélgica". Clarín. 27 November 2011. Besoek op 13 Desember 2019.
  16. (es) "A la UAR le llueven ofertas para la concentración de Los Pumas previa al Mundial". Clarín. 26 Januarie 2007. Besoek op 13 Desember 2019.
  17. (en) Cain, Nick (25 Februarie 2007). "Ambitious Argentina poised to secure TriNations place". The Sunday Times. Besoek op 26 Februarie 2007. [dooie skakel]
  18. (en) "First Test Preview: Argentina v Ireland". Ierse Rugbyvoetbalunie. 25 Mei 2007. Besoek op 26 Mei 2007. [dooie skakel]
  19. (en) "Argentina 22–20 Ireland". BBC. 26 Mei 2007. Besoek op 13 Desember 2019.
  20. (en) "Argentina 16–0 Ireland". BBC. 2 Junie 2007. Besoek op 13 Desember 2019.
  21. (en) "Coach asks Argentina to stay calm". BBC. 8 September 2007. Besoek op 13 Desember 2019.
  22. (en) PA Sport (9 Oktober 2007). "Contepomi's field of dreams". Sportal.co.nz. Geargiveer vanaf die oorspronklike op 11 Oktober 2007. Besoek op 9 Oktober 2007. [dooie skakel]
  23. (en) Internasionale Rugbyraad (30 November 2007). "Rugby lays foundations for continued growth". Persberig. Archived from the original on 2 Desember 2007. https://web.archive.org/web/20071202170940/http://www.irb.com/newsmedia/mediazone/pressrelease/newsid%3D2021332.html#rugby+lays+foundations+continued+growth#rugby+lays+foundations+continued+growth. Besoek op 3 Desember 2007.  [dooie skakel]
  24. (en) "Phelan named new Argentina coach". BBC. 13 Maart 2008. Besoek op 13 Desember 2019.
  25. (en) Gallagher, Brendan (13 Junie 2009). "Lions 2009: Argentina look for future tour While the British and Irish Lions play in front of apathetic half-empty stadiums in South Africa, Argentina look on with growing frustration and anger". The Daily Telegraph. Londen. Besoek op 13 Desember 2019.
  26. (en) "Springboks power to record victory over Pumas". ESPNscrum. 17 Augustus 2013. Besoek op 13 Desember 2019.
  27. (en) "Wallabies humble Pumas in Rosario". ESPNscrum. 6 Oktober 2013. Besoek op 13 Desember 2019.
  28. (en) ESPN Staff (22 Oktober 2013). "Phelan resigns after five years". ESPNscrum. Besoek op 13 Desember 2019.
  29. (es) "Aquella confusión entre un yaguareté y un puma que modificó todo para siempre". Clarín. 29 Mei 2015. Besoek op 13 Desember 2019.
  30. 30,0 30,1 (es) "La pasión cumple 100 años". La Nación. 10 April 1999. Besoek op 13 Desember 2019.
  31. (es) "El pase del verano: Los Pumas dejan Adidas para vestirse con Nike". El Cronista. 27 November 2011. Besoek op 13 Desember 2019.
  32. (es) "Nike presenta su camiseta de Los Pumas". Prematch. 1 Junie 2012. Besoek op 13 Desember 2019.
  33. (en) Davies, Sean (26 Julie 2007). "Puma power: Argentinian rugby". BBC. Besoek op 13 Desember 2019.
  34. (es) Ricardo Sabanes (16 Mei 2017). ""Lions": Los viajes olvidados". Periodismo Rugby. Besoek op 13 Desember 2019.
  35. (es) "El centenario del debut". Clarín. 13 Junie 2010. Besoek op 13 Desember 2019.
  36. (en) "Argentina at ground: GEBA". ESPNscrum. Besoek op 13 Desember 2019.
  37. (es) "El club de rugby más antiguo de la Argentina". Rugbytime.com. 19 September 2008. Geargiveer vanaf die oorspronklike op 12 Januarie 2014. [dooie skakel]
  38. (en) "Buenos Aires Cricket & Rugby Club". Centro de Documentación, Investigación y Referencia Histórica-Deportiva. Junie 2009. [dooie skakel]
  39. (es) "Adiós a un escenario de triunfos históricos". Clarín. 4 Desember 2005. Besoek op 13 Desember 2019.
  40. (es) "El historial de los Pumas contra los grandes: los All Blacks, el único al que no le pudieron ganar". Cancha Llena. 8 Augustus 2015. [dooie skakel]
  41. (es) "El historial de Los Pumas ante Australia, la tercera potencia". Infobae. 18 Oktober 2015. Besoek op 13 Desember 2019.
  42. (en) "Argentina Tests Announced – June 2018". Walliese Rugbyunie. 30 Januarie 2018. Besoek op 1 Februarie 2018. [dooie skakel]
  43. 43,0 43,1 (en) "International Rugby Union Statistics – Argentina". ESPNscrum. Besoek op 13 Desember 2019.

BronnelysWysig

Eksterne skakelsWysig