Movement for Democratic Change

Die Movement for Democratic Change (MDC) is 'n Zimbabwiese politieke party wat onlangs in twee geskeur het. Die hoof-faksie word gelei deur Morgan Tsvangirai en Arthur Mutambara is die leier van die wegbreekparty. Die party is in 1999 as 'n opposisieparty gestig om die Zimbabwe African National Union - Patriotic Front teen te staan wat deur President Robert Mugabe gelei word. Die MDC is gevorm uit 'n breë koalisie van burgerlike groepe en indiwidue wat 'n veldtog vir 'n "Nee" stem in die 2000 referendum in Zimbabwe voorgestaan het, veral die Zimbabwe Congress of Trade Unions.

Movement for Democratic Change
MDC
Vlag van die MDC
Leier	Morgan Tsvangirai
Gestig	1999
Hoofkwartier	44 Harvest House Nelson Mandela Avenue & Angwa Street, Harare, Zimbabwe 263
Jeugvleuel	MDC Youth Assembly
Ideologie	Sosiale demokrasie, Demokratiese sosialisme
Internasionale affiliasie	Sosialistiese Internasionaal, Progressiewe Alliansie
Amptelike kleure	Rooi, swart
Webblad	mdc.co.zw

Geskiedenis

In Februarie 2000 het ZANU-PF 'n referendum oor die grondwet gehad. Die voorgestelde veranderinge sou toekomstige presidente tot twee termyne beperk , maar aangesien dit nie terugwerkend sou wees nie, sou dit Mugabe toelaat om nog twee termyne as president te dien. Dit sou ook aan die regering en militêre amptenare immuniteit teen vervolging verleen vir enige onwettige dade wat gepleeg is tydens hul ampstermyne. Dit het ook die onteiening van grond in blanke besit gewettig vir herverspreiding aan swart boere sonder enige vergoeding. Die referendumvoorstelle is verslaan deur 'n sterk stedelike stem. Hierdie resultaat was vir ZANU-PF 'n verleentheid kort voor parlementêre verkiesings wat in middel April gehou sou word. Die suksesvolle veldtog deur die MDC in dié referendum, het die aansien van die MDC baie laat styg.

Tydens die 2000 parlementêre verkiesings het die MDC 57 van die 120 setels gewen. Dit was die eerste keer dat 'n opposisie party meer as 'n handvol setels kon verower sedert die samesmelting van ZANU en ZAPU in 1988. Die MDC het dominante steun in die meeste stedelike gebiede en in Matabeleland geniet. Die MDC het al die setels in die twee grootste stede, Harare en Bulawayo gewen en slegs twee in Matabeleland verloor.

Hierdie verkiesing is deur internasionale waarnemers vanuit die Britse gemenebes, Noorweë en die Suid-Afrikaanse parlementêre afvaardiging beskryf as nie vry en regverdig nie.