Ivar die Beenlose
Ivar die Beenlose (Oudnoors: Ívarr hinn Beinlausi) of Ivar Ragnarsson (800's - omstreeks 873) was 'n halflegendariese Wikingleier wat Engeland en Ierland binnegeval het. Volgens die Verhaal van Ragnar Lodbrok was hy die seun van Ragnar Lodbrok en sy derde vrou, Aslaug. Sy broers sluit in Björn Ysterkant, Hvitserk, Sigurd Slang-in-die-oog en Ubba.
Die oorsprong van die bynaam is nie seker nie. Ívarr beinlausi kan beteken hy het óf nie bene gehad om op te loop nie óf het 'n skeletprobleem soos osteogenesis imperfecta (bros bene) gehad.[2] Nes in Afrikaans het die woord vir "been" in Oudnoors 'n dubbelsinnige betekenis gehad. 'n Paragraaf in die Verhaal van Ragnar se seuns verwys na impotensie.[3]
Volgens die Verhaal van Ragnar Lodbrok is Ivar se beenloosheid die gevolg van 'n vloek. Sy ma, Aslaug, word as 'n siener beskryf en sy het voorgestel sy en haar man wag drie nagte voordat hulle seks het nadat hy vir 'n lang ruk op 'n strooptog in Engeland was. Ragnar was egter passievol ná so 'n lang skeiding en wou nie na haar luister nie. As gevolg daarvan is Ivar met swak bene gebore.[4]
Hoewel die sagas Ivar se fisieke gebrek beskryf, lê hulle ook klem op sy wysheid, bekwaamheid en bemeestering van strategieë en taktieke in gevegte.[5]
Ragnar se dood wysig
Volgens die meeste sagas het koning Aelle van Northumbria Ragnar vermoor deur hom in 'n slangput te gooi. Ragnar se seuns het wraak gesweer en Engeland aangeval. Volgens die Verhaal van Ragnar se seuns het hulle Aelle gevange geneem en uit wraak vir Ragnar se dood die "bloedarend" op sy rug uitgekerf.
Ragnar se seuns het daarna Engeland, Wallis, Frankryk en Italië geplunder. Toe hulle terugkeer na Skandinawië het hulle die koninkryk tusen hulle verdeel.
TV-reeks wysig
Ivar die Beenlose speel 'n belangrike rol in die televisiereeks Vikings as die seun van Ragnar en Aslaug en die jonger broer van Björn Ysterkant. Sy rol as volwassene word deur Alex Høgh Andersen vertolk.[6]
Verwysings wysig
- ↑ Hervey, Francis (1907). Corolla Sancti Eadmundi = The garland of Saint Edmund, king and martyr. London: John Murray. OL 11080612W.
- ↑ "Ivar the Boneless | Biography, Battles, & Facts | Britannica".
- ↑ Groeneveld, Emma (12 November 2018). "Ivar the Boneless". World History Encyclopedia.
- ↑ Baker, Mick. "Anglo-Saxon Britain: In the Footsteps of Ivarr the Boneless". The History Files. Besoek op 1 September 2016.
- ↑ Mahoney, Mike. "Ivar the Boneless". www.englishmonarchs.co.uk. Besoek op 14 April 2017.
- ↑ Schwartz, Terri (21 April 2016). "Vikings: Meet the Four New Actors Revealed in Season 4's Midseason Finale". IGN. Besoek op 22 Desember 2016.
Bronne wysig
- Verhaal van Ragnar se seuns (Ragnarssona þáttr)
- Verhaal van Ragnar Lodbrok (Ragnars saga Loðbrókar)
Nog leesstof wysig
- Waggoner, Ben (2009) The Sagas of Ragnar Lodbrok (The Troth) ISBN 978-0-578-02138-6
Skakels wysig
- The Tale of Ragnar's Sons - vert. Peter Tunstall
Hierdie artikel is in sy geheel of gedeeltelik uit die Engelse Wikipedia vertaal.
