Argentynse Rugbyunie
Die Argentynse Rugbyunie (Spaans: Unión Argentina de Rugby, afgekort “UAR”) is die bestuursliggaam wat rugby in Argentinië beheer. Die unie is by Wêreldrugby geaffilieer en organiseer verskeie nasionale spanne, insluitend Argentinië se nasionale seniorrugbyspan vir mans (die Poemas), vroue en jeug. Hulle bestuur saam met Rugby Australia, Nieu-Seeland Rugby en die Suid-Afrikaanse Rugbyunie as ’n gesamentlike onderneming SANZAAR, die beheerliggaam van beide Superrugby en Die Rugbykampioenskap, die vernaamste rugbytoernooie in die Suidelike Halfrond. Die UAR hou ook toesig oor Sewesrugby in Argentinië en aangesien dit ’n Olimpiese sportsoort is, werk hulle met die Argentynse Nasionale Olimpiese Komitee saam.
| Argentynse Rugbyunie | |
|---|---|
 Kenteken van die Argentynse Rugbyunie
| |
| Spaanse naam | Unión Argentina de Rugby |
| Afkorting | UAR |
| Land |  Argentinië
|
| Sportsoorte | Rugby, Sewesrugby |
| Gestig op | 10 April 1899 |
| Gestig in | Buenos Aires, Argentinië |
| Lid van | Wêreldrugby |
| Aangesluit in | 1987 |
| Vastelandse beheerliggaam | Suid-Amerika Rugby |
| President | Marcelo Rodríguez |
| Amptelike taal | Spaans |
| Amptelike webwerf | uar.com.ar |
Die UAR is op 10 April 1899 as River Plate Rugby Union gestig[1] en het in 1987 by die Internasionale Rugbyraad (IRR, nou Wêreldrugby) aangesluit.[2] Die Argentynse Rugbyunie bestaan uit 25 plaaslike beheerliggame, wat elkeen ’n provinsie verteenwoordig. Die hoogste rugbyliga in Argentinië is die Nacional de Clubes, met die helfte van die spanne wat uit Buenos Aires afkomstig is en die ander helfte uit die provinsies.
Naas die amptelike nasionale span roep die UAR ook ander keurspanne byeen. Die Pumitas is die o/20-nasionale span en hulle neem aan die Wêreldrugby o/20-kampioenskap deel.[3] Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Die Argentina XV is die tweede nasionale span van Argentinië (XV verwys na die aantal spelers in rugby).
Bo die nasionale kampioenskap word jaarliks saam met spanne uit Australië, Nieu-Seeland en Suid-Afrika die internasionale Superrugbytoernooi uitgespeel. Sedert 2015 word Argentinië deur die Jaguares verteenwoordig. Hierdie professionele span sluit die nasionale spelers in, wat nie in die Europese rugbyligas speel nie. Aangesien die seisoene min oorvleuel word talle spelers in albei professionele ligas ingespan.
Nes Italië is Argentinië die enigste van die tien Vlak 1-rugbyspanne wat tot dusver nog nie ’n wedstryd tydens ’n rugbywêreldbekertoernooi gehuisves het nie, alhoewel hulle vir die Rugbywêreldbeker 2027 aansoek gedoen, maar dié bod ter ondersteuning van die Australiese s’n laat vaar het.[4][5]
Verwysings wysig
- ↑ (es) "Fundación del River Plate Rugby Union Championship (1899)". Club Atlético del Rosario. 18 April 2019. Besoek op 7 April 2021.
- ↑ (en) "Member Unions". Wêreldrugby. Besoek op 7 April 2021.
- ↑ (en) "World Rugby U20 Championship". Wêreldrugby. Besoek op 27 Maart 2021.
- ↑ (en) Mulvanney, Nick (16 April 2020). "Argentina ready to abandon 2027 Rugby World Cup bid making Australia strong favourites to host tournament". The Independent. Geargiveer vanaf die oorspronklike op 23 April 2020. Besoek op 7 April 2021.
- ↑ (en) Gillen, Nancy (16 April 2020). "Argentina withdraw 2027 Rugby World Cup bid to strengthen Australian campaign". insidethegames.biz. Geargiveer vanaf die oorspronklike op 29 April 2020. Besoek op 7 April 2021.