Laerskool Simon van der Stel

Die Laerskool Simon van der Stel in Wynberg was tot einde 2019 die enigste oorblywende Afrikaansmediumskool in die suidelike voorstede van Kaapstad (naas Laerskool Paul Greyling in Vishoek), maar begin 2020 het die skool parallelmedium geword toe Engelse leerders in gr. R en gr. 1 ingeneem is.

Laerskool Simon van der Stel
Simon van der Stel wapen.jpg
Leuse Waarheid wen
Gestig Augustus 1928
Tipe Staatskool
Hoof Mev. Laurika Hefer
Leerlinge 191 (2020)
Grade gr.R - gr.7
Adres Waterloo Green, Wynberg
Stad Kaapstad
Provinsie Wes-Kaap
Land Suid-Afrika
Kleure          
Webblad http://www.simonvanderstel.co.za
Die skoolsaal.
Die skool se leerders en onderwysers in November 2010.

OntstaanWysig

Die toekomstige eerste skoolhoof, mnr. J.D. Fick, en 10 ouers het die skool in Augustus 1928 gestig. Hulle besluit die eerste leerders sou van Januarie 1930 in die beplande Afrikaansmedium-skool in Wynberg opgeneem word. As eerste huisvesting vir die skool, is die Masonic-saal in Pierweg en die saal van die NG gemeente Wynberg, wat in 1930 reeds 101 jaar oud was, gehuur.

Twee onderwyseresse het mnr. Fick bygestaan toe die skool in Januarie 1930 met 90 leerders begin. Dit was vier jaar voor Laerskool Nassau in Observatory en ses jaar voor Laerskool Groote Schuur in Rondebosch. Omdat goewerneur Simon van der Stel se plaas Constantia naby aan Wynberg geleë is, stel die eerste komiteevergadering op die gepaste naam, Simon van der Stel, voor. Die naam is goedgekeur en op 4 Junie 1930 bevestig. Vandag nog herdenk die skool jaarliks Van der Stel se geboortedag op 14 Oktober met 'n muntlegging ten bate van Die Burger se Kersfonds.

Huidige perseelWysig

Die eerste skoolkomitee moes 'n geskikte perseel vir die skoolgebou kry. Hulle stel die onderwysdepartement in kennis dat Waterloo Green, wat aan die verdedigingsmag behoort het, moontlik in die mark sou kom. Die departement koop die grond aan die einde van 1931 vir R2 500. 'n Groot sinkhuis, "Waterloo Hut", wat destyds die woonhuis van kol. Wakefield was en reeds tydens die Anglo-Boereoorlog opgerig is, is so verander dat sewe klasse aan die begin van 1932 daar kon intrek.

Na vele onderhandelinge is in 1933 besluit om 'n nuwe skoolgebou op te rig teen £700. Dit het bestaan uit ses klaskamers, 'n houtwerkkamer, pakkamer, kantoor en afsonderlike kleedkamers vir seuns en meisies. Die seuns en meisies het afsonderlike ingange gekry en dit is in reliëf aangeteken - "Jongetjies" en "Meisies".

In 1948 is op die leuse – "Waarheid Wen" – besluit en die wapen ontwerp. Ná 'n strategiese beplanningsessie omstreeks 2005 om sy voortbestaan as Afrikaansmedium-skool te verseker, het die skool ook op die slagspreuk "Waar elke kind belangrik is" besluit.

In 2010 het die skool sy tagtigjarige bestaan met 'n verskeidenheidskonsert (in September) en 'n reünie (in November) gevier.

LeerdertalWysig

Die skool het aan die begin van 2014 210 leerders gehad van wie 25 in die twee voorgraadse klasse was. Dié getalle het goed vergelyk met 2010, toe die skool 183 leerders van gr. 1 tot gr. 7 en 19 in die twee voorskoolse grade gehad het. Aan die einde van daardie jaar het die skool meer as 40 gr. 7's afgestaan, die laaste keer dat 'n graad uit twee klasse bestaan het. Die 2010-gr. 7-klas buite rekening gelaat, was daar tot 2012 'n toename van gemiddeld een leerder per graad, sodat die skool aan die begin van 2012 171 leerders van gr. 1 tot gr. 7 gehad het en 198 met die voorskoolse klasse ingereken. Begin 2015 het die totale leerdertal afgeneem tot 197, van wie 169 in die graadklasse was en 28 in die twee voorskoolse klasse. Die graadklasse het dus 16 minder leerders gehad as die jaar vantevore. In 2016 het die skool die jaar begin met 204 leerders, van wie 27 in die voorskoolse klasse was en 'n stewige gr. 1-klas van 28 leerders. Die jaar daarop was die totaal net 178, met 25 in die voorgraadse klasse en 27 in gr. 1, maar begin 2018 altesaam 202 leerder, van wie weer 25 voorgraads.

ToekomsWysig

Onder leiding van mnr. Eugene Käsner, wat sedert 1997 aan die hoof van die personeel van sowat tien staan, het die beheerliggaam en onderwysers se vasbeslotenheid toegeneem om as eentalige Afrikaanse skool voort te bestaan. Met ingang 2011 was Simon van der Stel die enigste voormalige Model C-skool tussen Pinelands in die noorde en Muizenberg in die suide wat 'n Afrikaanse gr. 1-klas het, ná die Afrikaanse leerders in Zwaanswyk Akademie se grondslagfase tot net 16 gedaal het en dié skool in 2010 besluit het om Afrikaans met ingang 2011 in die eerste drie grade af te skaf. Laerskool Groote Schuur het Afrikaanse onderrig reeds in 2009 in alle grade gestaak. Sowat 60 oudleerders van Simon van der Stel haal elke skooldag om 07:00 'n bus Oranjezicht toe waar hulle hul skoolloopbaan aan die Hoërskool Jan van Riebeeck voortsit omdat die laerskool al van omstreeks 2005 nie meer as voederskool vir die Hoërskool Voortrekker, wat parallelmediumonderrig ingevoer het, dien nie.

Sien ookWysig

 
Mnr. Eugene Käsner, oud-hoof van die Laerskool Simon van der Stel

BronneWysig

  • "Druk om laaste Afrikaanse skole te verengels". Maroela Media. 17 September 2018. Besoek op 17 September 2018.

Eksterne skakelWysig