Caledoniese Vereniging

Die Caledoniese Vereniging is ‘n wêreldwye organisasie met die doel om die Skotse kultuur, geskiedenis en tradisies te handhaaf en versterk.

Doel

Lede van hierdie klub is gebore Skotte of hul direkte afstammelinge en wat hul band met hul land van herkoms koester. Daarom is die doel van die byeenkomste om die patriotisme vir Skotland aan te wakker.

Aktiwiteite

Sosiale byeenkomste word gewoonlik gehou om die dae te herdenk wat belangrik is in die geskiedenis van die Skotte. Sulke dae is veral

Halloween (Allerheiligeaand) op 31 Oktober
St. Andrew’s Nicht op 30 November
Hogmanay op 31 Desember en
Burns Nicht om die geboorte van Robert Burns op 25 Januarie 1759 te herdenk.

‘n Kenmerk van hierdie soort gesellighede is sang en dans. Mans woon dit gewoonlik by geklee in ‘n kilt (die tradisionele Skotse rokkie) in die juiste tartan (ruitpatroon) om te toon aan watter clan (familiegroep) hy behoort. Skotse danse word uitgevoer met musiek verskaf deur ‘n doedelsakorkes. Haggis, ‘n tradisionele Skotse gereg bestaande uit gekookte skaapharslag, kruie en meel word by sulke byeenkomste geëet.

Suid-Afrika

Oos-Londen se tak is reeds in 1876 gestig. Aan die einde van die 19de eeu was daar verskeie klubs versprei oor die hele Suider-Afrika. Vroeg in die 21ste eeu is daar ‘n tiental verenigings gesetel in die stede met die grootse tak in Johannesburg.

Die Suid-Afrikaanse Caledoniërs beskou hul oprigting in 1934 van 'n standbeeld van die sendeling en befaamde ontdekkingsreisiger, David Livingstone, by die Victoria-waterval as hul grootste prestasie. Die politici Patrick Duncan, Frederick Sturrock en meer onlangs Cameron Mackenzie, was waarskynlik die bekendste Suid-Afrikaanse lede.

Naam

Caledonia was die Romeine se naam vir Skotland.

Bibliografie

rampantscotland.com
robroy.co.za
tartansauthority.com
www.glartent.com