Erik Homburger Erikson (15 Junie 1902 - 12 Mei 1994) was 'n Duits-Amerikaanse ontwikkelingsielkundige bekend vir sy teorie oor die sosiale ontwikkeling van die mens en as skepper van die uitdrukking "identiteitskrisis".

Erik Erikson
Erik Erikson.png
Geboortenaam Erik Homburger Erikson
Gebore 15 Junie 1902
Frankfurt am Main, Duitse Keiserryk
Oorlede 12 Mei 1994 (op 91)
Harwich, Massachusetts
Burgerskap Vlag van Duitsland Duitsland
Vlag van Verenigde State van Amerika Verenigde State
Nasionaliteit Vlag van Duitsland Duitsland
Vakgebied Ontwikkelingsielkunde
Instelling(s) Yale
Universiteit van Kalifornië, Berkeley
Universiteit van Pittsburgh
Harvard- Mediese Skool
Bekend vir Teorie oor sosiale ontwikkeling
Invloed op Sigmund Freud, Anna Freud

BiografieWysig

Erikson het nooit sy pa geken nie, want dié het sy ma gelos nog voor sy geboorte. Sy ma, Karla Abrahamsen, was Joods. Toe Erik drie jaar oud was, het sy ma met dr. Theodor Homberger getrou. Die gesin het verhuis na Karlsruhe, in die suide van Duitsland.

Hy wou ná hoërskool 'n kunstenaar word en het in dié dae 'n Boheemse leefstyl gevolg, lank voordat dit mode sou word. Hy het 'n onderwyser by 'n eksperimentele Amerikaanse skool in Wene geword toe hy 25 jaar oud was. In dié tydperk het hy hom in die Montessori-opvoedingstelsel bekwaam en by die Weense Psigoanalitiese Vereniging aangesluit. Anna Freud het hom in dié tyd gepsigoanaliseer. Hy het ook verlief geraak op 'n Kanadese dansonderwyseres en is met haar getroud.

Die egpaar verlaat Wene toe die Nazi's aan die bewind kom en hy doseer uiteindelik aan die Harvard-universiteit in Boston. Later is hy 'n dosent aan die Yale-universiteit en daarna aan die Universiteit van Kalifornië, Berkeley. Dit is by hierdie universiteit dat sy beroemde navorsing oor die Lakota en die Yurok lyf begin kry.

In 1950 publiseer hy Childhood and Society. Die boek beskryf sy sienings oor die inheemse Amerikaners, sy ontledings van Maksim Gorki en Adolf Hitler, en bevat 'n bespreking oor die "Amerikaanse persoonlikheid" asook 'n raamwerk van sy eie ontwikkelende siening van Sigmund Freud se teorie. In latere werke ontwikkel hy die temas verder. Een van sy boeke. Gandhi's Truth, wen die Pulitzerprys, asook die Nasionale Boeketoekenning.

In dieselfde jaar, 1950, verlaat Erik die Berkeley-kampus, te midde van die hoogtepunt van senator Joseph McCarthy se heksejag teen kommunisme. Hy werk daarna 'n dekade lank by 'n gesondheidskliniek in Massachusetts en nog 'n dekade lank by Harvard. Hy tree in 1970 af en doen daarna navorsingswerk, waarin sy vrou hom bystaan.

Hy is in 1994 op 91-jarige ouderdom oorlede.

BibliografieWysig

Belangrikste werke:

  • Childhood and Society (1950)
  • Young Man Luther. A study in Psychoanalysis and History (1958)
  • Gandhi's Truth: On the Origin of Militant Nonviolence (1969)
  • Adulthood (geredigeerde boek, 1978)
  • Vital Involvement in Old Age (saam met J.M. Erikson en H. Kivnick, 1986)
  • The Life Cycle Completed (saam met J.M. Erikson, 1997)

Versamelings:

  • Identity and the Life Cycle. Gekeurde briewe (1959)
  • A Way of Looking at Things. Gekeurde briewe 1930-1980 (redakteur: S.P. Schlien, 1995)
  • The Erik Erikson Reader (redakteur: Robert Coles, 2001)

Verwante werke:

  • Identity's Architect: A Biography of Erik H. Erikson (Lawrence J. Freidman en Robert Coles, 1999)
  • Erik Erikson, His Life, Work, and Significance (Kit Welchman, 2000)