Die streek Drakenstein in die Boland is die vallei van die boloop van die Bergrivier sowel as die vallei van sy sytak die Dwarsrivier.

Ligging wysig

Aan die noordekant strek dit tot by die Paarl. Aan die oostekant word dit deur die Klein-Drakensteinberge, aan die suide deur die Groot-Drakensteinberge en aan die westekant deur die Simonsberg begrens. Die Helshoogtepas en Banghoek is die suidelikste punt. Paarl en Franschhoek is die grootste dorpe. Kleiner dorpe is Kylemore, Johannesdal, Pniel, Languedoc, Simondium, Groendal en Val de Vie. Twee groot opgaardamme is in die gebied, naamlik die Bergrivierdam en die Wemmershoekdam. Bridge House School en die Drakenstein-gevangenis is op die oewer van die Bergrivier. Metterjare het die suidelike deel van die area in die rigting van Franschhoek en Stellenbosch bekend geword as Groot-Drakenstein en die deel naby die Paarl aan die voet van die Du Toitskloof as Klein-Drakenstein.

Ekonomie wysig

Die ekonomie van die streek berus op toerisme en boerdery. Afgesien van druiwe lewer die plase ook pere, pruime, perskes en appelkose. Dit is die bakermat van die Suid-Afrikaanse sagtevrugtebedryf. Vanaf 1886 word vrugte na Europa uitgevoer. Deur die bemoeienis van onder andere Cecil John Rhodes, Leander Starr Jameson, Abe Bailey en Henry Ernest Pickstone is Rhodes Fruit Farms (RFF) gestig en het verskeie van die historiese plase onder die firma se beheer gekom.

Geskiedenis wysig

 
Huis Drakensteyn

Simon van der Stel het die streek vernoem na kommissaris-generaal Hendrik Adriaan van Reede tot Drakestein wat die Kaap in 1687 besoek het op sy reis na Nederlands-Indië. Hy was die broer van Gerard van Reede wat die eienaar van die landhuis Drakensteyn was. Vandag is dit die eiendom van prinses Beatrix, die vroeër koningin van Nederland. In Oktober 1687 het Van der Stel in die streek Drakenstein ‘n 29 plase beskikbaar gestel vir boerdery. Teenswoordig het nog verskeie hul oorspronklike name, soos byvoorbeeld Boschendal, Rhône, Bien Donné, Lekkerwyn, La Motte, Bellingham, Languedoc, Delta, La Provence en Bethlehem (Kylemore).

Lees ook wysig

Bibliografie wysig