J.B. Robinson

Sir Joseph Benjamin Robinson (3 Augustus 1840 - 1929) was 'n mynmagnaat. Hy is op Cradock gebore as die seun van 'n 1820-Setlaar. Hy dryf handel op Dordrecht en veg in die 1865 Basoeto-oorlog. Na die ontdekking van diamante by die Vaalrivier is hy een van die eerste delwers daar. Hy word, tesame met sy vennoot, Marcus, ryk en word 'n vooraanstaande persoon in die vroeë Kimberley. In 1880 word hy verkies tot burgemeester en 1882 lid van die Wetgewende Vergadering. Hy was een van die eerste persone wat die waarde van die goudontdekkings in beide Barberton en die Witwatersrand besef het. Sy aansprake dat hy die ontdekker daarvan was kan nie bewys word nie. In 'n waaghalsige transaksie koop hy die plaas Langlaagte vir £ 6000 terwyl sy mededingers nog huiwer. Die transaksie verseker dat hy nog meer rykdom bekom en hy word as 'n miljoenêr beskou. Van sy eiendomme was die Robinson-myn, Robinson-Deep en Randfontein Estates-myn. Hy was 'n vriend van Paul Kruger en ondersteuner van die Boere. Hy bedryf ook vir 'n tyd lank sy eie finansiële onderneming, Robinson South African Banking Coporation. Teen die einde van die 19de eeu vestig hy hom in Engeland.

Sir Joseph Robinson

Sir Joseph Robinson

ROBINSON GOLD MINING CO. (c. 1890)

Sy dogter was Ida Labia. Die Robinson-meer in Randfontein dra nog sy naam asook Robinsonstraat in Belgravia (Jeppestown).

Bron

• Ensiklopedie van Suidelike Afrika, Eric Rosenthal, 1967.

Sien ook

• Hawthornden
• Labia (teater)
• Mayfair, 'n voorstad op sy myngrond aangelê