Burberry Group Plc is 'n Britse modehuis vir luukse klere wat sy hoofkwartier in Londen, Engeland het. Die onderneming, wat oorspronklik op buiteklere gefokus het, is in 1856 deur die 21-jarige Thomas Burberry gestig met die opening van sy eerste winkel in Basingstoke, Hampshire.[1] Later het die modehuis tot die mark vir luukse mode toegetree met die ontwikkeling van gabardien in 1879, 'n waterdigte tekstielvesel wat kan "asemhaal" en uitsluitlik deur Burberry vervaardig is, en die opening van sy eerste modewinkel in Haymarket, 'n straat in Sentraal-Londen.

Burberry
Tipe Privaat maatskappy
Gestig 1856 in Basingstoke, Hampshire, Engeland
Hoofkantoor LondenVlag van Verenigde Koninkryk Verenigde Koninkryk
SleutelpersoneThomas Burberry (stigter), Sir John Peace (voorsitter), Christopher Bailey (hoof uitvoerende beampte, hoofontwerper)
Gebied bedienWêreldwyd
IndustrieModebedryf
ProdukteMode vir dames, here en kinders; bybehore, geure, sonbrille, skoonheidsmiddels
Inkomste£2,766 miljard (2016/17)
Netto inkomste£395 miljoen (2016/17)
Werknemers10 000+ (2017)
WebwerfBurberry Plc
Die Burberry-winkel en vroeëre hoofkwartier in Haymarket, Londen
Burberry-modewinkel in Chicago met die kenmerkende 45 graad-ruitpatroon

Burberry se kenmerkende 45 graad-ruitpatroon, wat onder meer vir serpe gebruik is, het sy belangrikste – en mees gekopieerde – handelsmerke geword, net soos sy befaamde soldatejas (trenchcoat) wat, soos sy Engelse naam aandui, oorspronklik ontwerp is vir soldate wat dit tydens die Eerste Wêreldoorlog in loopgrawe gedra het. Dié jas, wat 'n tydlose mode-item geword het, was meer as 150 jaar lank in slegs twee kleure beskikbaar – kakie (stofkleurig) en swart – voordat in 2015 jasse vir sowel here as dames vir die eerste keer in rooi, wit en heuningkleur vervaardig is.

Burberry, wat naas mode ook 'n verskeidenheid bybehore, geure, sonbrille en skoonheidsmiddels bemark, was tot 1955 'n onafhanklike famile-onderneming. Intussen word dit as 'n publieke maatskappy bedryf waarvan die aandele op die Londense Effektebeurs genoteer word en deel uitmaak van die FTSE 100-indeks. Die onderneming bedryf meer as 500 modewinkels in 'n vyftigtal lande (waaronder vier in Suid-Afrika), maar verkoop sy produkte ook in konsessiewinkels.

Burberry het gaandeweg 'n vaste bestanddeel van Britse leefstyl en modekultuur geword,[2] soos weerspieël word in sy status as hofleweransier vir koningin Elizabeth II en Charles, Prins van Wallis. Burberry se buiteklere is deur Britse militariste, Suidpool-verkenners en lugvaartpioniers gedra. Sy suksesvolle bemarkingstrategieë het teen die middel van die 20ste eeu op bekende persoonlikhede uit die vermaaklikheidsbedryf gefokus. Burberry se produkte word in die Verenigde Koninkryk ontwerp en hier (onder meer in Burberry se gabardien-wewery in Cross Hills, 'n dorpie naby Keighley, en die soldatejas-aanleg in Castleford, Yorkshire, Noord-Engeland[3]) en elders in Europa vervaardig.

Verwysings wysig

Eksterne skakels wysig

Digitale bemarking