Malta-spitsberaad

Die Malta-spitsberaad was 'n ontmoeting tussen die Amerikaanse president George H. W. Bush en die Sowjet-sekretaris-generaal Michail Gorbatsjof, wat op 2 en 3 Desember 1989 plaasgevind het, net 'n paar weke na die val van die Berlynse Muur. Dit was hul tweede ontmoeting na 'n vergadering wat Ronald Reagan ingesluit het, in New York in Desember 1988. Tydens die beraad sou Bush en Gorbatsjof 'n einde aan die Koue Oorlog verklaar, alhoewel of dit werklik so was, 'n kwessie van debat is. Nuusberigte van destyds het verwys na die Malta-beraad as een van die belangrikstes sedert die Tweede Wêreldoorlog, toe die Britse premier Winston Churchill, die Sowjet-generaal-sekretaris Joseph Stalin en die Amerikaanse president Franklin D. Roosevelt ooreengekom het op 'n na-oorlogse plan vir Europa by die Jalta-konferensie.

Gorbatsjof en Bush net voor hulle  'n maaltyd aan boord van die Sowjet-vaartuig Maksim Gorki deel

Hoogtepunte van die beraad

Monument in Birżebbuġa ter herdenking van die Malta-beraad

Brent Scowcroft en ander lede van die Amerikaanse administrasie was aanvanklik bekommerd dat die voorgestelde Malta-beraad "voortydig" sou wees en dat dit hoë verwagtinge sou wek, maar tot weinig meer as 'n Sowjet-propaganda oorwinning sou lei. Die Franse president François Mitterrand, die Britse premier Margaret Thatcher, ander Europese leiers en sleutellede van die Amerikaanse kongres het egter president Bush oorreed om met voorsitter Gorbatsjof te vergader.

Geen ooreenkomste is by die Malta-beraad onderteken nie. Die hoofdoel daarvan was om die twee supermoondhede, die Verenigde State en die Sowjetunie, die geleentheid te bied om die vinnige veranderinge wat in Europa plaasvind te bespreek met die opheffing van die Ystergordyn, wat die Oosblok van Wes-Europa vir vier dekades geskei het. Die beraad word deur sommige waarnemers as die amptelike einde van die Koue Oorlog beskou. Dit het ten minste die vermindering van spanning gemerk wat die kenmerk van daardie era was en 'n groot keerpunt in Oos-Wes-verhoudinge aangedui. Tydens die beraad het president Bush sy steun uitgespreek vir Gorbatsjof se perestroika-inisiatief en ander hervormings in die Kommunistiese blok.

By die beraad het die Amerikaanse president George Bush as 'n teken aan alle deelnemers van die konferensie 'n stukkie van die Berlynse Muur oorhandig. Dit is op 'n presidensiële sending versamel waarin twee vlieëniers en vier soldate met voorhamers na Berlyn gestuur is waar 400 pond ingesamel is; 200 lb is aan die President gegee en 200 lb aan lede van die 207th Aviation Company.

Die Sowjet-leier het tydens 'n gesamentlike nuuskonferensie gepraat:

"Die wêreld verlaat een epog en gaan 'n ander binne. Ons is aan die begin van 'n lang pad na 'n blywende, vreedsame era. Die bedreiging van geweld, wantroue, sielkundige en ideologiese stryd behoort alles dinge van die verlede te wees."

"Ek het die president van die Verenigde State verseker dat ek nooit 'n warm oorlog teen die VSA sal begin nie."

In antwoord het president Bush gesê:

"Ons kan 'n blywende vrede verwesenlik en die Oos-Wes-verhouding verander na een van blywende samewerking. Dit is die toekoms wat ek en voorsitter Gorbatsjof net hier in Malta begin het.

Verdere leeswerk

• McGeorge Bundy, "From Cold War Toward Trusting Peace", in Foreign Affairs: America and the World 1989/1990, Vol. 69, No. 1.
• BBC News: "1989 - Malta Summit Ends Cold War".
• CNN: Cold War Interviews, Episode 23: "The Wall Comes Down", an Interview with George H.W. Bush
• CNN: Cold War Interviews, Episode 24: Transcripts from Malta Summit
• David Hoffman, "Bush and Gorbachev Hail New Cooperation", Washington Post (December 4, 1989)
• Richard Lacayo, "Turning Visions into Reality", in Time (aanlyn): 11 Desember 1989
• Romesh Ratnesar, "Condi Rice Can't Lose", in Time (aanlyn): 20 September 1999