Gereformeerde kerk Pretoria-Meintjeskop
Die Gereformeerde kerk Pretoria-Meintjeskop is die derde jongste gemeente in die Gereformeerde Kerk (GKSA) se Klassis Pretoria-Moot.
| Gereformeerde Kerk Pretoria-Meintjeskop | ||
| ||
| Sluit in | Riviera, Queenswood, Kilnerpark, TUT- en Tukkies mediese koshuise | |
| Klassis | Pretoria-Moot | |
| Huidige predikant(e) | Vakant | |
| Belydende lidmate | 156 | |
| Dooplidmate | 33 | |
| Adres | Rosestraat 39, Riviera, Pretoria | |
| Geskiedenis | ||
| Stigtingsdatum | April 1963 | |
| Afgestig van | Pretoria | |
| Eerste predikant | J.P. Coetzee (1963–1999) | |
Dié gemeente, net noord van Meintjeskop en van die Uniegebou, is in April 1963 gestig. Anders as die NG gemeente Meintjeskop (1964), wat ’n baie beperkte geografiese gebied rondom Arcadia beslaan het en dan ook weens demografiese verskuiwings in die omgewing by Arcadia ingelyf is, sluit die Gereformeerde kerk Pretoria-Meintjeskop heelwat meer voorstede of buurte in: Riviera, Rietondale, Queenswood, Kilnerpark, en gedeeltes van Arcadia, Capital Park, Prinshof en Villieria. Ten spyte van dié betreklik groot gebied vir ’n stedelike gemeente het Pretoria-Meintjeskop in 2020 net 178 belydende en 31 dooplidmate gehad, vergeleke met 270 en 65 sowat 20 jaar tevore.
Aanvanklik is die gemeente se eredienste in die SA Vrouefederasie se Saamstaansaal gehou. Daarna was die skoolsaal van die Laerskool Riviera by Rosestraat 11 jaar lank die gemeente se kerkplek. Wes van die saal, aan Voortrekkersweg, staan vandag nog ’n mooi voorbeeld van die Art Deco-boustyl wat jare lank die tuiste van die Paul Kruger-kinderhuis was. Die Deputate Diakonale Sake, eienaar van die kinderhuis se eiendom, het toestemming verleen dat die gemeente ’n kerk op die grond mag bou, maar daar was min belangstelling.
Later is effens verder oos, in Rosestraat, twee erwe gekoop en die huise daarop gesloop. Hier het ’n interessante, ronde ontwerp met ’n koepeldak verrys. Die argitek was Cor Swart, ’n lidmaat van die gemeente wat in die omgewing grootgeword het. Die SA Orrelbouers-orrel is teenoor die preekstoel op die galery geplaas. Die kerk, met sy suiwer lyne en geverfde, gekurfde mure, toon ooreenkomste met Le Corbusier se Notre Dame du Haut. Die gemeente het as eienaarbouer opgetree terwyl die firma Knoessen en Gerber verantwoordelik was vir die uitdagende betonkonstruksie.
Dié kerkgebou, wat om die een of ander rede nie ’n hoeksteen gekry het nie, is in Mei 1975 in gebruik geneem. Dis net 'n straatblok of wat vanaf die NG kerk Riviera-Jakaranda. Die buurte waaruit die Gereformeerde kerk Meintjeskop bestaan, stem min of meer ooreen met dié van die Nederduitsch Hervormde Kerk se moedergemeente Pretoria.
Predikante
wysig- Coetzee, Johannes Petrus, 1963–1999 (aanvaar sy emeritaat)
- De Beer, Hendrik Johannes Petrus, 1999–2010
- Smit, Barend Christiaan, 2010 – 31 Maart 2024
Bronne
wysig- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
- (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
Eksterne skakels
wysig- (en) Die gebouekompleks van die Gereformeerde kerk Meintjeskop by Rosestraat 39, Riviera. URL besoek op 10 Desember 2015.