Jakhalsdans

Jakhalsdans is 'n vollengte Afrikaanse rolprent met Engelse onderskrifte wat op Loxton geskiet is en op 23 April 2010 in teaters begin draai het. Die regisseur is die Oscar-benoemde Darrell Roodt.

Jakhalsdans
Regisseur	Darrell Roodt
Produksieleier	Shaun Goetsch
Draaiboek	Draaiboek: Deon Meyer
Met	Theuns Jordaan Neil Sandilands Elizma Theron Christina Storm Janke Bruwer
Musiek deur	Anton L'Amour
Kinematografie	Andrew Tolmay
Redigeerder	Ronelle Loots
Ateljee	Makadi Entertainment Welela Studios
Verspreider	Indigenous Film Distribution
Uitgereik	2010
Speeltyd	93 minute
Land	Suid-Afrika
Taal	Afrikaans
Amptelike webtuiste
IMDb-profiel

Die première van die rolprent is vir die eerste keer op 27 Februarie 2010 op die gelyknamige plaas Jakhalsdans net buite Loxton vertoon. Geld wat tydens die première ingesamel is, is ten bate van die dorp se skool en kinders aangewend.

Jakhalsdans word as die eerste volwaardige Afrikaanse liefdesfliek in 15 jaar sedert Die Storie van Klara Viljee beskryf. Die rolprent het in die eerste week na uitreiking R1,7 miljoen verdien met 43 000 mense wat in teaters daarna gaan kyk het.

Genre

Die rolprent is 'n romantiese drama. Dit het 'n OL-ouderdomsperk (ouerleiding).

Hoofrolspelers

• Theuns Jordaan as Ruan Landman
• Elizma Theron as Mara Malan
• Janke Bruwer as Mia Malan (bynaam "Paddatjie")
• Christina Storm as Vanessa Ruiters
• Neil Sandilands as Dawid le Fleur
• Chanté Hinds as Bokkie de Wet
• Chris Majiedt as Pieter Block
• Mattie Jooste as Abigail
• Ben Bruwer as Oom Ben
• Wilna Bruwer as Tannie Wilna
• Emo Adams as homself
• Robbie Wessels as homself
• Anton L'Amour as homself
• Bok van Blerk as homself
• Juanita du Plessis as haarself

Intrige

'n Jong onderwyseres kom agter dat almal op die dorp nie ewe vriendelik is nie. Dan kom die skok, die skool moet sluit weens onvoldoende befondsing. Daar word naarstiglik na oplossings gesoek. Uiteindelik word op 'n konsert besluit. Dit kom aan die lig dat die dorp se ongeskikte kluisenaar 'n beroemde sanger is en moontlik die enigste persoon is wat kan help.

Toe haar man sterf, verhuis Mara Malan en haar sesjarige dogtertjie Mia (Paddatjie) na Loxton in die Karoo. Mia gaan verken haar nuwe tuiste en sien die eensame huis by Kerkstraat 16. Terug by die huis, kom bied Abigail haar hulp aan Mara aan; sy sal na Mia kyk terwyl Mara by die werk is en die huis skoonmaak. Die aand bring inwoners kos vir Mara en Mia om hulle op die dorp te verwelkom.

Mara is 'n onderwyseres aan die Laerskool Loxton, maar toe sy by die werk kom, kry sy slegte nuus: die skool het nie genoeg geld om oop te bly nie en dit moet sluit. Almal is baie ontsteld, baie mense sal hul werk verloor en die kinders sal nie kan skoolgaan nie. Tuis praat Abigail en Mia oor Kerkstraat 16. Abigial sê die man dat daar woon, is 'n kluisenaar omdat hy hartseer is en Mia gee hom die bynaam "Die Spookman van Loxton". Toe Abigail haar koekies gee, neem sy dit na die kluisenaar. Hy is geskok. Hy sê vir haar sy moet sy privaatheid respekteer en aan haar kant van die heining bly.

Die volgende dag ontmoet Mara Dawid Le Fleur, troebadoer, liedjieskrywer, digter en die beste restoureerder van Loxton. Hy kom na haar van die skool af waar hy met een van Mara se kollegas, Vanessa, gepraat het. Hy is verlief op haar maar sy sê hy kan hom nie aan 'n verhouding toewy nie. Dawid bied sy hulp aan Mara aan: Hy sal haar huis regmaak teen geen betaling nie en as sy daarvan hou, kan sy hom betaal.

Mara se kollegas kom praat met haar en is bekommerd, want hulle wil nie hul werk verloor nie. Mara besluit om die skool te probeer red en sy en Vanessa stig 'n geldinsamelingskomitee. As hulle R500 000 voor 31 Januarie kan bymekaar kry, kan hulle die skool red, maar die hoof dink nie dit gaan gebeur nie en wil nie vals hoop skep nie. Hy sê: "Hier op Loxton werk dinge anders." Maar die dorp is verheug en almal kom bedank Mara.

Daardie aand lê daar 'n brief voor Mara se deur. Binne-in is daar 'n brief van die kluisenaar wat vra dat sy haar kind beheer en leer om privaatheid te respekteer. Mara skryf terug haar kind wil net liefde met die wêreld deel en hy verdien dit nie; sy sal sorg dat haar kind nie weer haar pêrels vir die swyne gooi nie. Mia wil by die kluisenaar gaan kuier, want sy wil hom weer heelmaak en sy hartseer wegneem. Sy wil vir hom hartseer medisyne bring; dus vra sy hoe om hartseer op te los. Mara sê sy luister na sy gunsteling-CD van Ruan Landman en organiseer haar lewe. Dawid sê 'n mens moet jou hart oopmaak sodat die musiek kan uitkom. Hy sing vir haar en wys haar hoe om liefde te groei: Maak 'n gatjie in die grond, sit 'n mieliepit daarin, en maak dit toe met los sand (die pit is 'n harde hart en die sand is die liefde).

Mara kom met 'n plan vorendag om die skool te red: As 50 boere 10 skape elk gee, sal hulle genoeg geld kry. Haar kollegas dink nie dit sal werk nie, maar hulle probeer nogtans. Die probleem is dat skape is nie elkeen R1 000 werd is nie, slegs R750, en dit is die verkeerde tyd van die jaar want al die skape is dragtig. Hulle het 'n wonderwerk nodig. Mia help die kluisenaar om sy hart sag te maak en die hartseer weg te kry. Mia wil Dawid help met sy vrees van voor mense sing; dus hou hulle 'n "serenade" (klein konsert) met net Mara, Mia, Abigail en Vanessa. Terwyl Dawid sing, kry Mara 'n plan: Hulle kan 'n konsert hou om die geld in te samel, met al die groot Afrikaanse name. Hulle wil die konsert op die plaas "Jakhalsdans" hou.

Mara kry Mia by die kluisenaar en word baie kwaad. Sy skree vir hom dat hy Mia moet uitlos en haar nie lok nie, want sy sal die polisie bel. Hy trap haar uit, hy is kwaad want sy skree vir hom in sy eie huis, en gee hom nie kans om te verduidelik nie.

Mara probeer die konsert organiseer, maar toe sy met 'n agent met die naam Lisa praat, kry sy probleme. Die kunstenaars is almal vol bespreek en kan nie meer werk vir niks geld doen nie. Maar Lisa sê dat die bekende sanger "Ruan Landman" is 'n kluisenaar wat op Loxton woon en as Mara hom kan kry om die konsert te doen, sal die ander sangers ook kom. As sy dinge met die kluisenaar kan regmaak, sal die skool gered word en dit sal iets doen vir Afrikaanse musiek. Mara gaan vra verskoning vir wat sy gesê het, maar dit ontstel Ruan. Hy sê dat dit die rede is hoekom hy weggetrek het, oor mense soos Mara wat net vriendelik met hom is wanneer hulle iets wil hê. Hy vat sy goed en probeer uit die dorp te ry.

Mia ry op haar fiets voor sy kar in en hy stamp haar. Mara hardloop om te help en word baie kwaad. Mia is ongedeerd. Mara sê vir al die mense wie hy eintlik is. Hulle sê: "In die Karoo moet mense mekaar elke dag in die oê kyk." Ruan ry weg, maar toe sien hy die prent wat Mia vir hom geteken het.

Die konsert kan voortgaan. Vanessa word verkies as die voorsitter van die reëlingskomitee. Dawid sê hy sal sing en Ruan kom terug en sê hy sal die konsert doen vir Mia en Dawid. Die nuus van die konsert en terugkeer van Ruan Landman word op radio geadverteer. Dawid gaan na Vanessa en gee haar 'n gesoldeerde roos, sy sê hoe mooi dit is en gee hom 'n druk.

Die aand gaan Mia na Ruan toe en vra hy moet vir haar ma gaan sing, want sy is hartseer. Mara sê jammer en Ruan besef dat dit nie 'n ongeluk was dat Mia in sy lewe gekom het en dat sy wonderlik is. Hy vra vergifnis en gee haar 'n soen. Die dag van die konsert tree Bok van Blerk, Robbie Wessels, Juanita Du Plessis, Dawid Le Fleur en Ruan Landman op. Ruan gee Mara 'n brief en sing vir haar: "Bly met my..."

Sien ook

• Lys van Afrikaanse rolprente

Eksterne skakels

• Die rolprent se amptelike webwerf Geargiveer 27 Mei 2010 op Wayback Machine
• Voorskou op YouTube