Maak hoofkeuseskerm oop

Namibiese nasionale rugbyspan

Die Namibiese nasionale rugbyspan, ook bekend as die Welwitschias of die Biltongboere, is ’n professionele nasionale rugbyspan wat Namibië in internasionale rugby verteenwoordig. Hulle is ’n tweedevlakspan in Wêreldrugby se vlakstelsel en het sedert hul eerste verskyning by ’n Rugbywêreldbeker in ses toernooie gespeel. Die span word deur die Namibiese Rugbyunie beheer. Die Namibiese rugbyspan is tans (16 November 2019) 22ste op Wêreldrugby se wêreldranglys gelys.[1]

Namibië
Logo Namibia Rugby.svg
Unie Namibiese Rugbyunie
Bynaam(e) Welwitschias, Biltongboere
Embleem die visarend
Stadion Hage Geingob Rugbystadion, Windhoek
Kapasiteit 10 000
Afrigter(s) Vlag van Wallis Phil Davies
Kaptein(s) Johan Deysel
Spankleure


Alt. kleure

Statistiek
Meeste toetse Eugene Jantjies (68)
Meeste toetspunte Theuns Kotzé (344)
Meeste drieë Gerhard Mans (27)
Eerste internasionale wedstryd
Vlag van Suid-Afrika Suidwes-Afrika 0–9 Britse en Ierse Leeus
(5 Julie 1955)
Grootste oorwinning
Vlag van Tunisië Tunisië 0–118 Namibië Vlag van Namibië
(23 Junie 2018)
Grootste nederlaag
Vlag van Australië Australië 142–0 Namibië Vlag van Namibië
(25 Oktober 2003)
Wêreldbeker
Verskynings 6 (Eerste in 1999)
Beste uitslag Laaste in poel, 1999, 2003, 2007, 2011, 2015 en 2019
Unie webwerf
www.namibianrugby.com
’n Welwitschia in Namibië, naamgewer van die Namibiese nasionale rugbyspan

Namibië speel sedert die vroeë 1900’s internasionale rugby. Naas die feit dat hulle al in die Rugbywêreldbeker gespeel het, speel hulle ook jaarliks in die Afrikabeker. Tot onafhanklikheidwording in 1990 kon Namibiese spelers vir die Springbokke gekies word. Die mees onlangse Namibiese Springbok is Percy Montgomery (hy is in Walvisbaai gebore wat in 1974 Suid-Afrikaanse gebied was).

GeskiedenisWysig

 
Die Namibiese rugbyspan
 
Die Namibiese rugbyspan tydens die Rugbywêreldbeker 2015 teen die All Blacks
 
Rugbywedstryd tussen Namibië en Kenia op die Hage Geingob Rugbystadion in Windhoek, 2018
 
Die Namibiese rugbyspan tydens die Rugbywêreldbeker 2019 teen Italië

Rugby word sedert 1916 in Namibië gespeel toe dit deur Suid-Afrikaanse soldate wat die Duits-besette gebied binne geval het, aldaar gespeel is. Voor Namibiese onafhanklikheid in 1990 het die span van Suidwes-Afrika in die Curriebekerkompetisie gespeel. Die beste uitslag vir die span was in 1989 toe hulle derde geëindig het.

Die Namibiese Rugbyunie is in Maart 1990 opgerig en het in dieselfde maand by die Internasionale Rugbyraad aangesluit. Die span kon egter nie kwalifiseer vir die Rugbywêreldbeker in 1991 nie omdat hulle te laat onafhanklikheid verkry het. Die eerste paar jaar van die Namibiese Rugbyunie was relatief suksesvol omdat die spelers tot onlangs nog in die Curriebekerkompetisie gespeel het. ’n Hoogtepunt vir hulle was toe hulle in 1991 ’n tuisreeks teen Ierland en Italië met 2–0 gewen het. In daardie jaar het die Welwitschias al hul 10 toetse gewen, insluitend vyf seges oor Zimbabwe en een teen Portugal in Lissabon. Een van Namibië se spelers, André Stoop, is ’n kontrak aangebied om vir die Wigan Warriors in die Engelse rugbyligatoernooi te speel.

Gedurende die internasionale seisoene het Namibië ses wedstryde gespeel; die eerste was ’n oorwinning van 55–23 oor Zimbabwe, gevolg deur nog ’n oorwinning oor Zimbabwe; in 1993 het Namibië in Windhoek teen Wallis gespeel en met 23–38 verloor. Daarna het Namibië groot oorwinnings oor die Arabiese Golf, Kenia en Zimbabwe behaal in die aanvanklike rondes van kwalifisering vir die Rugbywêreldbeker in 1995.

Rusland het in 1994 in Namibië getoer en die tuisspan met 31–12 in Windhoek geklop. Hoewel Namibië daardie jaar teen Zimbabwe gewen het, het die span teen die Ivoorkus verloor en gelykop gespeel teen Marokko (altwee wedstryde in Casablanca). In 1996 het Namibië twee wedstryde gespeel, albei teen Zimbabwe, waarin hulle die eerste met twee punte verloor het en die tweede met een punt gewen het. In 1997 het hulle weer in twee wedstryde gespeel, hierdie keer teen Tonga en Zimbabwe, maar albei wedstryde verloor.

In 1998 het Namibië aan die Afrikatoernooie om kwalifikasie vir die Rugbywêreldbeker 1999 deelgeneem. Hulle het in rondte 3 begin, wat hulle as tweede na Zimbabwe volgens punteverskil afgesluit het (hulle het Zimbabwe geklop maar teen Tunisië verloor). Namibië het toe Ivoorkus, Marokko en Zimbabwe verslaan om sodoende vir die Rugbywêreldbeker 1999 te kwalifiseer.

Die span se deelname is in twyfel getrek toe die Namibiese regering se Sportkommissie die span verhinder het om aan ’n Suid-Afrikaanse kompetisie deel te neem wat as voorbereiding vir die toernooi sou dien, en gedreig om die span se deelname aan die Wêreldbeker stop te sit. Dit het op kritiek van nie-blanke rugbyklubs gevolg dat die Namibiese Rugbyunie rassistiese houdings getoon het.[2] Die span is egter toegelaat om deel te neem.

Die Rugbywêreldbeker 1999 het Namibië se debuut gesien en sedertdien tree hulle as Afrika se tweede verteenwoordiger na Suid-Afrika op. Terwyl hulle groot nederlae teen Frankryk, Fidji en Kanada moes toelaat, kon hulle teen Frankryk goed meeding en ’n vroeë drie druk en was na 20 minute gelykop.

As gevolg van ’n klein spelersbasis en die gebreek aan gereelde of sterk kompetisies het die span in die afgelope jare egter agteruitgegaan. Hul rekord in die rugbywêreldbekertoernooi is swak, aangesien hulle nog nie ’n oorwinning behaal het nie. Hul rekordnederlaag, 142–0 teen Australië tydens die Rugbywêreldbeker 2003, het daartoe gelei dat die kleiner spanne se teenwoordigheid by die toernooi bevraagteken is.

Namibië het aanvanklik tydens die kwalifisering vir die Rugbywêreldbeker 2003 gesukkel en ’n skoknederlaag teen Kenia gely, hul eerste nog teen een van die Groot Mere van Afrika-nasies, en later nog een teen Tunisië. Ná die verlies teen Kenia het die Namibiese span tot die 28ste plek op die IRR-ranglys geval. Nadat hulle Tunisië tuis verslaan het, het die span twee beslissende wedstryde teen Marokko gespeel om te bepaal wie van die twee Afrikanasies vir die Rugbywêreldbeker 2007 in Frankryk kan kwalifiseer. Namibië kon albei wedstryde oortuigend wen en dus aan die Rugbywêreldbeker 2007 deelneem.

As die span met die laagste plek op die ranglys tydens die afskop van die wêreldbekertoernooi, is vir Namibië geen kans in die openingswedstryd teen Ierland gesien nie. Die Namibiese span kon Ierland, destyds die vyfde span op die ranglys, egter teister en twee drieë druk om hul nouste wêreldbekernederlaag (17–32) op daardie stadium aan te teken. Hulle is toe deur Argentinië (63–3) en Frankryk (87–10) verslaan. In die wedstryd waar hulle glo die grootste kans vir ’n oorwinning gehad het, moes hulle 'n teleurstellende 30–0-nederlaag aan Georgië afstaan en het sodoende die toernooi sonder ’n oorwinning verlaat.

Die Afrikaspan kon die IRR Nasiesbekker in 2010 wen.

Namibië kon vir hul vierde agtereenvolgende wêreldbekertoernooi kwalifiseer nadat hulle Ivoorkus in 2011 verslaan het. Hulle is in Poel D, saam met Suid-Afrika, Wallis, Fidji en Samoa geloot. Hul eerste wedstryd tydens die Rugbywêreldbeker 2011, aangebied in Nieu-Seeland (op die Rotorua Internasionale Stadion) het met ’n 45–29-nederlaag teen Fidji geëindig. Hul tweede wedstryd was ’n 49–12-nederlaag teen Samoa en die derde ’n 87–0-nederlaag teen Suid-Afrika. In hul laaste poelwedstryd het Wallis sterk gespeel en Namibië moes twaalf drieë in ’n 81–7-nederlaag afstaan. Theuns Kotzé het een vertroosting vir sy span gegee, toe hy Heinz Koll se drie verdoel en sodoende Namibië se beste puntemaker in ’n wêreldbekertoernooi geword het.

Aan die einde van 2014 het Namibië ’n oorsese reis onderneem en toetse teen Duitsland, Kanada, ’n Franse Barbarian-span en Portugal gespeel. Namibië het teen Duitsland gewen maar die ander drie wedstryde verloor.

Die Welwitschias het aan die 2015-Vodacombeker deelgeneem, maar ses nederlae gely en een oorwinning oor die Limpopo Blou Bulle behaal. Namibië kon later daardie jaar vir sy vyfde Rugbywêreldbeker in 2015 kwalifiseer. Hulle is in Poel C, saam met Nieu-Seeland, Georgië, Tonga en Argentinië geloot. Hulle is deur Georgië met net een enkele punt verslaan (17-16), hul beste prestasie nog en het ook hul eerste (defensiewe) bonuspunt in die toernooi behaal.

Namibië kon weer vir die Rugbywêreldbeker 2019 kwalifiseer en is saam met Italië, Kanada, Nieu-Seeland en Suid-Afrika in Poel B geloot. Namibië het geen kans teen die drie Vlak 1-spanne gehad nie, maar kon drie drieë teen Italië aanteken. Hul laaste poelwedstryd teen Kanada is nes twee ander wedstryde weens tifoon Hagibis se verwoestinge afgelas en as 0–0-gelykop geag.[3]

RekordsWysig

Algehele rekordWysig

 
Namibië se plek op Wêreldrugby se ranglys vanaf 10 Oktober 2003 tot op hede

Namibië het teen 16 November 2019 89 van hulle 155 toetswedstryde gewen, ’n wenrekord van 57,42%.[4]

Namibië se toetsrekord teen alle lande: (Korrek op 16 November 2019)[4]

Teen Gespeel Gewen Verloor Gelykop % Gewen
 Arabiese Golf 1 1 0 0 100
  Argentinië 3 0 3 0 0
  Australië 1 0 1 0 0
  Duitsland 2 2 0 0 100
  Fidji 2 0 2 0 0
  Frankryk 2 0 2 0 0
  Frankryk XV 2 0 2 0 0
  Georgië 5 1 4 0 20
  Hongkong 1 1 0 0 100
   Ierland 4 2 2 0 50
  Italië 4 2 2 0 50
  Ivoorkus 4 2 1 1 50
  Kanada 2 0 2 0 0
  Kenia 11 9 2 0 81,82
  Madagaskar 4 3 1 0 75
  Marokko 8 5 2 1 62,50
  Nieu-Seeland 1 0 1 0 0
  Portugal 8 6 2 0 75
  Roemenië 6 1 5 0 16,67
  Rusland 7 2 5 0 28,57
  Samoa 2 0 2 0 0
  Skotland A 1 1 0 0 0
  Senegal 4 4 0 0 100
  Spanje 7 2 5 0 28,57
  Suid-Afrika 3 0 3 0 0
  Tonga 2 0 2 0 0
  Tunisië 11 8 3 0 72,73
  Uganda 5 4 1 0 80
  Uruguay 4 1 3 0 25
  Wallis 4 0 4 0 0
  Wes-Duitsland 1 1 0 0 100
  Zambië 2 2 0 0 100
  Zimbabwe 32 29 3 0 90,63
Totaal 155 89 64 2 57,42

WêreldbekerrekordWysig

Jaar Uitslag
1987 Geen deelname
1991 Geen deelname
1995 Geen deelname
1999 Poelfase
2003 Poelfase
2007 Poelfase
2011 Poelfase
2015 Poelfase
2019 Poelfase
2023 N.v.t.

VerwysingsWysig

  1. (en) "World Rugby Rankings". Wêreldrugby. Besoek op 16 November 2019.
  2. (en) Chris Hewett (29 April 1999). "Rugby Union: England bucks the global growth trend". The Independent. Besoek op 16 November 2019.
  3. (en) "Namibia v Canada match cancelled, Hanazono and Kumamoto matches go ahead". Rugby World Cup. 13 Oktober 2019. Besoek op 16 November 2019.
  4. 4,0 4,1 (en) "International Rugby Union Statistics – Namibia". ESPNscrum. Besoek op 16 November 2019.

Eksterne skakelsWysig