Karoowoestyn- Nasionale Botaniese Tuin

Die Karoowoestyn- Nasionale Botaniese Tuin beskerm vetplante en ander inheemse plante uit die woestyn- en halfwoestynstreke van Suider-Afrika.

Uitsig oor die tuin

Ligging

Die tuin lê aan die noordekant van die dorpsgebied van Worcester en aan die voet van die Hexrivierberge. Dit is dus in die winterreënvalstreek.

Flora en fauna

Satyrium erectum

In die tuin van 154 ha kom 400 plantspesies (veral vygies) natuurlik voor. Driehonderd beskermde spesies word hier versorg vir kweekdoeleindes. Van die meer as 380 spesies blomplante wat hier groei kan 115 as geofiete beskou word. Hulle behoort veral tot die families Amaryllidaceae, Liliaceae en Iridaceae, maar ook die wortelfamilie Umbelliferae het verteenwoordigers. Daar is 11 spesies van Pelargonium waarvan ses ondergrondse wortels besit en uit in die droë maande die sig verdwyn. Cyphia digitata, Kedrostis africana, Microloma sagittatum en Fockea comaru is klimplante, maar hulle het ook 'n verdikte stam of caudex onder die grond en sterf in die droë maande af. Daar is ook monocotyledons, soos die spektakulêre Brunsvigia josephinae met sy groot blomhoofde met hulle baksteenkleurige blomme.

Vyf spesie Moraea word hier aangetref. Veral M. algoensis met sy bou-pers blomme is volop. Daar is ook orgideë, maar behalwe Satyrium erectum is hulle gewoonlik nie baie opvallend nie. Spesies soos Pterygodium volucris, Disperis bolusiana en Holothrix secunda is taamlik algemeen, maar mens moet in die bossies daarna soek.

Watter spesies bloei hang af van die tyd van die jaar. In Oktober is dit byvoorbeeld Gynandriris setifolia, in November Gethyllis villosa, in Maart of April Haemanthus tigrinus. Sommige spesies het 'n lang tyd waarin hulle bloei. Dit geld die Bulbine-spesies soos Bulbine filifolia wat van November tot Maart aangetref kan word. Ander, soos Ornithogalum graminifolium se bloeityd is beperk tot November-Desember. Natuurlik hang dit ook van die reënval in die betreffende jaar af.

Meer as 70 voëlspesies is reeds hier waargeneem. Verskeie klein soogdiere, onder andere die gewone duiker, word hier aangetref.

Besoek

Die beste tyd om die tuin te besoek is in die lente, veral in Augustus en September.

Geskiedenis

Die Karoo Tuin is in 1921 as die Logan Memorial Garden gestig op 'n plaas by die spoorweghalte Whitehill, 5 km van Matjiesfontein in die rigting van Laingsburg. Weens 'n akute tekort aan water is die tuin in 1945 na Worcester verskuif. Sedert 2001 dra die park die huidige naam.

Galery

• 
  Ingang
• 
  Plantspesies
• 
  Plantspesies

Lees ook

• Wauchope-obelisk

Bibliografie

• Willis, Christopher en Gideon Smith: From Whitehill to Worcester. Veld & Flora, Maart 2006.
• www.sanbi.org