Gereformeerde kerk Midrand
Die Gereformeerde kerk Midrand is die jongste nuwe gemeente in die GKSA se Klassis Groter-Johannesburg, aangesien die Gereformeerde kerk Randburg, wie se stigtingsdatum aangegee word as 2003, in werklikheid ’n samestelling is van die ou gemeentes Johannesburg-Melville (1924), Randburg (1960) en Randburg-Oos (1976). Einde 2015, toe Midrand 95 belydende en 18 dooplidmate gehad het, was dit die sewende kleinste van die 15 gemeentes in dié Klassis.
Vanaf veral die negentigerjare het die gebied tussen Johannesburg en Centurion rondom die ouer nedersetting Halfweghuis en Kyalami geweldig ontwikkel en in dié tyd die naam Midrand gekry. Eers was die ontwikkeling veral langs die N1, maar later het woongebiede ook vêrder weg van die nasionale pad ontwikkel. In dié gebied het die Gereformeerde kerk Midrand in 1999 tot stand gekom. ’n Groot erf is op die Erand-landbouhoewes Uitbreiding 1, wes van die N1, gekoop en in vier erwe verdeel.
Van 2002 af het hierdie gemeente en die Nederduitsch Hervormde gemeente Midrand, wat op 1 Januarie 1931 as Johannesburg-Noord gestig is, maar sy kerkgebou by Atholstraat 188, Highlands-Noord, verkoop het nadat die meeste lidmate weggetrek het, ’n besonderse verbintenis omdat hulle ooreengekom het om saam ’n kerk op te rig. Die Gereformeerde kerk Midrand het toe ’n sieletal van sowat 200 gehad en die Hervormde gemeente Midrand sowat 75, vergeleke met sowat 100 in 2014.
Een van die erwe is vir kerklike gebruik gehersoneer. In November 2004, nadat die Hervormdes ’n tyd lank eredienste gehou het in die Laerskool Halfway House, het die kerkrade van die twee gemeentes ooreengekom om die erwe saam te besit en te beheer en om die bestaande woonhuis op een daarvan as ’n kerkgebou te ontwikkel.
Uit albei gemeentes is ’n gesamentlike eiendomskommissie aangewys wat verantwoordelik sou wees daarvoor om die woonhuis by Elfde Weg 124, Erand, in ’n kerkgebou te omskep. Op 18 September 2005 is die gebou ingewy deur albei gemeentes, wat ook saam besluit het om ’n Allen-orrel te installeer.
In 2013 het die Gereformeerde, Hervormde en NG gemeentes van Midrand saam die Midrand Afrikaanse Akademie gestig, wat later uit die NG pastorie na die gesamentlike kerkperseel verhuis het.
Predikant
wysig- Van 't Zand, Jan Douwe, 1999 – 2003
- Van den Berg, Petrus Johannes, 2010 – hede
Bronne
wysig- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.
Eksterne skakels
wysig- (en) Die kerkgebou wat die Gereformeerde en Hervormde gemeentes Midrand deel, soos te sien op Google Maps. URL besoek op 25 Januarie 2016.