Laerskool Paul Greyling
Die Laerskool Paul Greyling was 'n Afrikaansmedium-laerskool in Sunrayweg in die Kaapstadse voorstad Vishoek, volgens sy webwerf "die mees suidelike Afrikaanse skool in Afrika" (hoewel die Laerskool Struisbaai en Laerskool Gansbaai ook Afrikaansmedium is, maar verder suid geleë). Die skool het sy sestigste bestaansjaar in 2016 gevier. Vanaf 2023 het die skool, die laaste Afrikaansmediumskool in Kaapstad se suidelike voorstede, begin om parallelmediumonderrig in te voer met die eerste Engelse gr. 1-klas.
| Laerskool Paul Greyling | |
| |
| Leuse | Dien in geloof |
|---|---|
| Gestig | 1956 |
| Tipe | Staatskool |
| Leerlinge | 175 (van wie 17 in gr. R) |
| Grade | Graad R - gr. 7 |
| Adres | Vishoek |
| Stad | Kaapstad |
| Provinsie | Wes-Kaap |
| Land | Suid-Afrika |
| Webblad | lpgskool.co.za |
Geskiedenis
wysigDie skool is in 1956 gestig nadat 'n behoefte aan Afrikaanse onderrig in die Vishoek-omgewing ontstaan het. Van die stigterslede was ds. H.F.M. Louw en dr. Paul Greyling. Louw was van 13 Desember 1947 leraar van die NG gemeente Simonstad-Kalkbaai (NG gemeente Vishoek) en Greyling die laaste leraar van die afsonderlike NG gemeente Kalkbaai, voor dit in 1941 met Simonstad saamgesmelt het as Simonstad-Kalkbaai en uiteindelik NG gemeente Vishoek geword het. Hy was later algemene sekretaris van die N.G. Kerk-uitgewers, voorloper van Lux Verbi.BM.
Die eerste skoolhoof, mnr. W.J. van Wyk, beklee die pos 23 jaar lank tot sy aftrede in 1979. Hy word opgevolg deur mnre. J.R. Horne, V. Pienaar en J.A. Horn. Die huidige skoolhoof is mnr. J.A. (André) Engelbrecht.
Dit was tot einde 2019 naas die Laerskool Simon van der Stel in Wynberg die laaste Afrikaansmedium-laerskool in die suidelike voorstede ná die sluiting in 1984 van die Laerskool Oude Molen in Pinelands en die invoer van parallelmediumonderrig (tot 2009 toe die skool eentalig Engels geword het) aan die Laerskool Groote Schuur in Rondebosch en aan die Laerskool Zwaanswyk in Retreat, wat tans bekendstaan as die Zwaanswyk Akademie en wat met ingang 2011 Afrikaans as onderrigmedium in die grondslagfase afgeskaf het. Van die oorspronklike vier Afrikaansmedium-hoërskole het vroeg in die 21ste eeu nie een oorgebly nie: Hoërskool Nassau het in 1977 met Hoërskool Groote Schuur saamgesmelt, terwyl laasgenoemde, Voortrekker en Zwaanswyk almal dubbelmedium geword het of verengels het. Simon van der Stel het in 2020 begin om parallelmediumonderrig in te voer toe Engelse leerders in gr. 0 en gr. 1 ingeneem is.
In die eerste nuusbrief van 2011 skryf die skoolhoof oor die vorige jaar: "Ons het onverpoosd gewerk en gebeur om teen oorweldigende huidige tendense ons skool te laat voortbestaan. In geloof het die Beheerliggaam, ouers en onderwysers alle moontlikhede ondersoek en met baie teëspoed en doodloopstrate te doen gekry, maar tog het ons nie opgegee nie. Die werk is nog nie klaar nie, reeds kan ons sien hoedat ons Hemelse Vader ons met 'n dubbele maat geseën het."[1]
Leerdertal
wysigPaul Greyling was nog altyd 'n klein skool, met 'n leerdertal in 2010 van 122, maar 143 in 2011, van wie 27 in gr. 1 en 29 in gr. 2 was, oftewel amper 40 persent van al die leerders. In 2012 was dit 135, met die grootste klas die 26 gr. 3's en die kleinste die 12 gr. 5's. In 2013 het die leerders toegeneem tot 165 (gr. R se 20 leerders ingereken), waarvan die gr. 4- en 5-klasse met 26 leerders elk die grootste was. 2013 se gr. 6-klas het uit net nege leerders bestaan. In 2014 was daar altesaam 28 meer leerders as die jaar vantevore, naamlik 193, van wie 31 in gr. R was. Die grootste klas was die gr. 1's, naamlik 35 leerders. Die leerdertal het van 2011 tot 2014 as volg toegeneem: 143, 135, 165 en 193.
In 2015 was daar 'n verdere toename tot altesaam 208 leerders, van wie 191 in die graadklasse was. Die grootste twee klasse was die gr. 2's met 37 en die gr. 1's met 34 leerders. Paul Greyling het in 2015 die Laerskool Simon van der Stel met sy leerdertal verbygesteek, want toe het Simon van der Stel se totale leerdertal afgeneem tot 196 van wie net 168 in die graadklasse was, oftewel 22 minder as in Paul Greyling se graadklasse. In Februarie 2016 het Paul Greyling 209 en Simon van der Stel 207 leerders gehad. 'n Kenmerk van Paul Greyling in daardie jaar was die groot wanbalans in die graadklasse tussen seuns en meisies: 115 van eersgenoemde en net 72 van laasgenoemde. In Mei 2017 het Paul Greyling altesaam 185 leerders gehad (110 seuns en 75 meisies), vergeleke met Simon van der Stel se 173. Aan die begin van die 2018 skooljaar was die skole gelyk met 202 leerders elk, maar Paul Greyling het 21 in gr. 1 gehad en Simon van der Stel 25 in gr. R en RR.
Verwysings
wysigBronne
wysig- "Druk om laaste Afrikaanse skole te verengels". Maroela Media. 17 September 2018. Besoek op 17 September 2018.