Botha Huis
Botha Huis was die amptelike vakansiehuis van die eerste ministers van Suid-Afrika. Nou is dit 'n spoggerige klein hotel.
Ligging
wysigBotha Huis lê in die Umdoni Park net suid van die dorpie Pennington aan die Natalse suidkus. Die huis word omring deur gholfbane, parke met wandelpaaie en die see.
Geskiedenis
wysigSuikerboer en politikus sir Frank Reynolds was goed bevriend met genl. Louis Botha. Reynolds het die groot koloniale gewelhuis met luukse binneversiering en met 'n puik see-uitsig vir Botha laat bou. Botha is egter oorlede voor die huis voltooi is, maar sy weduwee, Annie Botha, het die huis op 15 Mei 1920 betrek en daar gewoon tot met haar dood in 1937. Daarna het dit eers die vakansiehuis geword van die volgende premiers van die Unie van Suid-Afrika. Tydens die Tweede Wêreldoorlog is die huis tydelik gebruik as hersteloord vir offisiere. Vroeg in die 1950's was die huis in die nuus toe voorbereidings getref is vir die gebruik daarvan deur koning George VI. Hy was toe ernstig siek en was van plan om in die rustige omgewing van Umdoni Park te herstel. Sy dood op 5 Februarie 1952 het sy koms verhoed. Reynolds het met sy dood in September 1930 die huis sowel as 'n som geld vir die onderhoud daarvan aan die volk van Suid-Afrika bemaak.
Ander ampswonings
wysigAnder bekende ampswonings van goewerneurs, administrateurs, goewerneurs-generaal, presidente en premiers in Suid-Afrika is Groote Schuur, Krugerhuis, Genadendal (voorheen Westbrooke), Highstead, Mahlamba Ndlopfu (vroeër Libertas), Oliver Tambo Huis (eers bekend as Over-Vaal), John L. Dube Huis (dit was King's House), Leeuwenhof, Highclere en Oliewenhuis.