Heinrich Zwemstra

Dr. Heinrich Martin Zwemstra (gebore Randfontein, Transvaal, 17 Februarie 1978) is sedert 2005 ’n predikant in die Gereformeerde Kerke in Suid-Afrika, terwyl hy van 2008 tot einde 2011 in Zambië werksaam was waar hy sendingwerk gedoen en predikante opgelei het.

Dr. Heinrich Zwemstra
Dr Zwemstra spreek die seën uit oor die Gereformeerde kerk Walvisbaai op die dag van sy bevestiging, 3 Desember 2017.
Naam	Heinrich Martin Zwemstra
Geboorte	17 Februarie 1978 Randfontein, Transvaal
Kerkverband	Gereformeerd
Gemeente(s)	Vereeniging '95 2005–2008 Zambië (sendingopdrag) 2008–2011 Pretoria-Annlin 2012–2017 Walvisbaai 2017.
Jare aktief	2005–hede
Kweekskool	Potchefstroom

Herkoms en jeug

Heinrich Zwemstra se ouers is Pieter Zwemstra (gebore 4 Februarie 1952) en Cornelia Petronella van de Ruitenbeek (gebore 28 September 1952). Sy ma, wie se noemnaam Corrie is, het in Augustus 1970 uit Nederland na Suid-Afrika geëmigreer en sy pa in September 1972. Sy ouers het mekaar in Suid-Afrika ontmoet en is op 5 Oktober 1974 getroud. Vier seuns is uit die huwelik gebore, van wie Heinrich die tweede oudste is. Pieter, 'n regsadviseur, is gebore op 17 Junie 1976, Dinant Gerrit, ook 'n Gereformeerde predikant, op 23 Oktober 1982 en Marius, 'n meganiese ingenieur, op 3 Oktober 1989, langer as 13 jaar ná Pieter.

Heinrich was een jaar oud toe sy ouers na Alberton verhuis. Daar het sy skoolloopbaan aan die Laerskool Jan Meyer (1985–'88) begin. Op 10-jarige ouderdom het die gesin verhuis na ’n kleinhoewe op Kliprivier (’n dorpie tussen Alberton en Vereeniging), waar hy skoolgegaan het aan die Laerskool Sybrand van Niekerk (1988-'91). Op Kliprivier het hy hom besig gehou met boerdery, motorfietse, trekkers, ’n bietjie kattekwaad en ontdekkingstogte in die omgewing.

Heinrich se eerste hoërskool was die Hoërskool Palmietfontein (1992-'93) op Alberton, en nadat dié skool met die Hoërskool Die Varing saamgesmelt het, aan die Hoërskool Dinamika (1994-'96), die verenigde skool se nuwe naam, waar hy einde 1996 gematrikuleer het. Op 16-jarige ouderdom het die gesin (teen Heinrich se sin) terug Alberton toe getrek. Op die hoewe op Kliprivier kon hy doen wat hy wou, naamlik boer en hom besig hou met allerhande uitvindsels. Tydens sy verblyf op Alberton het hy ’n belangstelling in elektronika, rekenaars en programmering ontwikkel. In st. 9 (1995) het hy die radioamateurseksamen geslaag is, is hy as radioamateur geregistreer.

Tydens sy skooljare het Heinrich aan verskillende sportsoorte deelgeneem, soos rugby, atletiek, landloop en skyfskiet. Hy was veral lief vir 800 m, 1 500 m en landloop, en het meermale daarin presteer. Op laerskool was hy hoofseun en op hoërskool is hy gekies vir die leerlingraad, maar kort daarna het hy hom aan die leerlingraad onttrek omdat dit op daardie stadium nie deel van sy agenda was nie.

Universiteit

Prop. Zwemstra (regs) se beroepbaarstelling deur die Streeksinode Noordwes op 23 November 2004 saam met propp. Ockie Struwig (lmiddel) en Henning Venter (links).

Ná matriek het Heinrich sy studie in elektroniese ingenieurswese aan die PU vir CHO begin. Sy plan was immers om uitvindsels te doen en later te gaan boer. Maar daar was ’n ander plan met sy lewe. Hy vertel: "Tydens my eerste twee universiteitsjare het die Here my op ’n besonderse manier gewys en geleer dat my liefde vir God en die Bybel (wat ek van kleins af gehad het), gekoppel is aan liefde vir die kerk. Gelowiges kan hulle nie van ander isoleer nie, maar moet ook medegelowiges liefhê en saam met hulle diensbaar wees!" In dié tyd het Heinrich bewus geword van sy roeping om teologie te studeer sodat hy as predikant of sendeling diensbaar in die kerk kon wees.

In sy derde jaar het hy met sy teologiese studie begin. Tog wou hy die ingenieurstudie waarmee hy begin het, klaarmaak. Hy verander sy ingenieurswese na B.Sc met wiskunde en toegepaste wiskunde as hoofvakke. Die gevolg was dat hy in sy derde en vierdejaar baie hard moes werk om wiskunde, toegepaste wiskunde, Hebreeus, Grieks, Latyn, Duits en ’n paar teologiese vakke te bemeester. Aan die einde van sy vierde jaar het hy die B.Sc.-graad voltooi asook al die voorvereiste vakke om in te skryf vir B.Th. (Hons.). In sy vyfde jaar het hy toe die B.Th. (Hons.) voltooi, in sy sesde jaar die M.Div en in sy sewende jaar die M.Th.

In 2004 het Heinrich begin met sy Ph.D., wat hy in 2007 voltooi het. Die titel van sy proefskrif is: Die roeping van die kerk ten opsigte van sosio-ekonomiese regte in Suid-Afrika: ’n Teologies-etiese studie.

Tydens sy sewe jaar in Potchefstroom was Heinrich op verskillende manier betrokke by die universiteit en die kerk. Hy was deel van Villagers (dorpskoshuis) en tydens sy tweede en derde jaar het hy in die komitee van Radio Puk as tegniese bestuurder gedien. In sy sesde en sewende jaar was hy deeltydse dosent van die universiteit wat ekstra wiskundeklasse in Engels aangebied het vir eerstejaar ingenieurstudente. Hy was lidmaat van die Gereformeerde kerk Potchefstroom-Noord (nou Die Bult) – ’n gemeente waar hy baie goed kon inskakel en waaraan hy baie mooi herinneringe het. In hierdie gemeente het hy as diaken en ouderlinge gedien. Hy was ook betrokke by jeugkampe, uitreikaksies en ook die Koningskinders.

Gesinslewe

Ds. M.J.J. Erasmus het Heinrich op 24 November 2001 in die Gereformeerde kerk Lichtenburg met Jacomien Wille in die huwelik bevestig. Jacomien is op 14 Oktober 1980 op Lichtenburg gebore as ’n dogter van Jacobus Wille (21 Junie 1927 – 15 Augustus 2000) en Susanna Phillipina Helena Roets (4 Maart 1936 –oorlede 29 Maart 2013). Heinrich en Jacomien het mekaar ontmoet in Potchefstroom, waar sy ook studeer het en die grade B.Th., B.A. (Hons.) en M.A. (Bybelse Grieks) voltooi het. Die egpaar vertel sy en haar het, het saam ’n liefde vir God, vir sy Woord en vir sy kerk.

Uit hul huwelik is drie kinders gebore: Jacobus (18 November 2003 in Potchefstroom), Nelrie (3 Augustus 2005 in Vereeniging) en Anel (7 Mei 2010 op Thabazimbi).

Gemeentebediening

Dr. Zwemstra, sy vrou, Jacomien, en hul kinders: Nelrie, Anel en Jacobus

Terwyl Heinrich besig was met sy Ph.D.-studie, waarvoor hy in 2004 ingeskryf het, het hy hulpdiens gedoen in die Gereformeerde kerk Heidelberg. Op 6 Februarie 2005 is hy in sy eerste gemeente bevestig, Vereeniging ’95, wat 10 jaar tevore ontstaan het uit die samevoeging van Vereeniging en Vereeniging-Noord. Op 17 Februarie 2007, sy dertigste verjaardag, het sy gemeente hom as sendeling uitgestuur na die Covenant College naby Petauke in Zambië, waar hy sendingwerk gedoen en predikante opgelei het.

Saam met sy gesin was Heinrich se bediening in Zambië ’n besonderse tyd. Daar het hulle met gelowiges van ’n ander agtergrond saamgeleef en -gewerk. Hy sou later vertel in dié omstandighede het hy "opnuut weer die wonder van die Evangelie ontdek". Dié werk het hy tot einde 2011 gedien, toe hy 'n beroep aanneem na die Gereformeerde kerk Pretoria-Annlin, waar hy op 15 Januarie 2012 bevestig is. In sy huidige gemeente, Walvisbaai, is hy op 3 Desember 2017 bevestig.

Ook tydens sy bediening in Suid-Afrika was daar baie mooi herinneringe. Volgens sy vrou, Jacomien, was onder meer in Annlin, “waar die Here ’n wonderlike pad met ’n oom van 70 gestap het”. Dr. Zwemstra het die volwasse doop aan hom bedien en die bejaarde is ’n paar maande later oorlede. Sy vertel oor nog ’n blywende herinnering: “Op ’n keer het Heinrich het ’n aanddiens by die GK Kameeldrift gelei. Die preek het gegaan oor Jesaja 9. In Jesaja 9:1 staan daar: “Die volk wat in donkerte geleef het, het ’n groot lig gesien, oor dié wat in die donker land was, het ’n lig geskyn.” Voor die tyd het die diakens in die konsistorie gewaarsku dat die krag gereeld afgaan en dat daar kerse en vuurhoutjies op die preekstoel staan. Juis die oomblik toe Heinrich praat oor lig en duisternis het die krag afgegaan. Dit was toe ’n treffende toepassing!”

Sy vertel ook: “Tydens ’n ruildiens by die GK Derdepoort het Heinrich so lekker beduie dat hy die glas water opgestamp het. Hy het toe maar rustig voortgepreek terwyl hy die Bybel en kansel opdroog sover moontlik.” Sy sê hul tyd in Zambië sal altyd vir hulle uitstaan. “Daar het ons saamgeleef met Christene van ’n totaal ander agtergrond as waaraan ons gewoond is. En so het ons God se genade in baie nuwe vorme leer ken en raaksien.”

Gemeenskapsbetrokkenheid

In Pretoria het dr. Zwemstra ’n groepie motorfietsryers (meestal Gereformeerdes uit verskillende gemeentes, maar ook ander belangstellendes) bymekaargekry wat op Saterdae saamgery het. Soms het die groep ook ’n naweek weggaan en dan het hulle kontak gemaak die naaste Gereformeerde kerk en die erediens daar bygewoon. Die groepie, wat bekendstaan as “Tweewielvriende”, gaan steeds voort en het ook nou ’n “tak” in die Kaap onder leiding van ds. Dinant Zwemstra, dr. Zwemstra se broer. Daar is ook ’n groep saamryers uit die Vrystaat. In Pretoria was dr. Zwemstra betrokke by jaarlikse uitreikaksies na gemeenskappe en kerke in Mosambiek.

Sedert omstreeks 2012 dien hy in die ekumeniese deputate (skakeling met kerke in die buiteland) van die Gereformeerde Kerke in Suid-Afrika (GKSA), en die afgelope drie jaar in die sendingdeputate.

Geaardheid

Heinrich is nie van nature ’n ekstrovert of spreker nie. Tog het hy ’n liefde vir mense en werk graag met mense, en hou hy ook daarvan om te preek. Sy oortuiging is dat hierdie gawes is wat die Here aan hom gegee het. Hy het ’n besonderse liefde vir die natuur en hou daarvan om te kampeer, stap, draf of fietsry. Sy lewensfilosofie is: “Ons leef in genadetyd; gebruik dit!”

Bronne

• (af) 'n E-posonderhoud in Januarie 2018 met sy vrou, Jacomien Zwemstra, gevoer.