Federale Volksbeleggings
Federale Volksbeleggings Beperk (FVB) is ‘n finansiële instelling wat gestig is met die oog op die ekonomiese bemagtiging van die Afrikaner.
Agtergrond wysig
Weens aanhoudende droogte en die depressie was die Afrikaner vroeg in die 20ste eeu erg verarm. Helaas het die Afrikaner van homself gedink dat hy nie die geaardheid vir deelname aan die sakewêreld het nie. Op die Ekonomiese Volkskongres wat die FAK vir 3 tot 5 Oktober 1939 in Bloemfontein gereël het, het dr. M.S. Louw, prof. C.G.W. Schuhmann en dr. T.E. Dönges die toetrede van die Afrikaner tot die handel en nywerheid bepleit. Hulle het voorgestel dat ‘n Afrikaanse beleggingsmaatskappy gestig moet word om die Afrikaner se ideaal van ekonomiese onafhanklikheid na te streef deur die Afrikaner by die handel en nywerheid te betrek. Hulle koopkrag en kapitaal moes aangewend word om hulle eie mense op te hef tot ekonomiese selfstandigheid. Hierin is hulle gesteun deur o.a. Die Burger, die Helpmekaarfonds, Santam en Sanlam.
Beleggings wysig
Op 8 Julie 1940 word die finansieringsmaatskappy FVB gestig met dr. Charlie Louw as eerste voorsitter en C.H. Brink, W.B. Coetzer en dr. P.E. Rossouw as bestuurspan met ‘n hoofkantoor in Kaapstad. Ten spyte van aanvanklik baie teenkanting ontwikkel dit tot een van die grootste instellings in sy soort in die land. Om die aandeelhouers se bates te beskerm, is die kapitaal belê in byna elke sektor van die plaaslike ekonomie. ‘n Kenmerk van FVB was sy besondere vermoë om suksesvolle vennootskappe met ander maatskappye te sluit. Reeds in 1941 doen FVB groot beleggings in die visbedryf en die vervaardiging van landbougereedskap. Die volgende jaar is dit betrokke by die Klipfonteinsteenkoolmyn. Dit loop in 1953 uit op die stigting van Federale Mynbou. Een van FVB se eerste lenings het gegaan aan Anton Rupert se Rembrandt-sigaretmaatskappy. In 1954 steun die FVB die stigting van Jan S. Marais se Trust Bank. Na ‘n ooreenkoms in 1963 tussen FVB en die Anglo-American-korporasie word Mainstraat Beleggings gestig en verkry FVB die jaar daarop beheer oor die General Mining and Financial Corporation. Vroeg in die 1970’s vind ‘n herskikking van FVB se bates plaas. Daarna word die firma se grootste beleggings gehuisves in die finansiële, chemiese en nywerheidsektore van die beurs.
Lees ook wysig
Bibliografie wysig
- Pretorius, F. (red.): Geskiedenis van Suid-Afrika – van voortye tot vandag. Kaapstad: Tafelberg, 2012. ISBN 978-0-624-05466-5
- gelofteland.org