Frank Quint
Dr. Frank Quint was Suid-Afrika se eerste bruin ambassadeur. Hy is in 1987 deur pres. P.W. Botha as SA se ambassadeur in die Nederland aangestel en beklee die pos tot in 1990.[1]
Frank Quint | |
|---|---|
| Gebore | Frank James Lloyd Quint 10 April 1921 Worcester, Kaapprovinsie |
| Sterf | 19 Februarie 2003 (op 81) |
| Nasionaliteit | Suid-Afrika |
| Beroep | Onderwyser, ambassadeur |
| Bekend vir | Eerste bruin ambassadeur |
| Eggenoot | Sophia Freda Lyners |
| Kinders | Drie dogters, twee seuns |
Biografie
wysigFrank James Lloyd Quint is op 10 April 1921 op Worcester gebore. Hy was die jongste van twee broers. Sy pa, Samuel, was 'n skrynwerker en sy ma, Lenie, 'n huisvrou.
Na afloop van sy studies aan die Wesley-onderwyskollege in Kaapstad begin hy in 1942 sy loopbaan as onderwyser op Steinkopf in die Namakwaland. Hy was die eerste persoon wat 'n doktorsgraad in opvoedkunde aan die Universiteit van Wes-Kaapland verwerf het. Hy was ook die eerste bruin rektor van die Hewat-onderwyserskollege in Athlone.
Quint was onder meer lid van die SAUK-raad en 'n stigterslid van die Staatsdiensliga. Hy het ook etlike jare lank rubrieke vir Die Burger en Rapport geskryf.
Op 12 Januarie 1987 begin Quint sy ampstermyn as Suid-Afrika se eerste bruin ambassadeur in Nederland. Met sy vertrek noem hy dat hy sy familiegeskiedenis wil gaan navors: "Die eerste Quint, 'n vrou, het op 16 Desember 1658 hier aan wal gestap. In Utrecht is blykbaar nog van dié Quints". Met sy aankoms is hy deur anti-apartheidsbetogings begroet. Hy beklee die pos tot in 1990.[2]
Quint is op 19 Februarie 2003, op 81-jarige ouderdom ná 'n kort siekte in Kaapstad oorlede. Hy word oorleef deur sy vrou, Sophia, dogters, Louise, Linda en Eleanor, seuns, Sammy en Charles, en ses kleindogters en een kleinseun.[3]
Verwysings
wysig- ↑ Frank Quint 1921 -- 2003, Die Burger, 1 Maart 2003
- ↑ Frank Quint: Nederland let op uw (eigen) saeck![dooie skakel], besoek op 12 Januarie 2014
- ↑ Oudambassadeur oorlede, Volksblad, 21 Februarie 2003