Vikings (televisiereeks)

Vikings is 'n televisiereeks wat deur Michael Hirst vir die History-kanaal geskryf is. Dit is in Ierland verfilm en het op 3 Maart 2013 sy debuut in Kanada gehad. In Januarie 2019 is aangekondig dat die sesde seisoen van 20 episodes, wat op 12 September 2017 voor die première van die vyfde seisoen bestel is, die laaste seisoen van die reeks sal wees. Die sesde seisoen het sy première op 4 Desember 2019 gehad. 'n Opvolgreeks met die naam Vikings: Valhalla is vir Netflix ontwikkel.

Vikings is geïnspireer deur die sagas oor Ragnar Lodbrok, 'n Wiking wat een van die bekendste legendariese helde in die Noorse mitologie was. Hy was veral berug vir sy aanvalle op Angel-Saksiese Engeland en die Wes-Frankiese Ryk. In die reeks word Ragnar as 'n boer uitgebeeld wat beroemd raak vanweë sy strooptogte op Engeland en eindelik 'n Skandinawiese koning word, met die ondersteuning van sy familie en medevegters. In die latere seisoene volg die reeks die doen en late van sy seuns en hulle avonture in Engeland, Skandinawië, Kiëf-Roes, die Mediterreense streek en Noord-Amerika.

Rolverdeling

Clive Standen

Gustaf Skarsgård

Travis Fimmel

Katheryn Winnick

• Travis Fimmel as Ragnar Lodbrok (seisoen 1–4)
• Katheryn Winnick as Lagertha
• Clive Standen as Rollo (seisoene 1–4; spesiale verskyning seisoen 5)
• Jessalyn Gilsig as Siggy (seisoene 1–3)
• Gustaf Skarsgård as Floki
• Gabriel Byrne as graaf Haraldson (seisoen 1)
• George Blagden as Athelstan (seisoene 1–3; herhalend season 4)
• Donal Logue as koning Horik van Denemarke (seisoene 1–2)
• Alyssa Sutherland as Aslaug (seisoene 1–4)
• Linus Roache as koning Egbert van Wessex (seisoene 2–4)
• Alexander Ludwig as Björn Ysterkant (seisoene 2–6)
• Ben Robson as Kalf (seisoene 3–4)
• Kevin Durand as Harbard (seisoene 3–4)
• Lothaire Bluteau as keiser Karel van Wes-Frankië (seisoene 3–4)
• John Kavanagh as die siener (seisoene 4–6; herhalend seasons 1–3)
• Peter Franzén as koning Harald Fynhaar (seisoene 4–6)
• Jasper Pääkkönen as Halfdan die Swarte (seisoene 4–5)
• Alex Høgh Andersen as Ivar die Beenlose (seisoene 4–6)
• Marco Ilsø as Hvitserk (seisoene 4–6)
• David Lindström as Sigurd Slang-in-die-oog (seisoen 4)
• Jordan Patrick Smith as Ubbe (seisoene 4–6)
• Moe Dunford as prins Ethelwulf van Wessex (seisoene 4–5; herhalend seisoene 2–4)
• Jonathan Rhys Meyers as biskop Heahmund (seisoene 4–5)
• Danila Kozlovsky as Oleg die Profeet (seisoen 6)
• Eric Johnson as Erik die Rooie (seisoen 6)
• Georgia Hirst as Torvi (seisoen 6; herhalend seisoene 2–6)
• Ragnheiður Ragnarsdóttir as Gunnhild (seisoen 6; herhalend seisoene 5–6)
• Ray Stevenson as Othere (seisoen 6)

Historiese onakkuraatheid

Lars Walker kritiseer in die tydskrif The American Spectator die reeks se uitbeelding van vroeë Wikingregering (wat teenwoordig word deur graaf Haraldson) as outokraties eerder as demokraties. Joel Robert Thompson het die Skandinawiërs se oënskynlike onkunde oor die bestaan van Brittanje en Ierland gekritiseer, asook van die doodstraf eerder as voëlvryverklaring (skoggangr) as hulle ernstigste straf.

Monty Dobson, 'n historikus aan die Central Michigan University, het die uitbeelding van Wikingklere gekritiseer, maar ook gesê reekse soos Vikings kan steeds 'n nuttige opleidingsinstrument wees. Die Noorweegse koerant Aftenposten het berig die reeks het die tempel by Uppsala verkeerdelik as 'n staafkerk in die berge uitgebeeld, terwyl die historiese tempel op plat grondgebied geleë was, en staafkerke is kenmerkend van latere Christelike argitektuur.

Baie karakters is op werklike mense en legendes geskoei of deur hulle geïnspireer, en gebeure wat uitgebeeld word, is rofweg op historiese feite geskoei. Die geskiedenis van meer as 'n eeu is gekondenseer; mense wat nooit sou ontmoet het nie, word uitgebeeld as van dieselfde ouderdomsgroep, met die geskiedenis wat vir dramatiese effek aangepas is. In Seisoen 1 vind die Wikingaanval in 793 op die Lindisfarne-abdy plaas (voor die geboorte van die werklike Rollo). In seisoen drie neem dieselfde karakters van min of meer dieselfde ouderdom deel aan die Beleg van Parys van 845. Teen dié tyd was koning Egbert dood en Ethelwulf was reeds op die troon. Rollo laat sy volgelinge vermoor en veg teen sy mede-Wikinge, terwyl hulle in die geskiedenis gekry het wat later Normandië sou word.

Min is bekend oor die Wikinge se godsdienspraktyke en die uitbeelding daarvan is hoofsaaklik fiktief. Toe aan Katheryn Winnick gevra is hoekom sy die siener se hand gelek het, het sy geantwoord: "Dit was nie oorspronklik in die draaiboek nie en ons wou net iets doen wat uniek en anders was." Die vervaardiger Michael Hirst het gesê: "Ek moes veral vryhede neem met Vikings omdat niemand vir seker weet wat in die Donker Eeue gebeur het nie . . . ons wou hê mense moes daarna kyk. 'n Historiese weergawe van die Wikings sou honderde mense bereik het, soms duisende. Hier moet ons miljoene bereik."

Die uitbeelding van die Christendom in die reeks is ook ietwat omstrede. In die vierde episode van die tweede seisoen word gewys hoe die biskop van Wessex kruisiging as straf vir afvalligheid toepas, hoewel dit meer as vier eeue tevore deur keiser Konstantyn die Grote verban is, en dit sou godslasterlik vir die Christelike bevolking gewees het.