Kwinana

Kwinana is 'n plaaslike regeringsgebied in Wes-Australië. Dit beslaan 'n gebied van ongeveer 118 vierkante kilometer in die Perth metropool en is ongeveer 40 km suid van Perth se sentrale sakekern met die Kwinana Freeway langs. Kwinana het 287 km se paaie en het 'n bevolking van ongeveer 36 100 in 2014 gehad.

Kwinana
Voorstad
Kwinana se padteken
Kwinana Ligging van Kwinana in Australië
Koördinate: 32°15′S 115°46′O
Land	Australië
Deelstaat	Wes-Australië
Stad	Perth
Stigting	1954
Regering
• Burgemeester	Carol Adams
Oppervlak
• Totaal	118 km2 (45,6 vk. myl)
Bevolking
• Totaal	36 145
• Digtheid	306,3/km2 (793/vk. myl)
Tydsone	UTC+08:00 (AWST)
Webwerf	kwinana.wa.gov.au

Ligging van Kwinana, Wes-Australië

Geskiedenis

Kwinana is vernoem na die SS Kwinana, 'n skip wat in 1922 daar gestrand is. Sommige van die woonbuurte ontleen hul name van seilskepe wat vir die eerste keer immigrante na Wes-Australië gebring het, byvoorbeeld Medina, Calista en Parmelia.

Kwinana is eintlik 'n inboorlingwoord uit die Kimberley-streek wat 'mooi meisie' beteken. Baie mense voel dit is baie ironies aangesien Kwinana oor 'n groot nywerheidsgebied beskik met omliggende woonbuurtes wat beteken dat daar nie werklik enige onderbreking is in die opgeboude gebiede tot in Fremantle nie.

Nywerhede

Kwinana se CBH graanlaaiterminaal.

BP was een van die stigtersmaatskappye van die nywerheidsgebied in samewerking met die staatsregering. Die staatsregering het daarna omgesien dat die hawegeriewe ontwikkel is om die aflaai van beduidende hoeveelhede ru-olie moontlik te maak. BP bestuur Wes-Australië se enigste olieraffinadery in Kwinana met vele ander petrochemiese verwante bedrywe in die omgewing soos byvoorbeeld Coogee Chemicals. Die Kwinana-ontsoutingsaanleg is ook hier geleë in die voorstad wat Naval Base heet.

Geriewe

Die Perth Motorplex in Kwinana.

Kwinana bestaan egter nie net uit woonbuurtes nie en daar is drie openbare strande by Cockburn Sound wat oor Garden-eiland uitkyk. Die SS Kwinana vorm tans self deel van die kaai te Kwinana Beach. Die roestende oorblyfsels van die skip is tot op die laagwatervlak afgesny en met kalksteen opgevul om die platform te skep. Daar is ook vleiland en bosgebied in Kwinana.

Plaaslike maatskappye is ywerig om gesien te word as sou hulle die omgewing bewaar en beweer dat hulle die beste praktyke volg in vervaardiging in soverre dit omgewingsbeskerming betref.

Kwinana is ook die kern vir sleeprenne, 'n grondpad resiesbaan en vele ander motor- en motorfietssporte. Die Perth Motorplex is in Desember 2000 geopen teen 'n koste van AUD$20 miljoen met eetgeriewe, kroeë en beligting vir die stadion. Baie bekende motorsportgeleenthede word op die baan gehou.

Woonbuurte

• Anketell
• Bertram
• Calista
• Casuarina
• Hope Valley
• Kwinana Beach
• Kwinana Town Centre
• Leda
• Mandogalup
• Medina
• Naval Base
• Orelia
• Parmelia
• Postans
• The Spectacles
• Wandi
• Wellard

Eksterne skakels

• Kaart van die Nywerheidsgebied (pdf - 1.8Mb)
• Town of Kwinana Webwerf
• Google map dui Kwinana, Garden-eiland links, die Vlootbasis daarbo en The Spectacles aan die regterkant