Gewone nagreier

Die gewone nagreier is 'n algemene standvoël en besoeker. Die wetenskaplike naam beteken "nagraaf", wat verwys na die spesie se nagtelike gewoontes en die skor kraaiagtige geluid wat dit uiter.

Gewone nagreier
Bewaringstatus
Veilig  (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Klas:	Aves
Orde:	Ciconiiformes
Familie:	Ardeidae
Genus:	Nycticorax
Spesie:	N. nycticorax
Binomiale naam
Nycticorax nycticorax Linnaeus, 1758

Identifikasie

Dit is 'n bonkige reier met 'n kort nek. Die volwassene het 'n kenmerkende swart mus en rug wat by sy wit en grys vlerke en onderkant afsteek. Die agterkoppluime ontbreek soms. Alhoewel volwasse nagreiers na grootrietreiers lyk, verskil die jong voëls deurdat hulle kleiner is, oranje oë en wit kolle aan die punte van die rugvere het. Volwasse voëls het gewoonlik 'n lengte van 56 cm.

Habitat

Hulle kom een-een, in pare of in groepies langs stil rivierlope, damme en strandmere voor. Bedags rus hul en skuil in bome of tussen oewerplantegroei en kom dan teen laat namiddag te voorskyn. Soms is tot 18 voëls bymekaar te sien. Die voël jag veral snags deur stil te staan aan die waterkant. Hulle vang klein vissies, garnale, paddas, klein waterdiertjies en klein soogdiertjies.

Die broeigebiede is vars- en soutwatervleilande oor groot gedeeltes van Noord-Amerika, Europa, Asië, en Afrika. Hulle maak nes in kolonies op platforms van stokke in boomplate of op die grond in beskermde plekke soos eilande of rietbeddings, en lê 3 tot 8 eiers.

Verspreiding

Buite die nesmaaktyd is hulle nomadies. Die Noord-Amerikaanse groep, N. n. hoactli, oorwinter in Meksiko, die suidwestelike Verenigde State, Sentraal-Amerika en die Wes-Indiese Eilande. Die ander groep, N. n. nycticorax, oorwinter in tropiese Afrika, en die suidelike Asië. In die Amerikas kan N. n. nycticorax tot sover as Patagonië gevind word.

Geluid

'n Skor, kraaiagtige gekras.

Fotogalery

• 
  'n Jong nagreier.
• 
  'n Gewone nagreier afgeneem in Toronto, Kanada.
• 
  'n Eier van Nycticorax nycticorax

Sien ook

• Alfabetiese lys van Suid-Afrikaanse voëls
• Lys van Suid-Afrikaanse voëls (gegroepeer)
• Lys van Suider-Afrikaanse voëls volgens wetenskaplike name

Bronnelys

• Newman se Voëls van Suider-Afrika, ISBN 1868729826
• Black-crowned Night Heron by die Animal Diversity Web.
• A guide to the birds of Costa Rica deur Stiles en Skutch ISBN 0-8014-9600-4
• Herons and Egrets of the World deur James Hancock ISBN 0-12-322725-9
• The Sibley Guide to Birds deur David Allen Sibley ISBN 0-679-45122-6