Maak hoofkeuseskerm oop

Lerina Erasmus was 'n Suid-Afrikaanse aktrise en skrywer. Sy het die rol van Rusty in die SAUK-sepie Orkney Snork Nie vertolk. Sy is ook die outeur van die Mannheimsage-trilogie.

Lerina Erasmus
Geboorte 20 Augustus 1946
Nasionaliteit Suid-Afrika
Sterfte 20 Augustus 2018
Johannesburg
Beroep(e) Aktrise, skrywer
Webwerf mannheimsage.co.za
Internet-rolprentdatabasis-profiel

Inhoud

Lewe en werkWysig

Lerina Erasmus is in Namibië gebore as die enigste kind in die gesin. Haar pa, Pieter, is ’n boekhouer en ouditeur en die gesin verhuis gereeld as hy van werk verander. Haar ma, Vera, het ’n groot verbeeldingskrag en dramatiseer en maak stories op vir die kind, wat haar van kleinsaf stimuleer. Sy bring haar eerste jare op skool in Namibië deur, waarna sy ook skoolgaan op Lyttelton, Oos-Einde in Pretoria en Klerksdorp. Hulle trek dan terug Namibië toe, waar sy haar hoërskooljare voltooi.

Sy bestudeer Drama aan die Universiteit van Pretoria[1] saam met tydgenote soos Katinka Heyns, Sandra Prinsloo, Neels Coetzee en George Ballot en verower hier die Ludwig Binge-toekenning. Hierna raak sy bekend as aktrise wat vir die streekrade optree in teaterproduksies soos Elektra, Antigoné en Medea, asook in televisiereekse soos Dokter Dokter en Drama Drama. Sy speel ook in die rolprent Dit was aand en dit was more, wat deur Franz Marx geregisseer is,[1] en die rolprente Die drie Van der Merwes en The fifth season.

Verder vertolk sy verskeie rolle in vervolgverhale en dramas oor die radio, waaronder die gewilde Wolwedans in die skemer wat oor Springbokradio uitgesaai is. Later studeer sy aan die Max Reinhardt-Instituut in Oostenryk. Sy is vroeg in die sewentigerjare van die twintigste eeu getroud met Günther Alfred Schmikal, ’n Oostenrykse ingenieur en hulle woon in Parkwood in Johannesburg.[2] Hulle het ’n seun, Stefan-Pieter.

Sy is op Maandag 20 Augustus 2018 in Johannesburg in die ouderdom van 71 jaar oorlede.

SkryfwerkWysig

RadioreekseWysig

Na die geboorte van hulle seun spits sy haar toe op skryfwerk, wat uitloop op talle radioreekse, soos Die Mannheimsage, My hartjie my liefie, Noodskoppelmaai, Solitaire en Vriendinne. Sy word dan versoek om Die Mannheimsage vir televisie te verwerk, met die oog op die Johannesburgse eeufeesjaar in 1986.

Radiosondergrense saai haar radiodrama Die September-insident uit, waarin twee mense met totaal verskillende agtergronde en van uiteenlopende gemeenskappe deur onvoorsiene omstandighede bymekaar gebring word.

TelevisiereekseWysig

Daarna skryf sy ook die televisiereeks Moordspeletjies en is vir ’n tyd verantwoordelik vir die hoofstorielyn van die sepie Glaskastele. Die televisiereeks Dot & Kie is ook uit haar pen.

Haar eerste vollengte draaiboek is While the music lasted (oor wit, swart en bruin dansers wat desperaat probeer om ’n kompetisie te wen in apartheid Suid-Afrika) en sy skryf ook die draaiboek van Die Leliemoordenaar.

Mannheim-sagaWysig

Sy gee self die drie boeke in die Mannheim-sage uit en doen baie navorsing na die geskiedenis van die goudvelde in Transvaal.[3] In Fortuinsoekers word die verhaal vertel van die ontdekking van goud in Johannesburg en die stryd van die kunssinnige en eksentrieke mynbaas Karel Mannheim en Kit Malloy om die hand van Deborah von Albein.[4]

In Goudkewers loop Johannesburg gevaar om ’n spookdorp te word, omdat die goud deurspek is met piriet, wat nie deur konvensionele metodes verwyder kan word nie. Die delwers probeer dieper delf (en word so die goudkewers) om te kyk of die dieper ertslae nie van beter gehalte is nie. Die Jameson-inval en Anglo-Boereoorlog neem feitlik al Karel Mannheim se tyd in beslag. Deborah word gedwing om die bestuur van die goudmyne oor te neem in haar man se afwesigheid, terwyl Kit Malloy steeds teenwoordig is en sy moet kies tussen hom en haar verpligtinge.

Die vervolmaking van die sianiedproses skep ’n goue era vir Johannesburg en die pioniere word Goudbaronne. Karel Mannheim probeer die liefde van sy vrou herwin, maar die oorlog het diep letsels op haar gelaat. Hulle seun en Kit Malloy se dogter raak verlief en die familievete word voortgesit.[5]

EerbewyseWysig

In 2009 word sy ingelyf in die Foxwood-landgoed in Houghton se Tuin van Beroemdes.[6]

PublikasiesWysig

RadioreekseWysig

Van die radioreekse wat sy geskryf het sluit in:

  • Die Mannheimsage (later ook op TV uitgesaai)
  • Hartjie my Liefie
  • Noodlotskoppelmaai
  • Solitaire en Vriendinne

BoekeWysig

Die Mannheimsage-trilogie vertel die verhaal van die eerste jare van Johannesburg, die ontstaan van goudmynbedryf, die verwoestende oorlog en die opbou van Johannesburg daarna. Die boeke is:

Van haar ander boeke:

AktriseWysig

TeaterproduksiesWysig

Van die teaterproduksies waarin sy gespeel het:

  • Elektra
  • Antigoné
  • Medea

TV-optredesWysig

Sy verskyn in die volgende TV-programme:[7]

VerwysingsWysig

BoekeWysig

Van Coller, H.P. (red.) Perspektief en Profiel Deel I. J.L. van Schaik-Uitgewers Pretoria Eerste uitgawe 1998

Tydskrifte en koeranteWysig

  • Anoniem. Trippelgoud vir Lerina. Plus, 5 Julie 2006
  • De Kock, Lochner. Lerina: Diamant met vele fasette. Rapport-Tydskrif, 21 November 1999
  • Fourie, Corlia. My plekkie in die son. Rooi Rose, 23 Junie 1999
  • Odendaal, Thys. Sage in ’n nuwe baadjie. Beeld, 24 Oktober 2007
  • Roos, Martjie. Lerina voltooi die Mannheim-sirkel. Rapport, 9 Julie 2006
  • Snyman, Mariette. Ter wille van die liefde. Rooi Rose, Oktober 2006

Ander verwysingsWysig

  1. 1,0 1,1 Esat: http://esat.sun.ac.za/index.php/Lerina_Erasmus
  2. Rademeyer, Alet. Lerina se huis is ’n vesting met ryk Oostenrykse fleur. Plus, 30 Januarie 1998
  3. Nieuwoudt, Stephanie. Geskiedenis van Goudstad lê Lerina naby aan die hart. Plus, 30 Januarie 1998
  4. Blom, André. Insig, Mei 1998
  5. De Kock, Helene. Plus.
  6. Odendaal, Thys. Lerina Erasmus in Tuin van Beroemdes vereer. Plus, 27 November 2009
  7. Imdb: http://www.imdb.com/name/nm3464901/