Kaapse kanferfoelie

plantspesie

Kaapse kanferfoelie (Tecomaria capensis) is 'n blomdraende plant wat inheems in Suider-Afrika voorkom.[1] Dit is ook in inheems in Angola, Demokratiese Republiek die Kongo, Eswatini, Malawi, Mosambiek en Tanzanië.

Kaapse kanferfoelie
Wetenskaplike klassifikasie edit
Domein: Eukaryota
Koninkryk: Plantae
Klade: Tracheofiete
Klade: Angiospermae
Klade: Eudicots
Klade: Asterids
Orde: Lamiales
Familie: Bignoniaceae
Genus: Tecomaria
Spesie:
T. capensis
Binomiale naam
Tecomaria capensis
Sinonieme

Tecomaria capensis (Thunb.) Spach

Dit is 'n gewilde struik wat massas blomme voortbring en nektar-vretende voëls en insekte lok.

Ongeag die naam, is dit nie verwant aan die gewone kanferfoelie, wat in die Noordelike Halfrond voorkom nie. Ander inheemse name vir die plant sluit in: Cape honeysuckle in Engels, umsilingi (ook inkaca of icakatha) in Xhosa en incwincwi (ook uchacha of udodo) in Zoeloe.

Die plant se FSA-nommer is 673.1.[2]

Verspreiding wysig

Hierdie spesie is nie net hier 'n groot tuinboutreffer nie, maar ook in ander wêrelddele, veral in die Verre Ooste en die Mediterreense gebied, waar die plant net so goed as in Suid-Afrika aard. In Suid-Afrika word hierdie inheemse spesie algemeen as 'n heiningplant gebruik en dit blom in die somer, veral na goeie reën. 'n Verdere nege Tecoma-spesies is inheems aan die tropiese en subtropiese dele van Afrika en die Amerikas.

Ander uitheemse kanferfoeliespesies wat ook in Suid-Afrika aangetref word, is onder meer die gewone of tuin-kanferfoelie (Lonicera caprifolium), 'n klimplant met witpers blomme uit Europa wat ook inheems aan Wes-Asië is. Lonicera japonica, oftewel die Japanse kanferfoelie, is weer inheems in China, Korea en Japan en het wit blomme met pers tinte. Lonicera sempervirens, ook bekend as die trompetkanferfoelie, is inheems in Noord-Amerika en het omstreeks 1656 in Europa bekend geword. Die helderoranjerooi blomme is lank en buisvormig, ongeveer 4 cm lank en geurloos. Hierdie plant rank veral baie hoog op teen die boomstamme in Noord-Amerikaanse woude en sy rooi bessies is veral opvallend. Kanferfoelies is oor die algemeen baie gewilde tuinplante omdat dit veral langs heinings en teen mure geplant kan word.

Voorkoms wysig

 
Die Njassa-kanferfoelie (Tecoma nyassae) is 'n aanverwante spesie uit die subtrope

Die helderoranje blomme van hierdie spesie vertoon treffend, hoewel 'n ander variëteit met roomgeel blomme ewe aantreklik is. Tecoma capensis kom voor in die Oos-Kaap, KwaZulu-Natal, Mpumalanga en die tropiese dele van Afrika. Tecoma capensis is 'n bosserige struik wat lang lote vorm en daarom word dit ook as 'n rankplant aangeplant.

Dit word sowat 3 tot 4,5 m hoog en sprei ook net so breed. As informele heiningplant is die spesie baie nuttig en vertoon pragtig met die helderoranje, buisvormige blomme van sowat 4 cm lank. Die vier terugbuigende lobbe tuit taamlik groot oop met uithangende meeldrade. Die blomme verskyn gedurende die herfs, maar kom in rypvrye gebiede gedurende die hele winter in oorvloedige trosse aan die takpunte voor.

Die heldergroen blare van die plant is veervormig saamgestel en ongeveer 4 cm lank, eiervormig en getand. Die plante kan ook deeglik met die snoeiskêr bygekom word en nuwe lote kom gewoonlik weer in die lente te voorskyn. Kanferfoelies verkies oop, sonnige plekke, maar grond wat met baie kompos verryk is, sal die plante gouer laat groei. Steggies kan gedurende die herfs van halfryp lote gemaak word, maar inlêers ontwikkel ook gou wortels.

Fotogalery wysig

Sien ook wysig

Verwysings wysig

  1. RHS A-Z encyclopedia of garden plants. Verenigde Koninkryk: Dorling Kindersley. 2008. p. 1136. ISBN 1405332964.
  2. Van Wyk, Piet (2008). Field guide to the TREES of the Kruger National Park. Kaapstad: Struik. p. 247. ISBN 978-1-77007-759-1.

Bronne wysig

Eksterne skakels wysig