Hoërskool Eunice
Hoërskool Eunice is ’n openbare skool in Bloemfontein wat Engelsmediumonderrig aan meisies van gr. 8 tot 12 bied.
| Hoërskool Eunice | |
| Leuse | Vincit qui se vincit (Sy oorwin wat haarself oorwin) |
|---|---|
| Gestig | 1875 |
| Tipe | Staatskool |
| Hoof | Me. Zinette de Wet |
| Adjunkhoof(de) | Mnr. Leon van Rensburg |
| Grade | 8-12 |
| Adres | Jock Meiringstraat, Park West |
| Stad | Bloemfontein |
| Provinsie | Vrystaat |
| Land | Suid-Afrika |
| Webblad | http://www.eunice.co.za/ |
Die NG gemeente Bloemfontein het in 1875 besluit om die skool te stig in reaksie op die stigting, enkele maande tevore, van die Anglikaanse Sint Michael-skool en die Katolieke Greenhill-klooster. Dis volgens 'n besluit van die Vrystaatse Sinode opgerig en op 5 Junie 1876 plegtig geopen. Die naam is gekies na aanleiding van die Bybelse verwysings na Timoteus se moeder in 2 Timoteus 1:5: "Ek dink ook aan jou opregte geloof, dieselfde geloof wat al in jou ouma Loïs en in jou ma Eunice was, en wat, daarvan is ek oortuig, ook in jou is."[1] Die Vrystaat se eerste argitek, Richard Wocke, het die eerste gebou, later Lower House, ontwerp.
Die eerste prinsipale, Elizabeth Laird, wat uit Skotland laat kom is, het bedank om met die direkteur van onderwys, dr. John Brebner, te trou. Ná haar dood het dr. Brebner met die derde Eunice-hoof, mej. Van Pommeren, getrou.
E.L.M. King was waarskynlik die bekendste hoof en het naam gemaak as kunstenares, digteres en onderwyskundige. Sy het die skool deur ’n brand in Eunice House, die Eerste Wêreldoorlog en die Griepepidemie gelei. Sy het ook die skoollied geskryf en haar suster, die kunstenaar Bertha Everard, het die skoolbanier ontwerp.
Adele de Jager het in 1942 na Eunice gekom en 20 jaar hier gebly. Sy was hewig gekant teen die toepassing van moedertaalonderwys in skole. Dit het die aard van Eunice ingrypend verander toe Afrikaanse meisies nie meer toegelaat is om die skool by te woon nie.
Die hoof met die langste diens (amper drie dekades) was Paul Cassar, die eerste man in dié amp, wat die skool se huidige era ingelei en dit omskep het in een van die topskole in die Vrystaat deur dit mededingend op vele terreine op nasionale vlak te maak.
Die skool het minstens ses Springbokke in swem opgelewer: Jill Beyers (1963), Martie Pepler (1978 en 1979), Jeanine Steenkamp (1984, 1986, 1987, 1992), Amanda Markgraaff (1986), Lezelle Markgraaff (1986, 1987) en Alice Escreet (1987).[2]
Oudleerders
wysig- Henriette Armstrong, vroueleier
- Daisy Bosman, sopraan en dosent
- Lady Florence Phillips, weldoener, gasvrou, skryfster, bevorderaar van Suid-Afrikaanse kuns
- Rachel Isabella Steyn, Vrystaatse presidentsvrou
Bronne
wysig- (en) Die skool se webtuiste. URL besoek op 8 Augustus 2016.
Verwysings
wysig- ↑ (af) bybel.co.za.
- ↑ (af) Eunice se swemsaamtrek Geargiveer 12 Julie 2016 op Wayback Machine. URL besoek op 8 Augustus 2016.