Los Angeles-klas duikboot
Die Los Angeles-klasduikboot is 'n klas van kernaangedrewe duikbote van die Amerikaanse Vloot en die klas waarvan die meeste gebou is deur die Vloot. Daar is altesaam 62 duikbote van die klas in diens gestel tussen 1976 en 1996. Die duikbote het VS$1,56 miljard elk gekos teen 2018-pryse. Hulle het 'n ontwerpleeftyd van 30 jaar.
Militêre rol
wysigDie klas is ontwerp vir teenduikbootoorlogvoering en wel teen die Russiese duikbote wat die Amerikaanse gevegsgroepe geteiken het. Die eerste Los Angeles-klasduikbote se hooftaak was om die gevegsgroepe rondom die vliegdekskepe te beskerm. Die duikbote was vinnig en stil en het selfs nog stiller geword soos die duikbootontwikkeling gevorder het. Aanvanklik was hulle toegerus met Harpoon teenskipmissiele en Tomahawk-kruisermissiele maar nadat die Koue Oorlog tot 'n einde gekom het is dit vervang met Tomahawk-landaanvalsmissiele. Hulle het die militêre landmagte in die Balkan en die Persiese Golf ondersteun.
Vervaardiging
wysigDie 62 eenhede is in twee groepe uitgerol. Daar is aanvanklik 30 eenhede voltooi, almal met dieselfde ontwerp. Die duikbote was 110 m lank. Die tweede groep van 30 het oor verbeterde kernreaktors beskik met 12 vertikale buise vir die Tomahawk-kruisermissiele. Die laaste 23 duikbote is toegerus met die gevorderde BSY-1 sonar aanvalstelsel en het ook die vermoë om seemyne deur die torpedobuise te lê.
Hulle was ook aangepas om onder pakys te werk, die hidropanele is van die toring na die boeg verskuif. Die toring was ook versterk om deur die ys te breek. Die duikbote se ontwerp was van so 'n aard dat dit uit twee waterdigte kompartemente bestaan: die voorste kompartement bevat die werks- en ontspanning geriewe asook alle beheer toerusting, sonar en rekenaars. Die agterste kompartement bevat die kernreaktor en aandrywings toerusting.
Nadat die eerste duikbote van die klas uit diens onttrek is, het 'n studie van vyf jaar bewys dat die duikbote se leeftyd met tien jaar verleng kan word teen 'n koste van VS$400 miljoen (2001). Op daardie stadium het die vloot beplan dat hulle oor 68 aanvalsduikbote teen 2015 en 76 teen 2025 sal beskik. Om koste te bespaar kon hulle van die bestaande duikbote opgradeer wanneer die kernbrandstof vervang moes word en nie uit diens onttrek soos aanvanklik beplan was nie. Die laaste duikboot in die Los Angeles-klas was die Cheyenne wat oor die Submarine Advanced Combat System AN/BSY-1 beskik het. Die stelsel kombineer die Sonar met die Vuurbeheerstelsel. Die Cheyenne is ook toegerus met die Mk 48 torpedo met gevorderde vermoë, die Harpoonteenskipmissiel en die Tomahawkkruisermissiel.
Tegniese besonderhede
wysig| Item | Statistiek |
|---|---|
| Verplasing (oppervlak) | 6 210 metrieke ton |
| Verplasing (onderwater) | 6 750 metrieke ton |
| Lengte | 109,73 m |
| Breedte | 10,0 m |
| Aandrywing | S6G kernreaktor, 26 099.5 kW 1 x skroef |
| Spoed (oppervlak) | 23,0 knope |
| Spoed (onderwater) | 30,0 - 32.0 knope |
| Bemanning | 129 persone |
| Wapens | Harpoon en Tomahawk missiele 4 x 533 mm torpedobuise, Mk 48 torpedos |
Bron
wysig- The Illustrated Encyclopedia Of Destroyers Frigates & Submarines, Bernard Ireland en John Parker, 2015, ISBN 978-0-85723-601-2