Louis Blériot
Louis Charles Joseph Blériot (1 Julie 1872 – 2 Augustus 1936) was 'n Franse ontdekker en ingenieur wat die eerste vlug onderneem het oor 'n groot liggaam water met 'n tuig swaarder as lug.
Louis Blériot | |
|---|---|
 | |
| Gebore | Louis Charles Joseph Blériot 1 Julie 1872 |
| Sterf | 1 Augustus 1936 (op 64) Parys, Frankryk |
| Nasionaliteit |  Frankryk |
| Beroep | uitvinder en ingenieur |
| Bekend vir | Eerste swaarder as lug vlug oor die Engelse Kanaal eerste werkende enkelvlerkvliegtuig |
| Eggenoot | Alice Védère (1901) |
| Handtekening | |
 | |
Louis Blériot is in Cambrai gebore en het ingenieurswese aan die École Centrale Paris studeer. Hy ontwikkel vroeg 'n belangstelling in lugvaart en in 1900 bou hy 'n motoraangedrewe masjien wat 'n klapvliegtuig (ornithopter) genoem word. So 'n tuig was veronderstel om te vlieg deur sy vlerke te klap. Soos ander klapvliegtuie voor dié een het die eksperiment nie geslaag nie, maar Blériot het voortgegaan om te werk aan 'n praktiese vliegtuig.
In 1903 het Blériot saam met Gabriel Voisin, 'n vliegtuigontwerper, die maatskappy Blériot-Voisin gestig. Die maatskappy bou 'n watersweeftuig in 1905 wat wel gesweef het. Hulle ontwikkel ook 'n dubbeldekkervliegtuig wat aangedryf word deur 'n Antoinette-motor. Die maatskappy kom in 1906 tot 'n einde en Blériot begin om vliegtuie volgens sy eie ontwerp te bou en te vlieg.
Namate ligter enjins beskikbaar geword het, het hy vliegtuie ontwerp met verskillende konfigurasies wat strek van die boksvlieër tot die eendvliegtuig. Die Blériot V was die wêreld se eerste suksesvolle enkelvlerkvliegtuig. Dit het die eerste keer in 1907 gevlieg, maar is geskrap nadat dit geval het.
'n Prys van duisend pond is uitgeloof deur die Londense Daily Mail vir die eerste suksesvolle vlug oor die Engelse Kanaal. Dit het Blériot geïnteresseer en hom aangemoedig om sy vierde enkelvlerkvliegtuig en sy eerste werklike suksesvolle vliegtuig, die Blériot XI, te ontwikkel. Nadat hy die Europese uithourekord verbeter het met 'n tyd van 36 minutes 55 sekondes en 'n oorlandprys gewen het, het Blériot seker genoeg gevoel om die Engelse Kanaal aan te durf. Op 25 Julie 1909 het hy die vlug van Calais na Dover onderneem in 'n tyd van 37 minute, tot vreugde van die Franse en ontsteltenis van die Britte wat skielik bewus gemaak is dat hulle moontlik aan lugaanvalle blootgestel kan wees.
Kort hierna het Blériot sy aandag gevestig op lugvaartontwerp en vliegtuigboukunde. Hy het in 1914 president geword van die sukkelende vliegtuigmaatskappy Société pour les Appareils Deperdussin. Hy hernoem die maatskappy Société Pour l'Aviation et ses Dérivés (SPAD) en omskep dit in een van Frankryk se voorste vervaardiger van vegvliegtuie. Gedurende die Eerste Wêreldoorlog het SPAD meer as 5 600 vliegtuie vir Frankryk gebou wat ook uit na Brittanje en ander lande uitgevoer is. Hy open ook vliegskole voor die Eerste Wêreldoorlog in Engeland by die Brooklands- en Hendon-vliegveld, sowel as'n fabriek in 1917 by Addlestone, naby Brooklands, Surrey.
Ná die oorlog stig Blériot sy eie maatskappy, Blériot-Aéronautique, vir die ontwikkeling van kommersiële vliegtuie. Hy sterf in 1936 in Parys en word in die Cimetière des Gonards in Versailles ter ruste gelê.
Verwysings
wysig- ↑ (en) "Blériot." Geargiveer 6 Oktober 2006 op Wayback Machine Centennial of Flight Commission, U.S. government, 2003. Besoek op 24 April 2012.
- ↑ "Dossier: LH/256/105" (in Frans). France: Archives Nationales. Geargiveer vanaf die oorspronklike op 21 November 2018.
Eksterne skakels
wysig
Wikimedia Commons het meer media in die kategorie Louis Blériot.
