Krantzkloof-natuurreservaat
Die Krantzkloof-natuurreservaat, bestuur deur Ezemvelo KZN-Natuurlewe, bewaar 584 ha[1][2] van die bolope van die Molweni- en Nkutu-ravyne in KwaZulu-Natal, wat deur erosie uit die sandsteen Kloofplato[1] verweer is. Die riviere het 'n samevloeiing 1 km buite die reservaat, en vloei sowat 2 km verder in die Umgeni. Die reservaat is in 1950 verklaar, en is so onlangs as 1999 deur landskenkings aangevul.[1]
| Krantzkloof-natuurreservaat | |
|---|---|
 | |
| Land | Suid-Afrika |
| Provinsie | KwaZulu-Natal |
| Naaste dorp | Pinetown |
  Krantzkloof-natuurreservaat |
|
| Koördinate: 29°45′51″S 30°51′03″O / 29.76417°S 30.85083°O | |
| Oppervlak | 584 ha |
| Openingsjaar | 1950 deur Natalse Parkeraad |
| Bestuursliggaam | Ezemvelo KZN-Natuurlewe |
Die gebied behoort tot die ekostreek "rivierklowe van Maputa- tot Pondoland". Die bebosde Molweniravyn skei die Kloof en Forest Hills woonbuurte, en word deur die Kloof Falls-deurpad oorgesteek. Hierdie pad verleen toegang tot die Kloofvalle piekniekplek, vanwaar wandelpaaie in die stroomop- en stroomafrigtings uitwyk. Artifakte van vroeë ystertydperkse inwoners is in die kloof se rotsskuilings gevind.[1]
Natuurlewe
wysigRooiduikers (toe plaaslik uitgestorwe), blouduikers en bosbokke is in 1970 en 1971 in die reservaat vrygelaat. Bobbejane is ook hervestig maar is uitgedun na hulle 'n oorlas vir nabye inwoners geword het.[1] Dit is die tuiste van die seldsame Pronolagus crassicaudatus.[3][4]
Die reservaat huisves 'n hoë plantdiversiteit insluitend broodbome en ander seldsame soorte. Enkelinge van 'n byna uitgewisde kambrosoort, Brachystelma natalense,[5] word hier bewaar, benewens die enigste Suid-Afrikaanse bevolking van 'n kleurryke Akantusstruik, Metarungia pubinervia.[6] Sowat 12 amfibie-, 254 voël-, 40 soogdier-, 35 reptiel-, 101 skoenlapper- en 274 boomsoorte is al in die kloof of nabye omgewing aangeteken.[7]
Geriewe en toegang
wysigDie reservaat bied geen verblyf- of kampeergeriewe nie,[2][1] maar die Interpretatiewe Sentrum langs die Kloof Falls-pad is te huur vir vergaderings, konferensies en sosiale byeenkomste van tot 50 persone.[8] Die Kloofvalle-piekniekplek is daagliks oop van sonop tot sononder[2] teen 'n tarief van R20 per persoon, of R10 vir kinders onder 12 jaar.[1] Die Valleyrylaan-piekniekplek is oop oor naweke of deur bespreking op weeksdae. Geen troeteldiere word in die reservaat toegelaat nie.
Wandelpaaie
wysigVerkenning van die reservaat geskied deur middel van sewe wandelpaaie. Hulle word aangedui as die rooi (Nkutuvalle, 1.25 uur), geel (Molweni, 4.5 uur), groen (Ntombeni, 1 uur), blou (Langskadus, 1.5 uur), oranje (Baken, 1 uur), swart (Mpiti, 45 min) en wit (2 uur) wandelpaaie.
Die Nkutuvalle-wandelpad stel 'n stapper in staat om die voet van die Nkutuvalle te bereik, en na die Nkutu-piekniekplek terug te keer in 30 minute. Die veeleisende Molwenivoetpad lei 'n stapper sowat 350 meter afwaarts na die ravynbodem, en stel die besoeker in staat om die voet van die Kloofvalle te besigtig, voor dit op dieselde spoor terugkeer. Die Ntombenivoetpad steek 'n gelyke strook grasveld oor na "Die Skeur" wat wye uitsigte oor die laer ravyn bied. Die Langskadus-voetpad volg die Molwenirivier stroomop in 'n koel en gelyk woudgebied. Die Bakenvoetpad vurk vanaf die Molwenivoetpad en neem die stapper oor gelyk grasveld bo die kranse. Georganiseerde uitstappies kan oor naweke bespreek word.[7]
Liggings
wysig
- Bridlepad-uitkykpunt 29°46′13″S 30°50′08″E / 29.77028°S 30.83556°O
- Kloofvalle (hoof-) piekniekplek 29°46′21″S 30°49′50″E / 29.77250°S 30.83056°O
- Nkutu (Valley Drive) piekniekplek 29°44′49″S 30°50′55″E / 29.74694°S 30.84861°O
Verwysings
wysig- ↑ 1,0 1,1 1,2 1,3 1,4 1,5 1,6 "Krantzkloof Nature Reserve: Information" (in Engels). KKNR Webblad. Geargiveer vanaf die oorspronklike op 19 Junie 2014. Besoek op 9 Junie 2013.
- ↑ 2,0 2,1 2,2 Stuart, Chris & Tilde (1989). Guide to Southern African Game & Nature Reserves. Cape Town: Struik. p. 116. ISBN 0-86977-772-6. Nota: Hierdie bron vermeld die oppervlakte as 535 ha in 1989.
- ↑ "Soogdierlys van Krantzkloof" (in Engels). Geargiveer vanaf die oorspronklike op 27 Julie 2017. Besoek op 7 November 2016.
- ↑ "WWF AT1012" (in Engels). Geargiveer vanaf die oorspronklike op 31 Oktober 2019.
- ↑ "Brachystelma natalense (Schltr.) N.E.Br". Red List of South African Plants (in Engels). SANBI. Geargiveer vanaf die oorspronklike op 16 Januarie 2019. Besoek op 3 Julie 2013.
- ↑ Nichols, Geoff (14 Maart 2007). "Red Sunbird Bush – tops for nectar Metarungia pubinervia". BirdInfo, Article 26. Besoek op 3 Julie 2013.
- ↑ 7,0 7,1 "Krantzkloof Nature Reserve: Flora and Fauna lists" (in Engels). KKNR Webblad. Geargiveer vanaf die oorspronklike op 22 April 2019. Besoek op 9 Junie 2013.
- ↑ "Krantzkloof Nature Reserve: Facilities" (in Engels). KKNR Webblad. Geargiveer vanaf die oorspronklike op 4 Junie 2014. Besoek op 9 Junie 2013.
Eksterne skakels
wysig
Wikimedia Commons het meer media in die kategorie Krantzkloof-natuurreservaat.
