Gereformeerde kerk Strand

Die Gereformeerde kerk Strand is die sewende jongste van die 20 gemeentes in die Gereformeerde Kerke in Suid-Afrika se Klassis Boland, wat die hele Wes-Kaap en aanliggende dele van die Noord-Kaap se westelike uithoeke beslaan.

Gereformeerde Kerk Strand
Sluit in	Gordonsbaai Grabouw Somerset-Wes Strand
Denominasie	Gereformeerde Kerk
Klassis	Klassis Boland
Huidige predikant(e)	D.G. (Dinant) Zwemstra
Belydende lidmate	326
Dooplidmate	54
Adres	Altenaweg, Strand
Geskiedenis
Stigtingsdatum	27 Mei 1978
Afgestig van	Stellenbosch
Eerste predikant	J.H. van Wyk (1978–'80)

Die Gereformeerde kerk Strand in Altenaweg, Strand.

Dr. Jan Harm (Amie) van Wyk, leraar van 1978 tot 1981.

Dr. Cassie Venter toe hy vierdejaarstudent aan die Teologiese Skool Potchefstroom was. Hy was predikant hier van 1982 tot 1982 (in kombinasie met Stellenbosch).

Ds. Dinant Zwemstra van die Strand bevestig sy broer, dr. Heinrich Zwemstra, op 3 Desember 2017 in die Gereformeerde kerk Walvisbaai.

Einde 2015 was hier 271 belydende en 54 dooplidmate, die sesde grootste gemeente in die Klassis. In 2001 was die syfers onderskeidelik 397 en 114, maar in 2006 het twee nuwe gemeentes van Strand afgestig. Saam het Strand en die drie afgestigte gemeentes in 2015 552 belydende lidmate gehad.

Die eerste Gereformeerde lidmate wat hulle in die Helderberg kom vestig het, was Hein en Maxie Hamersma, wat in 1960 in die Strand kom woon het. Mettertyd het die Gereformeerdes hier en op Somerset-Wes en Gordonsbaai geleidelik toegeneem. Aan die begin was die kerklike bediening uit Kaapstad en later Stellenbosch, gestig in 1967. Van 1974 af is twee eredienste per maand in die Strand gehou vir die lidmate wat toe behoort het tot die Gereformeerde kerk Stellenbosch en Bellville.

In 1978 het die plaaslike wyke as die Gereformeerde kerk Strand afgestig en het hulle eredienste gehou in die kerkgebou van die Sewendedagadventiste. Op 17 Februarie 1980 het die gemeente besluit om haar eie kerk op te rig wat op 29 November daardie jaar in gebruik geneem is. Francois Fehrsen was die argitek. Die eerste twee lidmate in die omgewing het heel gepas die hoeksteen gelê. Hertzog Boersema het die deur simbolies oopgesluit. Danksy al die werk wat lidmate self kon doen, is die kerkgebou se koste tot R60 000 beperk, destyds min of meer twee keer die koste van ’n deursneewoonhuis. Taetse Hamersma, ’n broerskind van Hein Hamersma, het die hoeksteen van die kerksaal onthul.

In 1988 het die gemeente ’n aansienlike erflating bekom en is besluit om die kerkgebou, wat toe te klein geword het vanweë die toenemende getal lidmate, te vergroot. Van hierdie gemeente het in 2000 Hermanus, in 2006 Kleinmond en in dieselfde jaar Agulhas (Bredasdorp) afgestig. Elkeen van dié gemeentes het intussen hul eie kerkgebou opgerig.

Predikante

1. Van Wyk, dr. Jan Harm, 1978 – 1981 (in kombinasie met Stellenbosch)
2. Venter, dr. Casper Jan Hendrik, 1981 – 1982 (in kombinasie met Stellenbosch)
3. Aucamp, Petrus, 1982 – 1991 (oorgegaan na die Afrikaanse Protestantse Kerk)
4. Du Plooy, Jan Louis, 1991 – 1998
5. Van der Walt, Jan Pelser, 1998 – 2015 (van 2006 – 2007 in kombinasie met Agulhas)
6. Zwemstra, Dinant Gerrit, 2015 – hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Venter, ds. A.A. (hoofred.) 1960. Die Almanak van die Gereformeerde Kerke in Suid-Afrika vir die jaar 1961. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.