Maak hoofkeuseskerm oop

Roemeense nasionale rugbyspan

Die Roemeense nasionale rugbyspan, met die bynaam Die Eike (Roemeens: Stejarii) is reeds lank een van die sterker Europese nasionale rugbyspanne buite die Sesnasies-toernooi. Die span neem aan internasionale kompetisies soos die Wêreldbeker, die Europese Nasiesbeker en die Superbeker deel. Rugby in Roemenië word bestuur deur die Roemeense Rugbyfederasie. Die Roemeense rugbyspan is tans (26 November 2019) 19de op Wêreldrugby se wêreldranglys gelys.[4] Die span speel in geel en blou kleure. Sedert 2002 ding Georgië en Roemenië om die Antimbeker mee; dié beker is na die Metropolis van Moentenië en Dobroedja van die Roemeens-Ortodokse Kerk, die Georgiër Antim Iverianul, genoem.

Roemenië
Rugby Romania.jpg
Unie Federaţia Română de Rugby
Bynaam(e) Die Eike (Roemeens: Stejarii)
Embleem Eikeblaar
Stadion Arcul de Triumf Stadion
Afrigter(s) Vlag van Engeland Andy Robinson
Kaptein(s) Mihai Macovei
Spankleure


Alt. kleure

Statistiek
Meeste toetse Florin Vlaicu (120)[1]
Meeste toetspunte Florin Vlaicu (951)[2]
Meeste drieë Cătălin Fercu (33)[3]
Eerste internasionale wedstryd
Vlag van Roemenië Roemenië 0–21 Verenigde State Vlag van Verenigde State van Amerika
(Parys, Frankryk; 1 Julie 1919)
Grootste oorwinning
Vlag van Bulgarye Bulgarye 0–100 Roemenië Vlag van Roemenië
(Boergas, Bulgarye; 21 September 1976)
Grootste nederlaag
Vlag van Engeland Engeland 134–0 Roemenië Vlag van Roemenië
(Londen, Engeland; 17 November 2001)
Wêreldbeker
Verskynings 8/9 (Eerste in 1987)
Beste uitslag Een oorwinning in 1987, 1991, 1999, 2003, 2007 en 2015
Unie webwerf
www.frr.ro
Die Roemeense nasionale rugbyspan nadat hulle in 2016 die Pershing-trofee ingepalm het

Frankryk het vir die eerste keer in 1924 teen Roemenië gespeel om ’n alternatief tot die Vyfnasiestoernooi daar te stel nadat Frankryk uit die toernooi geskop is as gevolg van beweerde professionalisme. Toe hulle op hulle beste was in die 1980’s, het die span Wallis (twee keer), Skotland (die 1984 Grand Slam-span) en Frankryk (twee keer) geklop. In 1981 het hulle met slegs 14–6 teen die All Blacks verloor nadat twee drieë nie toegelaat is nie. Na die val van kommunisme het Roemeense rugby egter agteruitgegaan.

Roemenië het egter in byna elke Rugbywêreldbeker gespeel sedert die kompetisie vir die eerste keer in 1987 in Australië en Nieu-Seeland gehou is. Die span se beste uitslag in die toernooi tot dusver is enkele oorwinnings gedurende die poelfase. Spanne soos die Georgië en Portugal, wat beide die Europese Nasiesbeker ses keer gewen, het gedreig om die nasie se plek aan die bokant van die nasies buite die Sesnasies oor te neem. Roemenië het in Poel C gespeel in die Rugbywêreldbeker 2007 saam met Portugal, Skotland, Italië en Nieu-Seeland.

GeskiedenisWysig

BeginjareWysig

 
Roemenië teen Frankryk tydens die Inter-geallieerde Spele in 1919, Stade Olympique Yves-du-Manoir, Frankryk

Rugby is van 1913 af na Roemenië ingevoer deur studente wat met rugbyballe van Parys af teruggekeer het om klubs soos Stadiul Roman te stig. Sewentien ander spanne is later in die hoofstad Boekarest gevorm.

Roemenië se eerste internasionale wedstryd is in 1919 teen die VSA gespeel.

In 1924 behaal die Roemeense nasionale rugbyspan sy eerste oorwinning in ’n internasionale wedstryd teen Pole. Frankryk het vir die eerste keer rugby teen Roemenië gespeel in Mei 1924 toe dié land probeer het om ’n alternatief tot die Vyfnasies daar te stel nadat Frankryk uit die kompetisie geskop is. Frankryk het die eerste wedstryd 59–3 gewen.

Roemenië was een van die drie lande wat rugbyspanne vir die Olimpiese Somerspele 1924 in Parys ingeskryf het. Frankryk het met 59–3 gewen met dertien drieë insluitend vier deur die Stade Français-vleuel Adolphe Jaureguy. Die VSA het Roemenië daarna 39–0 geklop. Roemenië het derde geëindig om die bronsmedalje te wen. Die Roemeense Rugbyfederasie (Roemeens: Federaţia Română de Rugby) is in 1931 gevorm. In 1939 is ’n span in Braşov by ’n vliegtuigfabriek gevorm wat die eerste span buite Boekarest was.

Naoorlogse Tydperk tot die 1980’sWysig

Die kommunistiese regering het rugby soos ander sportsoorte as ’n propagandainstrument gebruik tydens die Kouse Oorlog met die Weste. Elke internasionale sukses is voorgestel as die direkte gevolg van die korrektheid van die kommunistiese regering en ideologie. Alle finansiële hulpbronne is aangewend ter voorbereiding van die nasionale span wat tot verwaarlosing van binnelandse ontwikkeling van rugby gelei het. Topspelers is deur die leër of polisie in diens geneem, wie se spanne Steaua en Dynamo ses dae per week geoefen het in uitstekende sportsentrums. Hierdie infrastruktuur en beleid het ’n baie talentvolle nasionale span te weeg gebring.

’n Geslag van Fransopgeleide afrigters van die laat 1940–1950’s het ’n stelsel gebou wat gelei het tot nasionale spansukses in die 1960’s, 70’s en 80’s. In die tydperk het Roemenië meer gereeld teen ander nasies begin speel. Die span se eerste oorwinning oor Frankryk is in 1960 behaal en in 1976 het hulle ’n toer na Nieu-Seeland onderneem. Blootstelling aan internasionale rugby het bygedra om die sport in die land te ontwikkel en die Roemeniërs het ’n bepaalde spelstyl begin ontwikkel, gegrond op ’n reusestel sterk voorspelers. Dat die span as ’n ware rugbykrag begin ontluik het was duidelik op Cardiff Arms Park in 1979 in ’n nieamptelike, nie-toetswedstryd. Die Eike het in die doodsnikke van die wedstryd nog voorgeloop en slegs ’n skepskop deur Gareth Davies in die laaste paar minute het aan Wallis ’n 13–12 oorwinning besorg. Die verbetering is in 1980 voortgesit toe Roemenië die Franse vermorsel het in ’n 15–0 rekordoorwinning in Boekarest. ’n Reis na Lansdowne Road het daarna ’n 13–13 gelykop uitslag teen Ierland gelewer.

In die 1980’s kon die land spog met meer as 12 000 spelers in 110 klubs. Tuis-nasiespanne het begin om wedstryde teen Roemenië as toetse te beskou in 1983. Wallis het in November 1983 na Boekarest gereis waar hulle deur die Roemeniërs oorweldig is en ’n 24–6 nederlaag moes verduur. Roemenië se eerste oorwinning oor Skotland is in Boekarest in 1984 behaal en hulle eerste weg-oorwinning teen ’n Vyfnasiesspan was in 1988 teen Wallis; 15–9 op Cardiff Arms Park.

Roemenië se nasionale span het Wallis (twee keer – 1983: 24–6 in Roemenië, 1988: 15–9 in Wallis), Skotland (die 1984 Grand Slam span 28–22 in Roemenië) en Frankryk (twee keer – 1980: 15–0 in Roemenië, 1982: 13–9 in Roemenië) geklop en het gelykop gespeel teen Ierland (13–13, in 1980, in Dublin). In 1981 het hulle 14–6 teen die All Blacks verloor, maar twee drieë is nie toegelaat nie. Roemenië het Zimbabwe met 21–20 verslaan in hulle eerste Rugbywêreldbekerwedstryd in 1987, maar die span kon nie enige ander wedstryde wen nie en het nie na die uitklopfase van die kompetisie deurgedring nie.

Na die val van KommunismeWysig

Die val van kommunisme in die 1990’s in Roemenië het met politieke en ekonomiese probleme gepaard gegaan, wat ook ’n negatiewe impak op rugby in die land gehad het. Die twee voorste klubs – Dinamo Boekarest en Steaua Boekrest – het onderskeidelik die polisie en leër verteenwoordig. Met die besnoeiing in staatsbesteding het die klubs se befondsing ook drasties geval. Verskeie voorste rugbyspelers het ook in die 1989-rewolusie omgekom. Onder die sterfgevalle was Roemenië se kaptein Florică Murariu, ’n leëroffisier wat by ’n padblokkade doodgeskiet is.[5]

Na-rewolusie Roemeense rugby was egter steeds lewendig. In 1990 het die Roemeense span hulle beste oorwinning tot op daardie stadium behaal deur Frankryk vir die eerste keer in Frankryk met 12–6 te verslaan. Die volgende jaar het hulle Skotland 18–12 geklop. By die Rugbywêreldbeker 1991 het hulle daarin geslaag om Fidji 17–15 te verslaan en so onlangs soos die Rugbywêreldbeker 1995 het Roemenië die uiteindelike wenners, Suid-Afrika, tot ’n eervolle 21–8 beperk.

Professionalisme wat op die Rugbywêreldbeker 1995 gevolg het was egter so te sê ’n doodskoot vir Roemeense rugby.[5] Daar word geskat dat omtrent 200 Roemeense spelers in Frankryk en Italië speel. Nie net spelergetalle het deurgeloop nie, ’n geslag potensiële skeidsregters en administrateurs het ook verlore gegaan.[5] Teen 1994 het Roemenië se rugbyvooruitsigte kwaai gedaal toe ’n Walliese span na Boekarest gereis het en ’n 16–9-oorwinning behaal het. In 1997 het die Roemeniërs na Wallis getoer. Die span het 36–21 teen Wallis A verloor by Pontypridd en 70–21 in ’n toets in Wrexham. By die Rugbywêreldbeker 1999 kon Roemenië weereens slegs ’n enkele oorwinning van 27–25 teen die VSA behaal. Sedertdien het Roemenië se spelergetalle met 75% geval en die aantal klubs na slegs 28, waarvan nie een met hulle eie klubhuis kan spog nie.

Die nuwe millenniumWysig

 
Roemenië teen Ierland op Landsdowne Road, Dublin, Ierland, 26 November 2005
 
Skotland 44–6 Roemenië, 11 November 2006 op Murrayfield, Edinburg, Skotland
 
Roemenië teen Spanje in Madrid, 2008

In 2000 het Roemenië die eerste Europese Nasiesbeker met ’n groot marge gewen met oorwinnings in al vier wedstryde. Teen 2001 het spanne soos Georgië egter by hulle opgevang en het die span hulle verslaan om die 2001 Europese Nasiesbeker te wen, bekroon met ’n beslissende oorwinning van 31–20 oor Roemenië in Boekarest. Die nasionale span het 138–0 teen Engeland verloor in 2001 en Dinamo Boekrest 151–0 teen Saracens in die Europese Rugbyskild. Verskeie Frankryk-gebaseerde spelers het geweier om vir die nederlaag teen Engeland op te daag omdat hulle ’n week se betaling van hulle klubs sou moes ontbeer. Spelers in die Roemeense span is £30 per dag betaal terwyl Engeland se topspelers £6 000 vir hulle middag se werk verdien het.

In Januarie 2002 is Bernard Charreyre aangestel as afrigter van die nasionale span. Hy is deur die Franse Rugbyfederasie (FFR) beskikbaar gestel wat ook sy kostes gedra het. Onder Charreyre (wat onder die spanlede as 'Klein Napoleon' bekendgestaan het), is die Eike se agteruitgang omgekeer en het die span stadig weer uit die kelder van internasionale rugby verreis. Met die verandering in formaat van die Europese Nasiesbeker het Roemenië in 2002 met ’n agterstand teen Georgië begin as gevolg van die insluiting van 2001-uitslae. Roemenië het egter daarin geslaag om al vyf oorblywende wedstryde te wen, insluitende ’n taai stryd in Tbilisi om ’n 31–23 oorwinning oor Georgië te beklink. Hulle het vir die Rugbywêreldbeker 2003 gekwalifiseer waar hulle Namibië geklop het en 45–17 teen Ierland verloor het na ’n eervolle vertoning en 90–8 teen Australië en 50–3 teen Argentinië verloor het. Charreyre is na die Wêreldbeker ontslaan aangesien die Roemeense federasie nie tevrede was met die Wêreldbekervertoning nie en besluit het om nie sy kontrak te hernu nie. Drie ander Franse afrigters het gevolg: eers Phillipe Sauton, vir ’n baie kort tydperk, daarna Robert Antonin as ’n tydelike plaasvervanger en uiteindelik Daniel Santamans.

In die 2003–2004 Europese Nasiesbeker het Portugal verras deur Roemenië 16–15 in Lissabon te verslaan om bo-aan die 2003-tabel te verskyn. In die tweede helfte van die kompetisie het dit gelyk of Roemenië herstel het (36–6 teen Portugal in Constanţa), maar het 24–33 teen Rusland verloor in Krasnodar na aantygings van die gebruik van opkikkers. Portugal het daarna hulle eerste titel behaal met ’n laaste-minuut 19–18 oorwinning oor Rusland in Lissabon. In 2004 het die Roemene ’n noue 25–24 oorwinning oor Italië beklink, hulle eerste oorwinning tot dusver oor ’n Sesnasies-toernooispan.

In 2005 is Roemenië 'tweede vlak' status deur die Internasionale Rugbyraad toegeken en het die land Rusland in die Super Powersbeker vervang. Die VSA het ’n Roemeense span wat sonder sy Frankryk-gebaseerde spelers moes speel 23–16 verslaan in die wedstryd om die derde plek. Die 2005–06 Europese Nasiesbeker het ook gedien as die kwalifiserende groep vir die Rugbywêreldbeker 2007. Roemenië het geseëvier ten spyte daarvan dat hulle op punte gelyk met Georgië geëindig het.

Roemenië het vir die Rugbywêreldbeker 2007 in Frankryk gekwalifiseer deur bo-aan hulle poel te eindig in die vyfde rondte van die Europese kwalifiseringstoernooie. Roemenië het hulle eerste kwlifiseringswedstryd op 7 Oktober gewen toe hulle Georgië in Boekarest 20–8 verslaan het. Hulle 43–20 oorwinning oor Spanje in Madrid op 14 Oktober het verseker dat hulle direk vir die 2007-toernooi gekwalifiseer het. In Junie 2007 het Roemenië die IRR Nasiesbeker in Boekarest aangebied.[6] Tydens die Rugbywêreldbeker 2007 het Roemenië ’n bonuspunt behaal in die 18–24-verlies teen Italië en hul tweede wedstryd teen Portugal by ’n noue telling (14–10) gewen, maar hoë verliese teen Skotland (42–0) en Nieu-Seeland (85–8) afgestaan.

Op 21 Maart 2009 het Roemenië tuis teen Portugal 22–21 verloor, en moes toe in ’n opdraande stryd vir die Rugbywêreldbeker 2011 kwalifiseer – die kwalifikasie vir dié toernooi is tydens die Europese Nasiesbekers in 2009 en 2010 bepaal. Roemenië het onoorwonne gebly, met ’n gelykop teen Rusland in die 2010-Europese Nasiesbeker. Die Eike se sterk afronding het hul op die derde plek en die eindfase in die Europese kwalifikasie se uitspelwedstryde geplaas, waarin hulle Oekraïne in twee wedstryde (94–10 algeheel) vir die Europese plek by die finale uitspeelwedstryd vir die Rugbywêreldbeker 2011 kon klop. Roemenië het die laaste kwalifiseerder vir die 2011-toernooi in Nieu-Seeland geword nadat hulle Tunisië (56–13) en toe Uruguay (60–33 algeheel) klop.

In November 2016 kon Roemenië tuisoorwinnings oor die VSA, Kanada en Uruguay aanteken.[7]

Roemenië is, saam met België en Spanje, nadat hulle tydens die kwalifisering vir die Rugbywêreldbeker 2019 ongeskikte spelers ingespan het, vir elke wedstryd met hierdie spelers met puntaftrekking beboet.[8][9] Vervolgens kon die drie spanne nie vir die 2019-toernooi kwalifiseer nie; vir Roemenië die enigste toernooi tot dusver wat hulle misgeloop het.

RekordsWysig

Algehele rekordWysig

 
Roemenië se plek op Wêreldrugby se ranglys vanaf 10 Oktober 2003 tot op hede

Roemenië het teen 26 November 2019 255 van hulle 445 toetswedstryde gewen, ’n wenrekord van 57,3%.[10]

Roemenië se toetsrekord teen alle lande: (Korrek op 26 November 2019)[10]

Teen Gespeel Gewen Verloor Gelykop % Gewen
  Argentinië 8 0 8 0 0
  Argentinië XV 5 4 1 0 80
  Australië 3 0 3 0 0
  België 7 7 0 0 100
  Brasilië 1 1 0 0 100
  Bulgarye 2 2 0 0 100
  Duitsland 11 6 5 0 54,5
  Engeland 5 0 5 0 0
  Fidji 3 1 2 0 33,3
  Frankryk 50 8 41 2 15,7
  Frankryk A 1 0 1 0 0
  Frankryk XV 5 0 5 0 0
  Georgië 23 9 13 1 39,9
   Ierland 9 0 9 0 0
  Ierland XV 1 0 0 1 0
  Opkomende Ierland 1 0 1 0 0
  Italië 42 16 23 3 38,1
  Italië A 4 2 2 0 50
  Opkomende Italië 2 2 0 0 0
  Japan 6 1 5 0 16,7
  Japan XV 1 1 0 0 0
  Kanada 8 6 2 0 75
  Marokko 8 7 0 1 87,5
  Namibië 6 5 1 0 83,3
  Nederland 7 7 0 0 100
  Nieu-Seeland 2 0 2 0 0
  Nieu-Seeland XV 1 0 1 0 0
  Opkomende All Blacks 1 0 0 1 0
  Oekraïne 3 3 0 0 100
  Oos-Duitsland 13 12 0 1 92,31
  Pole 16 14 2 0 87,5
  Portugal 24 21 3 0 87,5
  Rusland 22 15 6 1 68,2
  Serwië 1 1 0 0 100
  Skotland 13 2 11 0 15,4
  Sowjetunie 22 18 3 1 81,82
  Spanje 24 22 2 0 91,67
  Suid-Afrika 1 0 1 0 0
  Tsjeggië 6 6 0 0 100
  Tjeggoslowakye 18 17 0 1 77,8
  Tunisië 4 3 1 0 75
  Verenigde State 5 1 4 0 20
  Wallis 8 2 6 0 25
  Wes-Duitsland 9 8 1 0 88
  Zimbabwe 4 4 0 0 100
Totaal 445 255 178 12 57,3

WêreldbekerrekordWysig

Jaar Uitslag
1987 Poelfase
1991 Poelfase
1995 Poelfase
1999 Poelfase
2003 Poelfase
2007 Poelfase
2011 Poelfase
2015 Poelfase
2019 Geen deelname
2023 N.v.t.

VerwysingsWysig

  1. (en) "Most matches". ESPNscrum. Besoek op 26 November 2019.
  2. (en) "Most points". ESPNscrum. Besoek op 26 November 2019.
  3. (en) "Most tries". ESPNscrum. Besoek op 26 November 2019.
  4. (en) "World Rugby Rankings". Wêreldrugby. Besoek op 26 November 2019.
  5. 5,0 5,1 5,2 (en) [1], Romania look to raise standard, besoek op 19 September 2007
  6. (en) "IRB". Geargiveer vanaf die oorspronklike op 5 Oktober 2013.
  7. (en) November gain or pain? Besoek in Desember 2016
  8. (en) "Independent Appeal Committee decision regarding Romania and Spain". Wêreldrugby. 6 Junie 2018. Besoek op 26 November 2019.
  9. (en) "Russia handed 2019 World Cup spot". ESPNscrum. 15 Mei 2018. Besoek op 26 November 2019.
  10. 10,0 10,1 (en) "International Rugby Union Statistics – Romania". ESPNscrum. Besoek op 26 November 2019.

Eksterne skakelsWysig