Hieronimus van Stridon
Hieronimus van Stridon[1] is as Eusebius Sophronius Hieronimus in Stridon, Dalmasië ongeveer in die jaar 347 gebore. Hy is een van die vier Groot Kerkvaders van die Weste. Hy word as heilige vereer in die Rooms-Katolieke Kerk met 30 September as sy feesdag, en in die Oosters-Ortodokse Kerk met sy feesdag op 15 Junie.
| Hieronimus van Stridon | |
|---|---|
 Sint Jerome | |
| Heilige | |
| Gebore | ca. 347, Stridon (moontlik Stridon Dalmatiae, op die grens tussen Dalmasië en Pannonië) |
| Sterfte | 420 (op ca. 73), Betlehem, Palaestina Prima |
| Vereer in | Rooms-Katolieke Kerk, Oosters-Ortodokse Kerk, Anglikaanse Gemeenskap, Lutheranisme, Oriëntale Ortodoksie |
| Pelgrimsoord | Basilica di Santa Maria Maggiore, Rome, Italië |
| Feesdag | 30 September (Rooms-Katolieke Kerk), 15 Junie (Oosters-Ortodokse Kerk) |
| Attribute | leeu, kardinale drag, kruis, skedel, trompet, uil, boeke en skryfbehoeftes |
| Beskermheilige | argeoloë; argivarisse; Bybelkenners; bibliotekarisse; biblioteke; skoolkinders; studente; vertalers |
Biografie
wysigHieronimus[2] se familie was welaf en sy ouers was Christene. Hulle stuur hom na Rome vir sy opleiding. Hy loop klas by die grammatikus Donatus en Tyrannius van Aquileia was sy medeleerling.
Na 'n kort verblyf in Trier gaan hy na Aquileia waar hy saam met ander 'n asketiese lewe ly. Ongeveer in 373 wil hy 'n pelgrimsreis na Jerusalem onderneem, maar ernstige siekte hou hom vir 'n lang tyd in Antiogië. Hy luister na die voordragte van Appolinarius van Laodisea en leer Grieks. Daarna bring hy drie jaar deur in die woestyn waar 'n Joodse monnik hom Hebreeus leer. Hy word daarna tot priester gewy deur Paulinus, biskop van Antiogië. Hy reis dan na Konstantinopel waar hy die lesings van Gregorius van Nazianze bywoon.
Tussen 383 en 385 werk hy in Rome as sekretaris vir sy vriend Pous Damasus I. In opdrag van die pous skryf hy 'n vertaling van die Bybel in Latyn. Die vertaling wat as die "Vulgaat" bekend staan, is tot by die Reformasie as die standaard Bybel gebruik.[3]
Na die dood van Pous Damasus op 11 Desember 384 vertrek Hieronimus na Palestina en besoek Didimus die Blinde vir 'n maand lank. Hy vestig hom in 386 in Bethlehem waar hy as kluisenaar lewe. Hy hou hom vir 34 jaar besig met die wetenskap en lei 'n klooster. In sy asketiese kring was daar adellike dames soos Marcella, Aselia, Paula en haar dogter Eustochium. Met die hulp van Paula is drie vroue-kloosters en een manne-klooster gestig as ook 'n kloosterskool met 'n groot biblioteek.
Verwysings
wysig- ↑ Landman, C., "Hieronimus, Eusebius Sofronius" in Christelike Kern-Ensiklopedie, bl. 458. Lux Verbi, 2008.
- ↑ Jerome, Saint. (2008). Encyclopædia Britannica. Deluxe Edition. Chicago: Encyclopædia Britannica.
- ↑ Saltet, L. (1910). St. Jerome. In The Catholic Encyclopedia. New York: Robert Appleton Company. Besoek 12 September, 2014 by New Advent [1]
Eksterne skakels
wysig
Wikimedia Commons het meer media in die kategorie Hieronimus van Stridon.
| Hierdie artikel is in sy geheel of gedeeltelik vanuit die Nederlandse Wikipedia vertaal. |
