Gereformeerde kerk Kempton Park-Mooifontein

Die Gereformeerde kerk Kempton Park-Mooifontein was die jongste van die drie gemeentes van die Gereformeerde Kerke in Suid-Afrika in die Oos-Randse stad Kempton Park. In September 2024 het die gemeente ontbind toe die sowat 150 Afrikaanse lidmate met attestaat oorgegaan het na Kempton Park-Noord en die Engelse lidmate die nuwe Reformed Church Mooifontein gestig het.

Gereformeerde Kerk Kempton Park-Mooifontein
Sluit in	Birchleigh Birchleigh-Noord Chloorkop Edleen Esselenpark Kempton Park-Wes Marmaret-aftreedorp Norkempark Restonvale Terenure Van Riebeeckpark
Klassis	Sentraal-Oos-Rand
Huidige predikant(e)	Louis Aucamp B.C. Zulu
Belydende lidmate	254
Dooplidmate	43
Adres	H.v. Oranjerievier- en Bergrivierrylaan Terenure
Geskiedenis
Stigtingsdatum	7 April 1976
Afgestig van	Kempton Park-Noord
Eerste predikant	C.J. van Vuuren (1976–2000)
Datum ontbind	30 September 2024

Die kerkgebou op die hoek van Oranjerivier- en Bergrivierrylaan, Terenure.

Ds. Lammert Stavast was van 1983 tot 1986 die gemeente se tweede leraar. Dit was sy voorlaaste gemeente.

Ds. C.J. van Vuuren het die gedenksteen van die kerkgebou op 7 April 1979 onthul.

’n Groep wyke het op 9 April 1976 van die Kempton Park-Noord afgestig, wat op sy beurt in 1966 van die Kempton Park afgestig het. Dit was destyds ’n besonder groot gemeente en skoolsale was te klein om al die kerkgangers tydens eredienste te huisves. Dadelik het die kerkraad aan die werk gespring om ’n eie kerkgebou op te rig terwyl die gemeente intussen nog Kempton Park-Noord se kerk gebruik het.

Victor Pieterson is as argitek aangestel en Jurgens Bouers (heel gepas) as bouaannemer. Die eerste slote is op ’n landbouhoewe gegrawe en op 7 April 1979 het ds. C.J. van Vuuren die gedenksteen onthul. ’n Lidmaat het ’n hek met ’n sewekandelaarpatroon vir die ingang na die perseel gemaak, maar dis skaars ’n jaar later gesteel en nie vervang nie.

Die voltooide kerk is plegtig ingewy op 12 Januarie 1980. Die ontwerp is eenvoudig en hoewel die muur bokant die ingang hoër gebou is om ’n toring voor te stel, is dit nie ’n toring in die ware sit van die woord nie. ’n Groot swaaideur van hout lei na die binneruim waar die preekstoel en Kanselbybel die fokuspunt is. ’n Moederskamer is nie gebou nie omdat die boukommissie gereken het moeders en hul kinders hoort binne-in die erediens.

Adelheid van Vuuren, ’n lidmaat, het die deur oopgesluit met die amptelike ingebruikneming en daarna het die gemeente met begeleiding deur orrel en trompet die voltooide gebou binnegegaan. Johanna Roets, een van die oudste lidmate, het ’n Kanselbybel aan die gemeente oorhandig. Die meganiese orrel is deur Fehrle en Roeleveld ontwerp. Later is by die kerkgebou ingebreek en die orrel so erg beskadig dat die herstelkoste drie keer meer as die aankoopprys was.

Einde 1997, toe Birchleigh, 'n dogtergemeente van Mooifontein, ook nog bestaan het, het dié twee gemeente saam 693 belydende lidmate gehad. ’n Jaar ná Birchleigh se inlywing, einde 2001, was Mooifontein se lidmaattal 611, maar in die daaropvolgende 13 jaar tot einde 2014 het dit afgeneem tot 330. In die laaste dekade van sy bestaan het dit meer as halveer.

Predikante

1. Van Vuuren, Christoffel Johannes, 1976–2000 (aanvaar sy emeritaat)
2. Stavast, Lammert Hendrik, 1983–1986
3. Van der Walt, Jan Pelser, 1987–1989 (waarna Birchleigh tot 1990
4. Van Blerk, Petrus Johannes, 2000–2005 (voorheen van 1991 af Birchleigh se tweede en laaste predikant)
5. Eloff, Johannes Marthinus, 2001–2007 (verlaat die bediening)
6. Aucamp, Johannes Louis, 2008 – 2024

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1957. Almanak van die Gereformeerde Kerk in Suid-Afrika vir die jaar 1958. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.

Eksterne skakel

• (af) Die gemeente se webtuiste. URL besoek op 23 November 2015.