Gereformeerde kerk Kleinmond
Die Gereformeerde kerk Kleinmond is die derde jongste van die 20 gemeentes in die GKSA se Klassis Boland wat die hele Wes-Kaap beslaan asook die westelike uithoeke van die Noord-Kaap. Einde 2015 het die gemeente 92 belydende en vyf dooplidmate gehad, vergeleke met 86 en nege einde 2011. Die buitengewone lae persentasie dooplidmate is daaraan te wyte dat die meeste dorpe binne die gemeentegrense, naamlik Kleinmond, Bettysbaai, Pringlebaai en Rooiels, gewilde aftreeplekke is. Die enigste uitsonderings is Caledon en Botrivier, maar daar woon waarskynlik bitter min van die lidmate. Terwyl Kleinmond se sieletal dus met twee toegeneem het (2,1 persent), het die hele Gereformeerde Kerkverband se sieletal in dieselfde tydperk van 77 036 tot 69 507 afgeneem, 'n afname van 9,8 persent, oftewel amper 2,5 persent per jaar.
| Gereformeerde Kerk Kleinmond | ||
| ||
| Sluit in | Bettysbaai Botrivier Caledon Kleinmond Pringlebaai Rooi-els | |
| Denominasie | Gereformeerde Kerk | |
| Klassis | Klassis Boland | |
| Huidige predikant(e) | Jan van Straaten | |
| Belydende lidmate | 116 | |
| Dooplidmate | 12 | |
| Adres | H.v. Dertiende Laan en Sesde Straat, Kleinmond | |
| Geskiedenis | ||
| Stigtingsdatum | 25 Februarie 2006 | |
| Afgestig van | Strand | |
| Eerste predikant | Geen tot dusver | |
Die verspreidwonendes in die Overstrand en Overberg is vanaf 1979 deur die Gereformeerde kerk Strand bedien. In 1983 het die gebied Kleinmond, Bettiesbaai en Caledon 'n afsonderlike wyk met Willie Venter as eerste ouderling geword. Dienste is een maal per kwartaal op Kleinmond gehou. Van 1991 af is die Fellowship-kerkgebou op Kleinmond gebruik en is dienste elke Sondagmiddag om vieruur gehou. Vanaf 26 Desember 1999 is elke Sondag 'n erediens op Kleinmond gehou en van 27 Februarie 2000 is die Nagmaal elke kwartaal hier gevier.
Reeds in 1995 het plaaslike lidmate geld vir die bou van ’n eie kerkgebou begin insamel. Dié gebou is ontwerp C. Jacobs, lidmaat. Die ontwerp is eenvoudig dog doelmatig en dis pragtig geleë aan die voet van die berg tussen fynbos en proteas. Die koste was R331 248,91 en is ten volle betaal. Baie geld is bespaar deurdat die lidmate self al die afwerkings gedoen het. Die gebou is binne vier maande sodanig voltooi dat twee dienste vanaf Desember 2002 gehou kon word. Twee lidmate het al die houtwerk gedoen. Die preekstoel is van kamferhout, afkomstig uit die distrik Swellendam.
Op 1 Maart 2003 is die nuwe kerk in gebruik geneem en die hoeksteen deur Danie Oppermann, ’n lidmaat, gelê met die inskripsie: "Soli Deo Gloria". Die gemeente het 'n pyporrel wat gefinansier is deur een van die vrouelidmate.
In 2003 het Kleinmond finansiële selfstandigheid van die Strand verkry en op 1 Februarie 2006 het die Klassis Boland toestemming tot afstigting verleen sodat Kleinmond op 25 Februarie 2006 'n volwaardige gemeente kon word.
Predikante
wysig- Jan van Straaten
Bronne
wysig- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
- (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.