Elgin

Elgin is ‘n landboustreek in die Overberg en veral bekend om sy appelplase.

Elgin (Koffiekraal)
Elgin
Koördinate: 34°8′55″S 19°2′34″O
Land	Suid-Afrika
Provinsie	Wes-Kaap
Distriksmunisipaliteit	Overberg
Plaaslike Munisipaliteit	Theewaterskloof
Tydsone	UTC+2 (SAST)
Poskode	7180

Die Orchard-padstal buite Elgin en langs die N2.

Ligging

Elgin lê in die Overberg-distriksmunisipaliteit, oos van die Hottentots-Hollandberge en suid van die Groenlandberg. Dit is ‘n 70km suidoos van Kaapstad en langs die pad tussen Grabouw en Villiersdorp en die spoorlyn na Caledon. Die Palmietrivier loop verby die plaas Glen Elgin.

Boerdery

Die gebied lê hoog en ondervind koue en nat winters en matige somers. Daar word met sagtevrugte, aartappels, varke en snyblomme geboer. Plantasies lewer hout. Sedert 1966 word op die plaas Applethwaite appelsap uit oorskiet appels vervaardig. Verskeie verpakkingsbedrywe en koelkamers is hier gevestig.

Geskiedenis

Aanvanklik was die gebied bekend onder die name Groenland en Koffiekraal. Laasgenoemde was ‘n uitspanning vir die ossewaens na hul trek oor die berge op pad na die noorde. Later jare was die uitspanning deel van die plaas Glen Elgin, die eiendom van Edward en Henry Molteno, die seuns van die eerste premier van die Kaapkolonie, John Molteno (1814-1886). Toe die spoorlyn in 1902 verleng word, skenk die Molteno-broers uit eie belang ‘n stuk grond van hul plaas aan die Cape Government Railways vir ‘n stasie. Daarom is die stasie ‘n 2 km van die dorp Grabouw aangelê. Weens die ekonomiese bedrywighede wat rondom die stasie ontwikkel het, het die naam Elgin deur die jare al meer bekend geword en dui dit nou ‘n landstreek aan met Grabouw as hoofdorp.